NTU A DIAMBU WA FUKWA | AMBASI—NGA BENA KIELEKA?
Nga Vena ye Mbasi Zambi?
Elo, vena ye mbasi zambi. Akweyi batuka? Sungamena dio vo Nzambi wasema ambasi yo nswa wakuyisolela. Vava Nzambi kasema nkento yo yakala diantete, Adami yo Eva, ke vavioka kolo kiayingi ko, mbasi mosi wasadila nsw’andi wa kuyisolela mu mpila yambi muna yantika fu kia kolama ova nza. Wavukumuna Adami yo Eva muna kolamena Nzambi. (Etuku 3:1-7; Lusengomono 12:9) Nkand’a Nzambi ke uyikanga nkumbu a mbasi ndioyo ko, ngatu buka kina kakala kuna zulu vitila kakolama. Vava kakolama, Nkand’a Nzambi wanyikila vo Satana, nkumbu ina ye nsasa vo “Mbeni” ye Nkadi ampemba ina ye nsasa vo “Nkumbi.”—Matai 4:8-11.
Diankenda vo e fu kia kolamena Nzambi ke kiasukila vavana ko. Muna lumbu ya Noa, mbasi zalembi tangakana, “bayambula e kalu yau” muna kanda dia Nzambi kuna zulu. Bakulumuka va ntoto yo vuata nitu za wantu muna kuyivana muna mavangu ma safu ye ma zumba, bavengomoka muna kani dina bavangilwa.—Yuda 6; Etuku 6:1-4; 1 Petelo 3:19, 20.
Adieyi diabwila mbasi zazi? Vava Nzambi katwasa kizalu muna velelesa ntoto, basisa nitu zau yo kituka diaka se vangwa ya mianda. Kansi, Nzambi kayambula ko vo mbasi zazi z’akolami bavutukila “fulu kiau.” Wabasia muna “tombe [kia kimwanda]” kiyikilwanga vo Tarataru. (Yuda 6; 2 Petelo 2:4) E nkuya miami bakisia muna wisa kia Satana wa Nkadi ampemba, “wa mfumu a nkuya” ona “okuyikitulanga se mbasi a ntemo.”—Matai 12:24; 2 Korinto 11:14.
Nkand’a Nzambi ulonganga vo Kintinu kia Masia kia Nzambi, i sia vo luyalu lwa zulu lwayadikwa muna mvu wa 1914. * Tuka muna ntangwa yayina, Satana ye nkuya miandi bakulwa kuna zulu yo vetwa ova ntoto. O umpumbulu ye mavangu ma zumba mawokele ova nza, i ziku kia makasi yo umpukumuni wa Satana ye nkuya miandi.—Lusengomono 12:9-12.
Kansi, o wokela kwa mavangu ma usafu yo nsoki kusonganga vo e mbaninu a luyalu lwau ifinamene. Ke kolo ko e vangwa yayi ya mianda ya nsoki bekangama. Vava Kintinu kia Nzambi kiyala 1.000 dia mvu muna paradiso ova ntoto, e vangwa yayi yambi ya mianda betonta wantu muna lutonto lwansuka mu fikolo. I bosi, befwaswa emvimba.—Matai 25:41; Lusengomono 20:1-3, 7-10.
^ tini. 6 Muna zaya diaka mayingi mu kuma kia Kintinu kia Nzambi, tala kapu kia 8 kia nkanda, O Nkand’a Nzambi Adieyi Kieleka Kelonganga? wavaikiswa kwa Mbangi za Yave. Una mpe muna nzil’eto ya Internet www.ps8318.com.
