Мерәки бь наве Сет * дькә бира хԝә: «Мьн тʹәви жьна хԝә Прискила, ԝәʹдәкида хәбата хԝә ӧнда кьр. Дӧ сала мәрьвед мә аликаʹри дьданә мә, у мә жи щурʹә-щурʹә хәбат дькьр. Жь бо ԝе дәрәще, жьна мьн гәләк дьлтәнг дьбу у мьн хԝә бекер тʹәхмин дькьр.

«Ле мә карьбу тәйах кьн бәр ве чәтьнайе. Прискиллайе һәргав дькьрә бира хԝә гьлийе Иса жь Мәтта 6:34, кʹидәре кӧ Иса дьбежә ԝәки әм бона рʹожа сьбе хәма нәкьн, чьмки хәме һәр рʹожәки һәнә. У чахе жьна мьн бь дьл у щан дӧа дькьр, әв йәк ле ԛәԝи дькьр. Ле бона мьн Зәбура 55:22 аликʹари бу. Анәгори зәбурбеж, мьн баре хԝә да дәсте Йаһоԝа Хԝәде, у әз жи ԛәԝи бум. Ньһа хәбата мьн һәйә, ле әм диса жи ль гора ширәта Иса дьжин йе кӧ Мәтта 6:20-22-да ньвисар ә. Хенщи ԝе йәкә әм һе незики Хԝәде бун у һәврʹа жи даһа незик бун».

Мәрьвәки бь наве Йонатʹан дьбьжә: «Чахе бизнеса малбәта мә һатә дадане, әз гәләк тьрсийам сәва ахьрийа малбәта хԝә. Мьн ԝәкә 20 сала әв хәбат дькьр, у жь бо кризиса аборийе әв хәбат бекер бу. Мьн тʹәви жьна хԝә дәстпекьр сәва пʹәра шәрʹа бькьн. Мә нә жи дькарьбу тьштәк бь кредит һьлда, чьмки дьфькьрин кӧ ԝе кредит нәдьнә мә.

«Ле Хәбәра Хԝәде у рʹӧһʹе ԝийи пироз, али мә кьр сафикьрьна баш бькьн. Әз һин бум һʹәму щурʹә хәбатрʹа рʹази бьм у мә тʹәне әԝ тьшт дькʹьри, чь кӧ рʹасти жи мәрʹа лазьм бун. Мә ӧса жи аликʹари дьстанд жь хушк-бьред мәйи щьвате, демәк жь Шʹәдед Йаһоԝа. Әԝана али мә кьрьн, сәва кӧ әм ԛәдьре хԝә ӧнда нәкьн, у аликʹарийа мәзьн дьдан һәла һе ԝәʹде чәтьнда жи».

Ракел тинә бира хԝә: «Чахе мере мьн ньшкева әз һиштьм, әз гәләк дьлтәнг бум у һерса мьн рʹадьбу. Әв йәк мьрʹа бу дәрдәки гьран. Ле мьн хԝә ль Хԝәде дьгьрт, у Әԝи бәрдьли да мьн. Чахе мьн һәр рʹож дӧа дькьр, мьн тʹәхмин дькьр кӧ әʹдьлайа жь Хԝәде дьле мьн хԝәй дькә. Мьрʹа ӧса дьһатә кʹьфше, кӧ те бежи Йаһоԝа дьле мьни шькәсти ԛәнщ кьр.

«У бь сайа Хәбәра ԝи, демәк Кʹьтеба Пироз, мьн карьбу һерс у хәйда хԝә дахьм. Мьн гӧһ да гьлийе Паԝлосе шанди, йед кӧ Рʹомайи 12:21-да ньвисар ьн: ‹Нәһелә хьраби сәр тә кʹәвә, ле бь ԛәнщийе тӧ сәр хьрабийе кʹәвә›.

«Һәваләки мьн али мьн кьр ԝәки әз хԝә ԛайим бьгьрьм. Әԝи мьнрʹа нишан кьр Ԝаиз 3:6 у бь нәрми готә мьн, кӧ ньһа ида ԝәʹдә йә һини дәрәще хԝә бьм. Әв йәк чәтьн бу, ле ширәта ԝи ԝәʹдәда бу. Ньһа әз ида дина хԝә надьмә проблемед хԝә у шабуна хԝә ӧнда накьм».

Кʹӧлфәта бь наве Елизабет дьбежә: «Чахе мер-жьн жь һәв дьԛәтьн, аликʹари у пьштгьри лазьм ә. Һәваләкә мьнә баш һәр рʹож пьштгьрийа мьн дькьр. Әԝ тʹәви мьн дьгьрийа, әз һелан дькьрьм, у жь алийе ԝеда мьн һʹьзкьрьн тʹәхмин дькьр. Әԝе әз нәһиштьм. Әз баԝәр ьм, ԝәки Йаһоԝа бь сайа ве һәвале, бьринед дьле мьн ԛәнщ кьр.

Луйис, дәрһәԛа кʹижани кӧ мә пешда дьгот, гьран нәхԝаш ә у нәхԝашийа ԝи дьлва гьредайи йә. Жь бо ве йәке дӧ щара һьндьк мабу әԝ бьмьра. Рʹоже 16 сьһʹәта ԝирʹа оксижән лазьм ә, кӧ бькарьбә бина хԝә бькʹьшинә. Әԝ дьбежә: «Әз һәр гав Йаһоԝарʹа дӧа дькьм. У паши дӧакьрьне әз тʹәхмин дькьм, кӧ Хԝәде бь рʹӧһʹе хԝә мьн ԛәԝи дькә. Дӧа али мьн дькә мерхас бьм у хԝә ԛайим бьгьрьм, чьмки әз баԝәр дькьм кӧ Хԝәде сәва мьн хәм дькә».

Петра кʹӧлфәта кӧ 80 сали зедәтьр ә, дьбежә: «Әз гәләк тьшт дьхԝазьм бькьм, ле нькарьм. Әз гәләк бәрхԝә дькʹәвьм, кӧ ԛәԝата мьн кем дьбә. Әз ӧса сьст ьм, кӧ дәрманава гьредайи мә. Гәләк щара әз дьфькьрьм сәр гьлийе Иса, йе кӧ готьбу Баве хԝә кӧ һәрге дьбә, бьра әв щәфа сәр ԝирʹа дәрбаз бә. Йаһоԝа Иса ԛәԝи кьр, у мьн жи ԛәԝи дькә. Дӧа сәва мьн ча дәрмане һәррʹожи йә. Чахе әз тʹәви Хԝәде  хәбәр дьдьм, паше әз ида хԝә даһа баш тʹәхмин дькьм» (Мәтта 26:39).

Һулийан, ԝәкә 30 сала бь нәхԝәшикә гьран нәхԝәш ә. Әԝ ӧса дьбежә: «Мьн хәбатеда щийе бьльнд дьгьрт, ле ньһа щийе мьн ль сәр кʹӧрсийе йә, кӧ сәва мәрьвед сәԛәт ә. Ле жийина мьнда шабун йәкә һәйә, чьмки әз аликʹарийе дьдьм мәрьвед дьн у мьзгинийе бәла дькьм. Чахе әз мәрийарʹа мьзгинийе бәла дькьм, чәтьнайед мьн сьвьк дьбьн, чьмки Йаһоԝа чаԝа кӧ соз дабу, ԝәʹде чәтьнайа мә ԛәԝи дькә. Ԝәк Паԝлосе шанди, әз бь рʹасти дькарьм бежьм: ‹Әз һәр тьшти бь сайа ԝи дькарьм, йе кӧ ԛәԝате дьдә мьн›» (Филипи 4:13).

Мерәки бь наве Антонйо дьбежә: «Баве мьн архайин рʹерʹа дәрбаз дьбу, у ньшкева кʹәтә ԛәзийе. Пешийе мьн әв йәк ԛә баԝәр нәдькьр. Әԝ ԝәкә 5 рʹожа комайеда бу, у мьн нькарьбу аликʹари бьдайе. У хьлазийе баве мьн мьр. Мьн хԝә дьгьрт, сәва кӧ бәр дийа хԝә нәгьрим, ле чахе әз тʹәне дьмам, әз кʹәлә-кʹәл дьгьрийам. У мьн пьрс дьда хԝә: ‹Гәло чьма? Чьма?›

«Нава ԝан рʹожед чәтьнда, мьн рʹәща Йаһоԝа дькьр кӧ әʹдьлайе бьдә мьн у али мьн бькә хԝә бьгьрьм. Ӧса дьле мьн һеди-һеди һеса дьбу. Гьлийе жь Кʹьтеба Пироз дькʹәтьнә бира мьн, кӧ һәркәс жь мә дькарә рʹасти ‹ԛәԝьмандьнед› хьраб бе. Әз заньм кӧ Хԝәде хԝәйе созе хԝә йә, ләма жи баԝәр дькьм кӧ әԝ ԝе баве мьн диса вәгәрʹинә жийине» (Ԝаиз 9:11; Йуһʹәнна 11:25; Тито 1:2).

Роберт жи, дәрһәԛа кʹижани кӧ мә пешда хәбәр дьда, фькьред ви щурʹәйи дьбежә: «Чахе мьн тʹәви жьна хԝә Марибел, Йаһоԝарʹа дӧа дькьр, мә әʹдьлайа Хԝәде ль сәр хԝә тʹәхмин дькьр, кӧ жь һәр һʹьш-аԛьли дәрбазтьр ә. Дәрһәԛа ве йәке те готьне дь Филипи 4:6, 7-да. Әв әʹдьлайи кӧ кʹәтә дьле мә, ԛәԝат да мә ԝәки дь телевизийонеда хәбәр дьн дәрһәԛа баԝәрийа хԝә һьндава сахкьрьне. Рʹаст ә жь бо кʹәтьна тәйаре мә кӧрʹе хԝә ӧнда кьр, ле әме тʹӧ щар ӧнда нәкьн биранине дәрһәԛа ԝи. Әм тʹьме дина хԝә дьдьнә ԝан ԝәʹда.

«Хушк-бьред щьвате готьнә мә кӧ ԝана әм телевизийонеда дитьн, ԝәки ча мә архайин дәрһәԛа баԝәрийа хԝә гьли дькьр. Мә гот кӧ әв һʹәму тьшт бь сайа дӧакьрьна гәләка бу, йед кӧ дәрһәԛа һʹалхԝәшийа мә дӧа дькьрьн. Әз бь рʹасти жи баԝәр дькьм, кӧ Йаһоԝа пьштгьрийа мә дькьр бь сайа гәләк нәʹма кӧ мәрʹа дьшандьн у бәрдьли дьданә мә».

Жь мәсәлед жоре готи, те кʹьфше кӧ Хԝәде дькарә бәрдьлийе бьдә мәрийа, йед кӧ рʹасти щурʹә-щурʹә чәтьнайа у ԛәзийа тен. Ле тӧ әве йәке баԝәр дьки? Фьрԛи тʹӧнә тӧ рʹасти чь чәтьнайа бей, бьзаньбә тӧ дькари бәрдьлийе бьстини у Хԝәде ԝе ԝәʹде чәтьнайа али тә бькә. * Ләма жи ԝе баш бә кӧ әм жь Йаһоԝа аликʹарийе бьхԝазьн. Чьмки әԝ «Хԝәдейе һʹәму бәрдьлийе» йә (2 Корьнтʹи 1:3).