FINAMA NZAMBI
‘Yave, Nzambi . . . Awana Bena Moyo’
Nga lufwa lusundidi Nzambi? Ve kikilu. Aweyi lufwa yovo ‘mbeni’ akaka kalenda sundila “Nzambi wa Mpungu-ngolo”? (1 Korinto 15:26; Luvaiku 6:3) Nzambi ovwidi nkuma wasukisa lufwa. Osadila lufuluku muna sukisa lufwa. Osianga nsilu vo ovanga wo muna nz’andi ampa. * Nga nsilu wau waludi? O Yesu wa Mwan’a Nzambi wayika mvovo milenda kutuvana e vuvu.—Tanga Matai 22:31, 32.
Muna moko kiandi yo Asaduki ana ke bakwikilanga muna lufuluku ko, Yesu wavova: ‘Vo i lufuluku lua mafwa, ke nwatanga dio ko, dina nwavoveswa kwa Nzambi? Ovo, omono i Nzambi a Abarayama, i Nzambi a Isaki, i Nzambi a Yakobo. O Nzambi ke Nzambi a mafwa ko, wa awana bena moyo kaka.’ Muna sono kiaki, Yesu wayika e moko kina Mose kakala kiau yo Nzambi vana nti walemanga muna mvu wa 1514 V.T.K. (Luvaiku 3:1-6) Kuna kwa Yesu, e mvovo mia Yave kwa Mose vo “omono i Nzambi a Abarayama, i Nzambi a Isaki, i Nzambi a Yakobo,” misonganga vo nsilu a lufuluku ulungana kikilu. Mu nkia mpila?
Vava Yave kavovana yo Mose, o Abarayama wa nkulu andi, Isaki yo Yakobo bakifwila kala, Abarayama wafwa se vioka mvu 329, Isaki mvu 224 o Yakobo mvu 197. Kana una vo i wau, Yave wavova vo: “Omono i Nzambi” au, kavova ko vo “Omono yakala se Nzambi” au. Yave wayika akulu awaya atatu nze yau bakala moyo. Ekuma?
Yesu wavova vo: ‘O [Yave] ke Nzambi a mafwa ko, wa awana bena moyo kaka.’ Badika e nsasa a mvovo miami. Kele vo ke vakadi lufuluku ko, Abarayama, Isaki yo Yakobo, badi kala kaka bafwa. Yave wadi kala se Nzambi a mafwa. Ediadi diadi songa vo o lufwa lusundidi Yave o nkuma, nze yandi kena ye nkuma ko mu vevola selo yandi muna lufwa.
Adieyi tuvova mu kuma kia Abarayama, Isaki, Yakobo ye selo yawonso ya kwikizi ya Yave ana bafwa? Yesu wavova vo: ‘Kuna kwa yandi awonso bena moyo.’ (Luka 20:38) Kieleka, ekani dia Yave dia fula selo yandi ana bafwa dilungana kikilu, kadi okubabadikilanga nze yau bena moyo. (Roma 4:16, 17) Yave olundanga awonso awaya muna nyindu andi alunga yavana kifwana e ntangwa yakubafula.
Yave osundidi kikilu lufwa o nkuma
Nga ke diakiese ko diavutuka diaka zinga kumosi ye azolw’eto afwa? Ka vena diambu ko dilenda sima Nzambi mu lungisa o nsilu andi wa fula mafwa. Ekuma olembi longokela mayingi mu kuma kia nsilu wa lufuluku ye Nzambi ndiona olungisa nsilu wau? Avo ovangidi wo, olenda finama Yave wa ‘Nzambi . . . awana bena moyo.
^ tini. 3 Muna zaya diaka mambu makaka mu kuma kia nsilu a Nzambi wa lufuluku muna nz’ampa yansongi, tala kapu kia 7 kia nkanda, O Nkand’a Nzambi Adieyi Kieleka Kelonganga? wavaikiswa kwa Mbangi za Yave.
