Yuvu Y’atangi Eto . . .

Ekuma Mbangi za Yave Besilanga Umbangi mu nzo ke nzo?

▪ Muna Nkand’a Nzambi, tusololanga nkanikinu kavana Yesu kw’alandi andi vo: “Dianu vo nwenda, nwakitula wantu a zula yawonso s’alongoki, . . . nwabalonga.” (Matai 28:19, 20) Nga Akristu awonso bafwete lungisa nkanikinu wau? Alongoki antete a Yesu i wau bayindulanga. Kasikil’owu, Petelo wa ntumwa wavova vo: “[Yesu] watukanikina twatelekela nkangu, yo sila wo umbangi.” (Mavangu 10:42) Paulu wa ntumwa wasoneka mpe vo: “Ku mfunka nsilu, kadi tâtu kwa mono, ovo ndembi samun’e nsangu zambote.”—1 Korinto 9:16.

Ke Paulu yo Petelo kaka ko balungisa nkanikinu a Yesu, kansi mpe y’Akristu awonso a tandu kiantete. Kuna kwa yau e salu kia umbangi i salu kiasunda o mfunu. (Mavangu 5:28-32, 41, 42) O unu, Mbangi za Yave besianga ngolo za tanginina mbandu au. Belonganga nsangu zau azimosi ye zina kalonga o Yesu, i sia vo, nsangu za “kintinu ki’ezulu.”—Matai 10:7.

E nsangu za Kintinu kwa nani zifwete samunwa? Yesu wavova vo zifwete samunwa kwa wantu awonso muna fulu yawonso. Wavovesa alongoki andi vo: “Oyeno mpe nukala mbangi zame . . . yo kuna nsuk’a nza.” (Mavangu 1:8) Wasakula nkutu vo “e nsangu zazi zambote za kintinu zisamunwa muna nza yawonso, muna umbangi” vitila e mbaninu a tandu kiaki yiza. (Matai 24:14) Muna lungisa o nkanikinu wau, Akristu a tandu kiantete basianga e ngolo za vovana yo wantu awonso, ke kw’awana bakulukiana kaka ko yovo awana ke basambilanga ko. (Kolosai 1:23; 1 Timoteo 2:3, 4) Diau adimosi mpe o unu, Mbangi za Yave besianga e ngolo za mokena ye konso muntu. *

Ayeyi i mpila yambote isadilwanga mu sayanesa nsangu zambote za Kintinu? Yesu ona wazaya una tulenda sila umbangi kwa wantu ayingi, watuma alongoki andi muna mavata, mbanza ye muna nzo za wantu. (Matai 10:7, 11, 12) Vava Yesu kafwa yo fuluka, alongoki andi bakwamanana sila umbangi ‘mu nzo ye nzo.’ (Mavangu 5:42) Nze una kavanga Yesu, basilanga mpe umbangi konso fulu bawananga wantu ye muna mazandu. (Yoane 4:7-26; 18:20; Mavangu 17:17) O unu, Mbangi za Yave ndekwa zazi besadilanga mu sila umbangi kwa wantu awonso.

Yesu wavova vo ke wantu awonso ko betambulwila. (Matai 10:14; 24:37-39) Nga ediadi difwete sima Akristu mu sila umbangi? Badika e nona eki: Yindula vo mu buka wina ki’awana bevuluzanga wantu babwidilu sumbula kia nzakam’a ntoto, nga oyambula vava wantu wau vo akete kaka osolwele? Ve, ozindalala wo vanga ye vuvu kia vuluza diaka kana nkutu muntu mosi. Yesu wakanikina alongoki andi bazindalala sila umbangi ye vuvu kia solola awana balenda yangalela nsangu zambote mu kuma kia Kintinu kia Nzambi. (Matai 10:23; 1 Timoteo 4:16) Vava besilanga umbangi mu nzo ye nzo mu solola wantu awaya, Mbangi za Yave besonganga zola muna Nzambi ye mfinangani zau, ana balenda vuluzwa avo bawilu yo tambulwila nsangu za Kintinu.—Matai 22:37-39; 2 Tesalonika 1:8.

Eyingidilu diadi otanganga dina ye nsangu za Nkand’a Nzambi. Muna zaya diaka mambu makaka, vanga luzolo lwa mokena ye Mbangi za Yave vava bekukingula yovo kubasonekena.

[Mvovo Vana Yand’a lukaya]