FINAMA NZAMBI
“Yave Wanuyambulwila”
“Ndiona olembi lolokanga akaka, obwisanga e kiamvu kina yandi kibeni kafwete saukila.” E mvovo miami mia Edward Herbert ona wazinga mu tandu kia 17, misonganga o mfunu waloloka akaka. Konso ntangwa, yeto mpe tuvavanga vo akaka batuloloka. (Matai 7:12) Kansi, tuna ye kuma kiakaka kiampwena muna loloka akaka. Badika mvovo mia Paulu wa ntumwa muna Kolosai 3:13.—Tanga.
Wau vo tw’asumuki, tulenda vanga diambu dilenda kendeleka akaka, yau mpe balenda kutuvanga diau adimosi. (Roma 3:23) Aweyi tulenda zingila yo luvuvamu ye akw’eto asumuki? Paulu wavumunwina kwa Nzambi muna kutuwondelela vo twalolokanga yo yambulwila akaka. O unu, luludiku lwalu mfunu lwina nze una lwakala muna ntangwa lwasonama se vioka mafunda mole ma mvu. Yambula twatoma fimpa e mvovo mia Paulu.
“Nuvezananga mambu.” Muna Kingerekia, o mvovo “vezana” usongele vo yambulwila. Nkanda umosi uvovanga vo Akristu besonganga fu kiaki muna “zizidila wantu bena ye fu ina bemenganga.” O mvovo ‘muntu yo nkw’andi’ usonganga vo tufwete lolokaziananga. Avo tusungamene vo yeto mpe tuna ye fu ilenda fungisa akaka makasi, ke tuyambula ko vo e fu ya wantu akaka ina tumenganga yakatula luvuvamu vana kati kweto. Adieyi tuvova avo muntu utuvangidi vilwa?
“Yambuziana.” Nkwa ngangu mosi wavova vo, muna Kingerekia o mvovo “yambuziana” usongele vo “loloka ye nsi a ntima wawonso.” Nkanda umosi wavova vo, o mvovo yambuziana ulenda sasilwa vo “songa edienga.” Tusonganga e ngemba vava tulolokanga akaka kana nkutu vo tuna ye kuma kia funga makasi. Ekuma tufwete wo vangila? E kuma kadi yeto mpe konso lumbu tuvava vo ndiona utufungisi makasi katuloloka avo mbi tumvangidi.
‘Wauna kanuyambulwila o Yave, i una mpe nuyambulwila.’ Wau vo Yave oyambulwilanga o bi weto, e kiaki i kuma kiampwena tufwete lolokelanga akaka. (Mika 7:18) Yindula edienga kesonganga Yave muna loloka asumuki ana bevilukanga o ntima. Nswaswani yo yeto, Yave kesumukanga ko. Kansi, kuna mvevo wawonso Yave ololokanga emvimba masumu meto, kana una vo kavwidi mfunu walolokwa ko. Dialudi, Yave i mbandu ampwena kadi ololokanga awonso bevilukanga o ntima.
Yave i mbandu ampwena kadi ololokanga awonso bevilukanga o ntima
E nkenda za Yave zikututuntanga kwa yandi yo kutufila muna kuntanginina. (Efeso 4:32–5:1) Muna kuma kiaki, diambote twakiyuvula: ‘Wau vo Yave kuna mvevo wawonso okundolokanga, ekuma ilembi lolokela awana bekumpanganga e mbi?’—Luka 17:3, 4.
Ntangilu a Nkand’a Nzambi mu Ngonde ya Okutoba