Kuna kwa Esi Roma 8:1-39
8 Ozevo, awana bena e ntwadi yo Kristu Yesu ke bena ye ngielele ko.
2 Kadi o nsiku a mwanda una uvanang’o moyo muna Kristu Yesu, unuvevuele+ muna nsiku a sumu yo lufwa.
3 Dina ke dialenda vangama ko muna Nsiku+ mu kuma kia lutovoko+ lwa nitu, Nzambi wavanga dio wau kafila Mwan’andi+ muna mpw’a muntu a sumuka,+ kimana kakatula e sumu. Muna mpila yayi, oyelesanga e sumu muna nitu,
4 kimana e nkanikinu miansongi mia Nsiku mialunganena muna yeto+ tukangalelanga mun’owu wa mwanda, ke mun’owu wa nitu ko.+
5 Kadi awana bezingilanga mun’owu wa zolela ya nitu, mambu ma nitu beyindulanga,+ kansi awana bezingilanga mun’owu wa mwanda, mambu ma mwanda beyindulanga.+
6 Kadi o sia e ngindu muna zolela ya nitu, i lufwa,+ kansi o sia e ngindu muna mwanda, i moyo ye luvuvamu;+
7 kadi o sia e ngindu muna zolela ya nitu, i kitantu yo Nzambi,+ e kuma kadi, e nitu ke ilemvokelanga nsiku a Nzambi ko, ke ilendi wo vanga nkutu ko.
8 Dianu vo, awana bezingilanga mun’owu wa zolela ya nitu ke balendi yangidika Nzambi ko.
9 Kansi, avo mwand’a Nzambi+ una omu yeno, ke nuzingila mun’owu wa nitu ko, mun’owu wa mwanda kaka. Kansi avo muntu kena yo mwand’a Kristu ko, kavuilu kwa yandi ko.
10 Avo Kristu una yeno e ntwadi,+ e nitu ifwidi mu kuma kia sumu, kansi o mwanda i moyo muna diambu dia unsongi.
11 Avo mwanda wa ndiona wafula Yesu muna mafwa una omu yeno, ona wafula Kristu Yesu muna mafwa,+ muna mwand’andi una ukalanga omu yeno ovana mpe o moyo+ mu nitu zeno zina zifwanga.
12 Dianu vo ampangi, ke tufwete yambula ko vo e nitu eto yatuyala yo vanga e zolela yandi;+
13 kadi avo nuzingila mun’owu wa nitu, fwa nufwa; kansi avo muna lusadisu lwa mwanda nuyambwidi emvimba mavangu ma nitu,+ nukala o moyo.+
14 Kadi awonso befilwanga kwa mwand’a Nzambi, wan’a Nzambi kikilu.+
15 Kadi ke nutambwidi mwand’a ubundu ko una umwesanga diaka o wonga, kansi mwand’a Nzambi kaka nutambwidi una unukitwidi se wan’andi, muna mwanda wau i tukazidi vo: “Aba,* e Tata!”+
16 O mwanda wau kibeni, usianga umbangi kumosi yo mwanda eto+ vo, tu wan’a Nzambi.+
17 Ozevo, avo tu wan’a Nzambi, vua mpe tutambula—e vua tutambula+ kwa Nzambi kumosi yo Kristu—avo tumona yandi e mpasi kumosi,+ ozevo, tukembeswa mpe kumosi.+
18 Edi mbakwidi vo e mpasi za kolo kiaki ke zilendi tezaneswa ko yo nkembo una usengomonua mu yeto.+
19 Kadi o nsema uvingilanga ye tima diawonso o lusengomoko lwa wan’a Nzambi.+
20 Kadi o nsema wasakidikwa muna zingu kia kondwa o mfunu,+ ke mu luzolo lwa nsema ko, kansi muna luzolo lwa ndiona wasakidika wo ye vuvu kia sia vo,
21 o nsema kibeni uvevolwa+ muna ubundu wa sumu ye lufwa yo vua luvevoko lwa nkembo a wan’a Nzambi.
22 Kadi tuzeye wo vo o nsema wawonso ubumanga yo mona mpasi kumosi yamu wau.
23 Ke diadi kaka ko, yeto kibeni mpe tuna ye ntomoni,* i sia vo, mwanda, elo, oyeto tubumanga muna nsi a ntima+ ekolo tuvingilanga ye tima diawonso e ntangwa tukitulwa se wan’a Nzambi+ yo vevolwa muna nitu zeto muna lukûlu.
24 Kadi muna vuvu kiaki i twavuluzilwa; kansi e vuvu kina kimonekene, ke vuvu ko, kadi avo muntu omwene kina kesianga e vuvu, nga osia kio diak’e vuvu e?
25 Kansi avo tusidi e vuvu+ mu kina tulembele mona,+ tuvingila kio ye tima diawonso kuna luzindalalu.+
26 Diau dimosi mpe, o mwanda ukutusadisanga muna lutovoko lweto;+ kadi kana nkutu ke tuzeye ko dina tulomba muna sambu, o mwanda wau kibeni udodokelanga mu kuma kieto muna bumu ya nsi a ntima.*
27 Kansi ndiona ofimpanga e ntima+ ozeye kani dia mwanda, e kuma kadi mwanda udodokelanga mu kuma kia avauki mun’owu wa luzolo lwa Nzambi.
28 Tuzeye wo vo Nzambi ovanganga wawonso kimana e salu yandi yawonso yasala kumosi muna wete dia awana bezolanga Nzambi, ana babokelwa mun’owu wa kani diandi;+
29 e kuma kadi awana kateka songa e dienga, wateka kana mpe vo bakala se fwaniswa kia Mwan’andi,+ kimana kakala se mwan’antete+ vana vena mpangi zayingi.+
30 Awana kateka kana+ i yau mpe kabokela;+ ana kabokela i yau mpe kalungisa.+ Vo i awana kalungisa i yau mpe kakembesa.+
31 Ozevo, adieyi tuvova mu kuma kia mambu mama? Avo Nzambi una yeto, nani okututelamena?+
32 Wau vo kavukisa nkutu Mwan’andi ko, kansi wamvana mu kuma kia yeto awonso,+ nga kalendi ko kumosi yo mwan’andi kutuvanina e lekwa yawonso kuna mvevo e?
33 Nani ofunda awana basolwa kwa Nzambi?+ O Nzambi i yandi okubalungisanga.+
34 Nani okubayelesa? Kristu Yesu ona wafwa, kansi wafulwa, ona wina kuna koko kwalunene kwa Nzambi,+ yandi mpe ododokelanga mu kuma kieto.+
35 Nani okutuvambula muna zola kwa Kristu?+ Nga mpasi, yovo lukendalalu, yovo lubangamu, yovo nzala, yovo nkonga, yovo vonza yovo nsosolo e?+
36 Wauna wasonama vo: “Kadi muna kuma kiaku tuvondelwanga ntangwa zawonso; tubadikilwanga nze mameme mevondwa.”+
37 Kansi, muna lusadisu lwa ndiona watuzola i tusundilanga+ mambu mama mawonso.
38 Kadi ntomene wo zaya vo ke lufwa ko, yovo moyo, yovo ambasi, yovo ayadi, yovo lekwa ina owau, yovo ina ikwiza, yovo nkuma,+
39 yovo lá, yovo sina ngatu konso nsema ulenda kutuvambula muna zola kwa Nzambi kuna muna Kristu Yesu wa Mfumu eto.
Mvovo vana yand'a lukaya
^ I mvovo wa Kiyibere yovo wa Ki-aramiti una ye nsasa vo “E Tata!”
^ I sia vo, bundu yantete.
^ Yovo “yalembi vovakana.”
