Kuna kwa Esi Roma 7:1-25
7 Ampangi, nga ke nuzeye wo ko vo (kw’awana bazeye nsiku mpovele) o Nsiku ukalanga ye wisa muna muntu ekolo kena o moyo e?
2 Muna bong’e nona, o nkento wakazala wakangama yo nkaz’andi muna Nsiku ekolo nkaz’andi kena o moyo; kansi avo nkaz’andi ofwidi, o nkento ovevokele muna nsiku a nkaz’andi.+
3 Kadi ekolo nkaz’andi kena o moyo, muntá zumba keyikilwa avo osompelo kwa yakala diankaka.+ Kansi avo nkaz’andi ofwidi, o nkento ovevokele muna nsiku a nkaz’andi, ke yikilwa muntá zumba ko avo osompelo kwa yakala diankaka.+
4 Dianu vo, e mpangi zame, oyeno mpe nuafwa muna Nsiku muna nitu a Kristu, kimana nuavuwa kwa muntu ankaka,+ ona wafulwa muna mafwa,+ kimana twawutila Nzambi e mbongo.+
5 Kadi vava twazingilanga mun’owu wa nitu, e zolela ya sumu ina yasengomonua kwa Nsiku yasalanga mu nitu zeto* kimana twayima mbongo a lufwa.+
6 Kansi owau tuvevuelo muna Nsiku,+ kadi twafwa muna Nsiku watusimba, kimana twakala se ntaudi mun’owu wa mwanda,+ ke mun’owu wa nsiku ankulu ko una wasonama.+
7 Ozevo, adieyi tuvova? Nga Nsiku i sumu e? Ke wau ko! Kieleka, kiadi zaya sumu ko kele vo ke vakadi Nsiku ko.+ Muna bong’e nona, kiadi zaya loko ko kele vo Nsiku ke uvovi ko vo: “Kulokokela ko.”+
8 Kansi muna kuma kia nkanikinu, e sumu dibakidi e lau dia wuta e loko dia mpila zawonso omu mono, kadi kondwa kwa nsiku, e sumu diafwa diakala.+
9 Una nsiku ke wayizidi ko moyo yakala. Kansi vava kiayiza o nkanikinu, e sumu mpe diayiza, vo i mono, mfwidi.+
10 O nkanikinu wakala ye kani dia kumpana moyo,+ wampana lufwa.
11 Kadi, muna kuma kia nkanikinu, e sumu dibakidi e lau dia kumpunginika yo kumponda.
12 O Nsiku wavelela, o nkanikinu mpe wavelela, wansongi ye wambote.+
13 Ozevo, nga diambu diambote dintwasidi lufwa? Ke wau ko! Kieleka, sumu dintwasidi o lufwa, kimana diamoneka kaka vo sumu, wau dintwasidi lufwa muna diambu diambote,+ kimana vo nkanikinu wasonga vo e sumu diambi kikilu.+
14 Kadi tuzeye wo vo o Nsiku wa kimwanda, kansi omono i muntu a kinitu, yatekwa muna sumu.+
15 Kadi kibakulanga e kuma ivangilanga e diambu diadi ko. Kadi dina nzolele, ke diau ko ivanganga, dina kizolele ko i diau ivanganga.
16 Kansi, avo dina kizolele ko i diau ivanganga, nkwikidi vo Nsiku wambote.
17 Kansi owau, ke mono ko ivanganga wo, kansi i sumu dina dikalanga omu mono.+
18 Kadi nzeye wo vo omu mono, i sia vo, mu nitu ame, ke muna edi diambote ko; kadi ngina ye tima dia vanga edi diambote, kansi kina ye ngolo za vanga dio ko.+
19 Kadi edi diambote nzolele, kivanganga dio ko, kansi edi diambi kizolele ko, i diau ivanganga.
20 Ozevo, avo mvangidi dina kizolele ko, ke mono kwame ko mvangidi dio, kansi i sumu dina dikalanga omu mono.
21 Dianu vo, nsolwele nsiku owu kwa mono: Avo nzolele vanga edi diambote, edi diambi dina yame.+
22 Ngiangalele kikilu o nsiku a Nzambi muna kiwuntu kiame kiakati,+
23 kansi mbwene nsiku wankaka muna nitu ame,* unuanisanga nsiku una muna nyindu ame+ yo kumfila muna ubundu wa nsiku a sumu+ una omu nitu ame.*
24 Ekwe mono fwafwala kia muntu! Nani okumpuluza muna nitu yayi ikumfilanga muna lufwa?
25 Ntondele Nzambi muna Yesu Kristu wa Mfumu eto! Kadi muna nyindu ame i ntaudi a nsiku a Nzambi, kansi muna nitu, i ntaudi a nsiku a sumu.+
Mvovo vana yand'a lukaya
^ Mvovo wa sina: “yîkwa yeto.”
^ Mvovo wa sina: “yîkwa yame.”
^ Mvovo wa sina: “yîkwa yame.”