တၢ်ဘူၣ်တၢ်ဘါအတၢ်သိၣ်တၢ်သီလၢ သရိာ်အခိၣ်နၢ်တဖၣ် န့ၢ်မါန့ၢ်ဝၤတသ့ဘၣ်န့ၣ် မ့ၢ်အကြၢးဝဲဘၣ်ဝဲဧါ
တၢ်ဘူၣ်တၢ်ဘါလၢ ဟီၣ်ခိၣ်ဒီဘ့ၣ် ဒ်သိးဒီး ရိမ့ၤခဲးသလ့းအတၢ်ဘါ, အီသဒီးအတၢ်ဘါ, ဘူးဒးတၢ်ဘါ, ဒီးတၢ်ဘူၣ်တၢ်ဘါအဂၤတဖၣ် ပာ်လီၤတၢ်သိၣ်တၢ်သီလၢအခိၣ်အနၢ်တဖၣ် န့ၢ်မါန့ၢ်ဝၤတသ့ဘၣ်. ဒီးပှၤအါဂၤဆိကမိၣ်ဝဲလၢ မုၢ်မဆါတနံၤအံၤ ခီဖျိလၢလုၢ်လၢ်တခါအံၤအဃိ ပထံၣ်ဘၣ်တၢ်ဘူၣ်တၢ်ဘါ အကလုာ်ကလုာ်အခိၣ်နၢ်တဖၣ် အမံၤဟူသၣ်ဖျါထီၣ်လၢ တၢ်မၤကမၣ်မုၣ်ကမၣ်ခွါလီၤ.
လၢတၢ်န့ၣ်အဃိ ပကြၢးသံကွၢ်တၢ်ဒ်အံၤလီၤ. မ့ၢ်လံာ်စီဆှံအတၢ်သိၣ်တၢ်သီ အိၣ်လၢခရံာ်ဖိခိၣ်နၢ်တဖၣ် န့ၢ်မါန့ၢ်ဝၤတသ့ဘၣ်ဧါ. ဒ်သိးပကစံးဆၢတၢ်သံကွၢ်အံၤအဂီၢ် ပကဃုသ့ၣ်ညါဘၣ်ဃးဒီး လုၢ်လၢ်တခါအံၤ ဟဲအိၣ်ထီၣ်ဝဲဒ်လဲၣ်, ဘၣ်မနုၤအဃိ လုၢ်လၢ်အံၤအါထီၣ်ဂီၢ်ထီၣ်ဝဲလဲၣ် ဒီးလုၢ်လၢ်တခါအံၤ ကစၢ်ယွၤထံၣ်ဝဲဒ်လဲၣ်.
တၢ်တြီတၢ်န့ၢ်မါန့ၢ်ဝၤ အခီၣ်ထံးခီၣ်ဘိ
ဖဲ ၂၀၀၆ အနံၣ်န့ၣ် ရိမ့ၤခဲးသလ့း ပၤပၤ ဘဲနဒံၤ ၁၆ ဂၤတဂၤတဲဖျါထီၣ်ဝဲလၢ တၢ်ဘူၣ်တၢ်ဘါအတၢ်သိၣ်တၢ်သီ လၢခရံာ်ဖိခိၣ်နၢ်တဖၣ် န့ၢ်မၤန့ၢ်ဝၤတသ့ဘၣ်န့ၣ် အခီၣ်ထံးခီၣ်ဘိဟဲလီၤစၢၤလၢ “လုၢ်လၢ်တခါလၢ ဘၣ်တၢ်ဒုးအိၣ်ထီၣ်အီၤဖဲ တၢ်မၢဖိတဖၣ်သံဝံၤအလီၢ်ခံ တယံာ်ဘၣ်န့ၣ်လီၤ.”
ဘၣ်ဆၣ် ခရံာ်ဖိလၢတၢ်မၢဖိအစိၤန့ၣ် တမၤထွဲဝဲတၢ်ဘူၣ်တၢ်ဘါအလုၢ်လၢ်တခါအံၤဘၣ်. စီၤပီလူးလၢ အိၣ်မူဘၣ်ဝဲလၢတၢ်မၢဖိအစိၤန့ၣ် ဟ့ၣ်ပလီၢ်ပှၤစူၢ်တၢ်နာ်တၢ်ကဒဲကဒဲ ဘၣ်ဃးဒီးပှၤတနီၤလၢ “ကနာ်သးတဖၣ်လၢအလီတၢ်” ဒီး “တြီဝဲဒ်သိးပှၤသုတန့ၢ်မါန့ၢ်ဝၤတဂ့ၤ” အဂီၢ်လီၤ.—၁ တံၤမသ့း ၄:၁-၃.
စးထီၣ်ဖဲခံယၤဖှိၣ်အဆၢကတီၢ်န့ၣ် လုၢ်လၢ်တခါအံၤ ဘၣ်တၢ်ဒုးအိၣ်ထီၣ်အီၤလၢ ကီၢ်မုၢ်နုာ် “ခရံာ်ဖိ” အသရိာ်တဖၣ်အပူၤလီၤ. ဒ် Celibacy and Religious Traditions အလံာ်ပာ်ဖျါထီၣ်ဝဲအသိး လုၢ်လၢ်အံၤ “လီၤပလိာ်အသးဒီး တၢ်တြီတၢ်မံဃုာ် လၢအဟဲပၢၢ်ထီၣ် လၢရိမ့ၤအဘီမုၢ်အတၢ်ပၢအဖီလာ်န့ၣ်လီၤ.”
ဒ်တၢ်ဆၢကတီၢ်လဲၤပူၤကွံာ်ဝဲအသိး သရိာ်ခိၣ်နၢ်တဖၣ်မၤဝဲတၢ်အိၣ်ဖှိၣ်လၢ အဆီၣ်ထွဲသရိာ်ခိၣ်နၢ်တဖၣ် ဒ်သိးအသုတဟံးန့ၢ်မါဟံးန့ၢ်ဝၤတဂ့ၤအဂီၢ်လီၤ. တကးဒံးဘၣ် သရိာ်ခိၣ်နၢ်လၢပျၢၤတဖၣ်န့ၣ် ဆီၣ်ထွဲဝဲလုၢ်လၢ်တခါအံၤလီၤ. အဝဲသ့ၣ်ဆိကမိၣ်ဝဲလၢ တၢ်မံဃုာ် မ့ၢ်တၢ်လၢအတကဆှီဘၣ်အဃိ ပှၤလၢအဟံးထီၣ်ဖီၣ်ထီၣ် သရိာ်ခိၣ်နၢ်မူဒါတဖၣ်န့ၣ် မၤဝဲတသ့ဘၣ်. ဘၣ်ဆၣ် Encyclopædia Britannica ပာ်ဖျါထီၣ်ဝဲလၢ “တုၤလီၤလၢတဆံယၤဖှိၣ်န့ၣ် ခဲးသလ့းအစီၤသီအါဂၤ ဒီးဘံၡီးတနီၤဒၣ်လဲာ် အိၣ်ဒီးအမါလီၤ.”
ဖဲ ၁၁၂၃ ဒီး ၁၁၃၉ နံၣ်လၢဝ့ၢ်ရိမ့ၤအပူၤန့ၣ် ပှၤမၤ Lateran Councils တၢ်အိၣ်ဖှိၣ်ဒီး ပာ်ဂၢၢ်ပာ်ကျၢၤတၢ်သိၣ်တၢ်သီလၢ သရိာ်ခိၣ်နၢ်တဖၣ် န့ၢ်မါန့ၢ်ဝၤတသ့ဘၣ်. ဒီးရိမ့ၤခဲးသလ့းအတၢ်ဘူၣ်တၢ်ဘါ မၤထွဲဝဲတၢ်သိၣ်တၢ်သီအံၤ တုၤလီၤလၢမုၢ်မဆါတနံၤအံၤလီၤ. ခီဖျိလၢ အဝဲသ့ၣ်မၤထွဲဝဲ တၢ်ဘူၣ်တၢ်ဘါအတၢ်သိၣ်တၢ်သီတခါအံၤအဃိ ကဲထီၣ်တၢ်ဒီသဒၢ ဒ်သိးခဲးသလ့းစီၤသီတဖၣ် သုတဟ့ၣ်သါလီၤသရိာ်အတၢ်စုလီၢ်ခီၣ်ခိတဖၣ်ဆူ အဖိအအိၣ်တဂ့ၤအဂီၢ်လီၤ.
တၢ်တြီတၢ်န့ၢ်မါန့ၢ်ဝၤန့ၣ် ကစၢ်ယွၤထံၣ်ဝဲဒ်လဲၣ်
ကစၢ်ယွၤအတၢ်ထံၣ် ဘၣ်ဃးဒီး တၢ်တြီတၢ်န့ၢ်မါန့ၢ်ဝၤန့ၣ် လံာ်စီဆှံပာ်ဖျါထီၣ်ဝဲ လီၤတံၢ်လီၤဆဲးလီၤ. လၢလံာ်စီဆှံအပူၤ ပဖးဘၣ်ယ့ၣ်ၡူးအတၢ်ကတိၤလၢ အဘၣ်ဃးဒီးပှၤအိၣ်သဘျ့ ဒ်သိးဒီးအီၤလၢ “မူခိၣ်အဘီအမုၢ်” အဂီၢ်လီၤ. (မးသဲ ၁၉:၁၂) ဒ်န့ၣ်အသိး တၢ်မၢဖိပီလူးတဲဘၣ်ဃးဒီး ခရံာ်ဖိတဖၣ်လၢ အဆၢတဲာ်လီၤအသးလၢ ကအိၣ်သဘျ့ ဒ်သိးဒီးအီၤလၢ “တၢ်သးခုအကစီၣ်” အဂီၢ်လီၤ.—၁ ကရံၣ်သူး ၇:၃၇, ၃၈; ၉:၂၃.
ဘၣ်ဆၣ် ယ့ၣ်ၡူးဒီးစီၤပီလူး တဟ့ၣ်လီၤတၢ်မၤလိာ်လၢ ပှၤလၢအတီခိၣ်ရိၤမဲတၢ်လၢ တၢ်အိၣ်ဖှိၣ်အပူၤန့ၣ် ကဘၣ်အိၣ်သဘျ့ဝဲဘၣ်. ယ့ၣ်ၡူးတဲဝဲလၢ တၢ်အိၣ်သဘျ့န့ၣ် မ့ၢ်ဝဲ “တၢ်ဟ့ၣ်” တခါလၢအပျဲၢ်အဘီၣ်ကိးဂၤဒဲး တဒိးန့ၢ်ဘၣ်ဝဲဘၣ်. ဖဲစီၤပီလူးကွဲးဘၣ်ဃးဒီး “ပှၤလၢအတန့ၢ်မါန့ၢ်ဝၤတဖၣ်” အခါ အဝဲအၢၣ်လီၤဝဲလၢ “မ့မ့ၢ်ဒ်ပှၤလၢအဒိး တၢ်သးကညီၤလၢ ကစၢ်လၢအကမ့ၢ် ပှၤအကလုၢ်တီအသိးန့ၣ်, ယဟ့ၣ်ယတၢ်ဆိကမိၣ်လီၤ.”—မးသဲ ၁၉:၁၁; ၁ ကရံၣ်သူး ၇:၂၅.
တကးဒံးဘၣ် လံာ်စီဆှံပာ်ဖျါထီၣ်ဝဲ ခရံာ်ဖိအါဂၤလၢ အတီခိၣ်ရိၤမဲတၢ်လၢတၢ်မၢဖိအစိၤ ဃုာ်ဒီးတၢ်မၢဖိပ့းတရူးန့ၣ် အိၣ်ဒီးအမါလီၤ. (မးသဲ ၈:၁၄; မၢ်ကူး ၁:၂၉-၃၁; ၁ ကရံၣ်သူး ၉:၅) ဖဲန့ၣ်အဆၢကတီၢ် ခီဖျိလၢ တၢ်မၤကမၣ်မုၣ်ကမၣ်ခွါအိၣ်အါဝဲအဃိ စီၤပီလူးကွဲးဝဲလၢ ခရံာ်ဖိအပှၤကွၢ်တၢ်တဂၤ မ့ၢ်ဆီဟံၣ်ဆီဃီန့ၣ် အဝဲကဘၣ် “အိၣ်ဒီးအမါထဲတဂၤဧိၤ” ဒီး “လုၢ်ဒိၣ်ထီၣ်အဖိအလံၤ ဒ်သိးကအိၣ်ဒီးတၢ်စူၢ်အီၤ” အဂီၢ်လီၤ.—၁ တံၤမသ့း ၃:၂, ၄, ခ့ခါစှီၤကျိာ်.
ခရံာ်ဖိလၢညါလၢအတီခိၣ်ရိၤမဲတၢ်တဖၣ်အံၤ အိၣ်ဒီးအမါအဃိ အဝဲသ့ၣ်တဟးဆှဲးတၢ်မံဃုာ်လိာ်သးဘၣ်. မ့ၢ်လၢလံာ်စီဆှံဟ့ၣ်သဆၣ်ထီၣ်ဝၤတဖၣ်လၢ က “မၤတၢ်ကြၢးဒီးအမါ” လၢအအဲၣ်ဒိးစံးဝဲ တၢ်မံဃုာ်န့ၣ်လီၤ. (၁ ကရံၣ်သူး ၇:၃-၅) လၢတၢ်န့ၣ်အဃိ ပထံၣ်ဘၣ်လၢကစၢ်ယွၤတပာ်လီၤဝဲ တၢ်သိၣ်တၢ်သီလၢ ခရံာ်ဖိလၢအတီခိၣ်ရိၤမဲတၢ်တဖၣ် ကဘၣ်အိၣ်သဘျ့အဂီၢ်န့ၣ်ဘၣ်.
တၢ်အိၣ်သဘျ့လၢ ဘီမုၢ်တၢ်သးခုကစီၣ်အဂီၢ်
ကစၢ်ယွၤမ့ၢ်တပာ်လီၤတၢ်သိၣ်တၢ်သီ လၢပကဘၣ်အိၣ်သဘျ့ဘၣ်န့ၣ် ဘၣ်မနုၤအဃိ ယ့ၣ်ၡူးဒီးစီၤပီလူး တဲဝဲလၢတၢ်အိၣ်သဘျ့န့ၣ် အိၣ်ဒီးအဘျုးလဲၣ်. ခီဖျိလၢ ပှၤလၢအအိၣ်သဘျ့တဖၣ်န့ၣ် အိၣ်ဒီးတၢ်ခွဲးတၢ်ယာ်အါမးလၢ ကတဲဘၣ်ပှၤဂၤလၢ ဘီမုၢ်တၢ်သးခုကစီၣ်အဃိလီၤ. အဂၤတမံၤန့ၣ် မ့ၢ်လၢအဝဲသ့ၣ်တလိၣ်ဘၣ်ယိၣ်တၢ်လၢ အဖိအမါအဂီၢ်အဃိ အတၢ်ဆၢကတီၢ်အိၣ်အါန့ၢ်ဒံး ပှၤလၢအဆီဟံၣ်ဆီဃီတဖၣ်န့ၣ်လီၤ.—၁ ကရံၣ်သူး ၇:၃၂-၃၅.
ခဲအံၤပကဆိကမိၣ်ကွၢ် ဒ့ဘ့းအဂ့ၢ်အကျိၤလီၤ. ဒ့ဘ့းအိၣ်လၢကီၢ်မဲးကစံၣ်ကိၣ် ဒီးမၤတၢ်မၤဖဲန့ၣ်လီၤ. လၢခံအဝဲဟးထီၣ်လၢအတၢ်မၤ ဒီးလဲၤသုးလီၢ်သုးကျဲဆူ ကီၢ်ခီးစတၣ် ရံးကၣ် အလီၢ်ကဝီၤဒ်သိး ကတဲဘၣ်ပှၤဂၤဘၣ်ဃးဒီး ဘီမုၢ်တၢ်သးခုကစီၣ်အဂီၢ်လီၤ. မ့ၢ်အဝဲတူၢ်ဘၣ်ဝဲလၢ အတၢ်အိၣ်သဘျ့န့ၣ် ကဲဘျုးလၢအဂီၢ်ဧါ. ကဲဘျုးဝဲလီၤ. ဒီးအဝဲတဲဝဲလၢ “ခီဖျိလၢလုၢ်လၢ်ဒီးတၢ်အိၣ်သး လီၤဆီဝဲအဃိ တၢ်ကီတၢ်ခဲအိၣ်ဝဲစ့ၢ်ကီးလီၤ. ဘၣ်ဆၣ် မ့ၢ်လၢယအိၣ်သဘျ့ဒီး ယတဘၣ်လိၣ်ဘၣ်ယိၣ်တၢ်လၢ ယဖိယမါအဂီၢ်အဃိ ညီဝဲလၢယဂီၢ်ဖးဒိၣ်ညါ.”
ချီဒံၤယၤ မ့ၢ်ခရံာ်ဖိဒီပုၢ်ဝဲၢ်မုၣ်တဂၤလၢ အအိၣ်သဘျ့ဒီး အဝဲလဲၤသုးလီၢ်သုးကျဲဆူ တၢ်လီၢ်လၢပှၤလိၣ်ဘၣ် ပှၤစံၣ်တဲၤတဲလီၤတၢ်ဖိန့ၣ်လီၤ. အဝဲတဲဝဲလၢ– “ယမၤကစၢ်ယွၤအတၢ်မၤ ဖဲအံၤမုာ်ဒိၣ်မး. ဖဲယထံၣ်ဘၣ်လၢ ကစၢ်ယွၤအံးထွဲကွၢ်ထွဲယၤအခါ ယတၢ်နာ်ဒီး ယတၢ်ရ့လိာ်သးဒီးအီၤ ဂၢၢ်ကျၢၤထီၣ်ဝဲလီၤ.”
ချီဒံၤယၤ တဲဝဲလၢ “နမ့ၢ်ပှၤလၢအဆီဟံၣ်ဆီဃီမ့ၢ်ဂ့ၤ ပှၤအိၣ်သဘျ့မ့ၢ်ဂ့ၤ တမ့ၢ်တၢ်လၢအရ့ဒိၣ်ဝဲဘၣ်. နမ့ၢ်မၤယဟိဝၤယွၤအတၢ်မၤလၢ အဂ့ၤကတၢၢ်န့ၣ် နကဒိးန့ၢ်ဘၣ်တၢ်သးခုလီၤ.”
တၢ်အိၣ်သဘျ့န့ၣ် အဘျုးအိၣ်ဝဲလီၤ. ချီဒံၤယၤ တဲဝဲလၢ– “နမ့မ့ၢ်ပှၤလၢအဆီဟံၣ်ဆီဃီမ့ၢ်ဂ့ၤ ပှၤအိၣ်သဘျ့မ့ၢ်ဂ့ၤ တမ့ၢ်တၢ်လၢအရ့ဒိၣ်ဝဲဘၣ်. နမ့ၢ်မၤယဟိဝၤယွၤအတၢ်မၤလၢ အဂ့ၤကတၢၢ်န့ၣ် နကဒိးန့ၢ်ဘၣ်တၢ်သးခုလီၤ.”—စံးထီၣ်ပတြၢၤ ၁၁၉:၁, ၂.
You May Also Like
တၢ်သံကွၢ်လၢ ညီနုၢ်ပှၤသံကွၢ်တဖၣ်
ဘၣ်ဃးဒီး တၢ်ပာ်တၢ်အဲၣ်တီန့ၣ် ယဟိဝၤပှၤအုၣ်အသးတဖၣ် အိၣ်ဒီးတၢ်သိၣ်တၢ်သီဒ်လဲၣ်
တၢ်ပာ်တၢ်အဲၣ်တီန့ၣ် မ့ၢ်တၢ်ဂဲၤလိာ်ကွဲ တခါဧါ မ့တမ့ၢ် မ့ၢ်တၢ်လၢအရ့ဒိၣ်ဧါ
