Ke Kolo ko e Mpasi Zawonso Zifokoka!
Yindula vo mu nza yakondwa umpumbulu, vita, mayela ye sumbula ozingilanga. Yindula vo lumbu yawonso osikamanga yovo lumuka lembi tokana mu kuma kia nzimbu, fu kia sia mpambula yovo lubangamu. Nga mambu mama malenda vangama? Dialudi vo, ke vena muntu ko yovo nkubika ya wantu ilenda lungisa mawonso mama. Kansi, Nzambi osianga nsilu vo ofokola mpasi zawonso, kumosi ye mana mayikilu muna elongi diantete. Tala e nsilu mia Nzambi miyikwanga muna Nkand’a Nzambi:
LUYALU LWAMBOTE
“O Nzambi ezulu otongeka kintinu, kina ke kibangalakeswa ko yakwele mvu, ngatu vingilwa untinu wandi kwa nkangu akaka; kansi kikosomona yo sukisa yintinu yayi yawonso, kitongama mpe yakwele mvu.”—Daniele 2:44.
E Kintinu kia Nzambi i luyalu lw’ezulu. O Yesu Kristu ona wasolwa se Ntinu a Kintinu kiaki, ofwasa tuyalu twawonso twa nza. Ovanga mawonso kimana luzolo lwa Nzambi lwavangama va ntoto nze kun’ezulu. (Matai 6:9, 10) E Kintinu kiaki ke kivingilwa kwa luyalu lwakaka ko, kadi i “kintinu kia mvu ya mvu kia Mfumu eto wa Mvuluzi Yesu Kristu.” O luvuvamu lukala ova ntoto yakwele mvu.—2 Petelo 1:11.
NSAMBIL’ALUVUNU IFOKOKA
“O Satana yandi kibeni, okukitulanga se mbasi a ntemo. Dianu vo, ediadi ke dianene ko, ovo selo yandi yayikitula nze selo ya ndungidi, e mbaninu au, kontwa kwa mavangu mau.”—2 Korinto 11:14, 15.
E nsambil’aluvunu ifwaswa wau vo dimosi muna mavangu ma Nkadi ampemba. O umpukumuni wa mabundu ye fu kia bungula menga muna nkumbu a dibundu kifokoka. Awonso bezolanga “Nzambi amoyo ye ludi” besambila Nzambi yo “lukwikilu lumosi” “muna mwanda ye ludi.” Ediadi ditwasa luvuvamu yo ungudi.—1 Tesalonika 1:9; Efeso 4:5; Yoane 4:23.
USUMUKI UFOKOKA
“Nzambi yandi kibeni okala yau, kakunguna mansanga mawonso muna meso mau, o lufwa, ke lukala diaka ko, musungula kala diaka dilu, yovo kazu, ngatu mpasi: oma mantete maviokele.”—Lusengomono 21:3, 4.
Yave wa Nzambi olungisa nsilu wau muna sadila Mwan’andi Yesu ona watambika moyo andi muna wete dia wantu awonso. (Yoane 3:16) Muna Kintinu kia Yesu, wantu bekituka se alunga. Mu nza ke mukala diaka mpasi ko, e kuma kadi ‘Nzambi yandi kibeni okala yo wantu’ ye ‘okunguna mansanga mawonso muna meso mau.’ O usumuki wa wantu ye mpasi ke zikala diaka ko, “asongi bevwa nza, besikila vo yakwele mvu.”—Nkunga 37:29.
MIANDA MIAMBI KE MIKALA DIAKA KO
“[Yesu Kristu] obakidi ngobodi, o niok’ankulu, una vo, Nkadi ampemba, wa Satana, unkangidi ezunda dia mvu, untubidi muna mbilu, unzikididi mûna, yo sia dimbu, kàtungianisa diak’e zula.”—Lusengomono 20:2, 3.
O umpukumuni wa Satana ufokoka vava kekangwa ye nkuya miandi yo tubwa “muna mbilu.” Ke bevukumuna diaka wantu ko. Ekwe luvevoko lukala omu nza kondwa kwa umpukumuni wa Satana ye mianda miambi!
E “LUMBU YAMBANINU” IFOKOKA
E “lumbu yambaninu” ya za yayi ya Satana ifokoka muna vita ya Armangedo. Yesu wavova vo: “Kadi muna yau ntangwa ina mukala mpasi zingi zina vo ke zakala ko, tuka kuna lubantiku lua nza yamu wau, ngatu kala nkutu.”—Matai 24:21.
Mana mevangama muna kolo kia mpasi zayingi ke mateka vangama nkutu ko. O mambu mama mefokoka muna “vit’a lumbu kianene kia Nzambi wa Mpungu-ngolo” iyikilwanga vo “Armangedo.”—Lusengomono 16:14, 16.
Wantu awonso bezolanga unsongi, besutilanga mona e mfoko a nza yayi yambi. Tala nsambu bevwa awana beyalwa muna Kintinu kia Nzambi:
NZAMBI OSINGA VANGA MAMBU MAYINGI
“Ndong’ayingi” izingila muna nz’ampa: Nkand’a Nzambi uvovanga vo “ndong’ayingi” ivuluzwa muna “mpasi zayingi” yo zingila muna nz’ampa ya unsongi. (Lusengomono 7:9, 10, 14; 2 Petelo 3:13) Bevana nkembo kwa Yesu Kristu ona una vo i “Mwan’ememe a Nzambi, on’okatul’esumu dia nza.”—Yoane 1:29.
Nluta mituka muna malongi ma Nzambi: Muna nz’ampa, “e nza izala yo zayi wa Yave.” (Yesaya 11:9) O zayi wa Nzambi usadisa wantu mu zaya una balenda zingila ye akw’au kuna luvuvamu. Nzambi osianga nsilu vo: “Omono i Yave wa Nzambi aku, on’okulong’oma ma mfunu, yo kufila muna nzila in’ofwete kwenda.”—Yesaya 48:17.
Azolw’eto ana bafwa befulwa: Vava kakala ova ntoto, Yesu wafula Lazaro wa nkundi andi. (Yoane 11:1, 5, 38-44) Ediadi, diakala se kini kia mana Yesu kesinga vanga kuna sentu vava ke yala e nza muna Kintinu kia Nzambi.—Yoane 5:28, 29.
Luvuvamu yo unsongi ukala ova ntoto: Muna Kintinu kia Kristu, umpumbulu ke ukala diaka ko. Aweyi tuzayidi wo? Wau vo Yesu olenda mona mana mena muna ntima mia wantu, osadila ngangu zazi muna fundisa ansongi ye yimpumbulu. Awana bekwamanananga muna mavangu mau mambi, ke bekota ko muna nz’ampa ya Nzambi.—Nkunga 37:9, 10; Yesaya 11:3, 4; 65:20; Matai 9:4.
Ungunza wakete kaka tubadikidi muna ulolo wa ungunza wasakulwa muna Nkand’a Nzambi ulungana kuna sentu. Vava Kintinu kia Nzambi kiyala o ntoto, o wantu “beyangalela muna mawete mayingi” yo luvuvamu. (Nkunga 37:11, 29) Mambu mawonso metwasanga e mpasi ye ntantu kwa wantu, mefokoka. Tuna ye ziku vo mawonso mama melungana, kadi Nzambi wasia nsilu vo: ‘Tala, mvanga lekwa yawonso se yampa. . . . Kadi mambu mama makwikizi ye ludi.’—Lusengomono 21:5.
© Silke Woweries/Corbis
