Wetin bin apin? Wetin mek Gɔd nɔ bin fɛt fɔ di Ju pipul dɛn lɛk aw i bin de du trade? Ɔ wetin mek i nɔ alaw dɛn fɔ fɛt so dat dɛn go fri dɛnsɛf frɔm di bad we we dɛn bin de trit dɛn? Yu tink se di we aw Gɔd bin de si wɔ dɔn chenj? Nɔ, i nɔ chenj. Na di Ju pipul dɛn bin dɔn rili chenj. We Jizɔs we na Gɔd in Pikin kam as di Mɛsaya, dɛn nɔ bin lisin to am. (Di Apɔsul Dɛn Wok [Akt] 2:36) Na dat mek di wan ol neshɔn bin lɔs di fayn padi biznɛs we dɛn bin gɛt wit Gɔd.—Matyu 23:37, 38.

Gɔd nɔ bin kɔntinyu fɔ protɛkt di Ju pipul dɛn ɛn di land we i bin dɔn prɔmis dɛn, ɛn dɛn nɔ bin gɛt rayt igen fɔ se Jiova de sɔpɔt dɛn we dɛn de fɛt wɔ. Lɛk wetin Jizɔs bin tɔk, dɛn nɔ bin kɔntinyu fɔ gɛt di blɛsin we dɛn bin fɔ gɛt bikɔs dɛn nɔ bin kɔntinyu fɔ du wetin Gɔd want. Bifo dat, na di nyu neshɔn we di Baybul leta kɔl “di Izrɛl we na Gɔd in yon” na dɛn gɛt di blɛsin. (Lɛta Fɔ Galeshya 6:16, NW; Matyu 21:43) Na di anɔyntɛd Kristian dɛn dɔn bi di Izrɛl we na Gɔd in yon. Na dat mek insay di fɔstɛm Kristian dɛn tɛm dɛn bin tɛl dɛn se dɛn “dɔn bi [Gɔd] in pipul dɛn.”—Pita In Fɔs Lɛta 2:9, 10.

Ɛnti di fɔstɛm Kristian dɛn bin dɔn bi “[Gɔd] in pipul” dɛn, yu tink se Gɔd bin fɛt fɔ dɛn so dat i go fri dɛn frɔm di bad we aw di Roman pipul dɛn bin de trit dɛn? Ɔ yu tink se i bin alaw dɛn fɔ fɛt wɔ agens di wan dɛn we bin de trit dɛn bad? Nɔ, i nɔ bin du dat. Wetin mek? We i kam pan di wɔ dɛn we Gɔd de gri fɔ, na Gɔd nɔmɔ gɛt di rayt fɔ disayd ustɛm dɛn fɔ fɛt lɛk aw wi bin dɔn tɔk insay di atikul we de bifo dis wan. Gɔd nɔ bin de fɛt wɔ fɔ di fɔstɛm Kristian dɛn ɛn i nɔ bin de alaw dɛn fɔ fɛt. Dis sho klia wan se nɔto insay di fɔstɛm Kristian dɛn tɛm na bin di rayt tɛm fɔ mek Gɔd fɛt agens di bad we aw dɛn bin de trit in pipul dɛn.

So lɛk Gɔd in pipul dɛn we bin de fɔs fɔstɛm, di fɔstɛm Kristian dɛnsɛf bin fɔ wet te Gɔd in tɛm rich fɔ fɛt fɔ dɛn fɔ mek dɛn lɛf fɔ trit dɛn bad. Te dɛn de wet fɔ da tɛm de, Gɔd nɔ bin alaw dɛn fɔ mek dɛn fɛt dɛn ɛnimi dɛn. Jizɔs Krays bin tɔk bɔt dis klia wan we i bin de tich. Fɔ ɛgzampul, i nɔ bin tɛl in disaypul dɛn fɔ fɛt wɔ, bifo dat i bin tɛl dɛn se: “Una fɔ lɛk dɛn pipul we nɔ lɛk una, ɛn una fɔ pre fɔ dɛn pipul we de mek una sɔfa.” (Matyu 5:44) We Jizɔs bin de tɔk bɔt di tɛm we di Roman sojaman dɛn go kam atak Jerusɛlɛm, i nɔ bin tɛl in disaypul dɛn fɔ fɛt. I bin tɛl dɛn se dɛn fɔ rɔnawe, ɛn na dat dɛn bin du.—Lyuk 21:20, 21.

Apat frɔm dat, di apɔsul Pɔl bin rayt se: “Una nɔ fɔ tɔn bad gi ɛnibɔdi we du una bad. . . . Dɛn rayt na Gɔd in Buk se, ‘Di Masta [Jiova] se, a go mek dɛn pipul we de du ɔda pipul bad, sɔfa fɔ di bad we dɛn de du.’” (Lɛta Fɔ Rom 12:19) Pɔl bin  de kot frɔm wetin Gɔd bin dɔn tɔk lɔng lɔng tɛm insay Lɛvitikɔs 19:18 ɛn Ditarɔnɔmi 32:35. Lɛk aw wi bin dɔn tɔk insay di atikul we de bifo dis wan, wan we aw Gɔd bin de fɛt fɔ in pipul dɛn trade na bay we i bin de sɔpɔt dɛn we dɛn de fɛt dɛn ɛnimi dɛn. So wetin Pɔl bin tɔk sho se di we aw Gɔd de si wɔ nɔ chenj. Insay di fɔstɛm Kristian dɛn tɛm, Gɔd bin stil de si wɔ as di rayt we fɔ fɛt fɔ in pipul dɛn ɛn fɔ stɔp di bad we aw dɛn bin de trit dɛn. So jɔs lɛk trade, na Gɔd nɔmɔ gɛt di rayt fɔ sho ustɛm fɔ fɛt ɛn udat fɔ fɛt.

Dis sho klia wan se Gɔd nɔ bin de alaw di fɔstɛm Kristian dɛn fɔ fɛt wɔ. Bɔt we insay we yon tɛm, yu tink se Gɔd de alaw sɔm pipul dɛn fɔ fɛt wɔ? Ɔ yu tink se naw na di tɛm we Gɔd fɔ fɛt fɔ in pipul dɛn? Aw yu tink se Gɔd de si wɔ insay wi yon tɛm? Di las atikul ɔnda dis tɔpik go ansa dɛn kwɛstyɔn dɛn ya.