TANGA konso zulunalu, yovo tala televizau yo wunikina radio, mwawonso mwazala ye nsangu za nsoki, vita ye umpumbulu. Vena mpe ye mambu otokanenanga ma ngeye kibeni. Nanga kimbevo yovo lufwa lwa nzolw’aku. Kieleka, olenda vova nze una kavova Yobi, ‘nzadidi ye mpasi.’ —Yobi 10:15.

Ukiyuvula:

• Nga diadi i kani dia Nzambi kwa mono ye kw’akaka?

• Akweyi ndenda sololwela lusadisu mu sunda mpasi zame?

• Nga vena ye vuvu vo tusinga mona luvuvamu ova ntoto?

Nkand’a Nzambi uvananga mvutu zasikila za yuvu yayi.

‘Okunguna mansanga mawonso muna meso mau; o lufwa, ke lukala diaka ko; musungula kala diaka dilu, yovo kazu, ngatu mpasi.’—Lusengomono 21:4

‘O mbevo a malu olemoka nze mvudi.’—Yeseya 35:6

“O meso ma mpofo metemoka.”—Yesaya 35:5

‘Awonso bena muna ziami . . . bevaika.’—Yoane 5:28, 29

“O ntungi kevova ko vo, Yela nyela.”—Yesaya 33:24

“O ulolo wa masa ukala muna nsi.”—Nkunga 72:16

Kuyindudi ko vo mana mayikilu ke melungana ko. Nzambi wasia nsilu wa vanga mambu mama. Nkand’a Nzambi usonganga e mpila kevangila mo.

Nkand’a Nzambi mayingi kelonganga, ke mama kaka ko. Ulonganga mpe una olenda vwila e zingu kiakiese owau. Yindula mpasi ye mambu mekutokanesanga. Kondwa nzimbu, mpasi za zingu kia nzo, mayela yovo lufwa lwa nzolw’aku. Nkand’a Nzambi ulenda kusadisa mu zizidila e mpasi zazi owau. Uvananga mvutu zasikila za yuvu eyi ilende:

• Ekuma tumwenanga mpasi?

• Aweyi tulenda sundila e mpasi za zingu?

• Aweyi tulenda kitulwila e zingu kia nzo se kiakiese?

• Adieyi dikutubwilanga vava tufwanga?

• Nga tumona diaka azolwa eto afwa?

• Aweyi tulenda kadila ye ziku vo Nzambi olungisa nsilu miandi?

 Wau vo oyantikidi tanga nkanda wau, disongele vo ozolele zaya mana kelonganga Nkand’a Nzambi. O nkanda wau ukusadisa. Kuna nsuka lukaya kuna ye yuvu ya konso tini. Ndonga beyangalelanga elongi dia yuvu ye mvutu besadilanga Mbangi za Yave vava belongokanga Nkand’a Nzambi yo wantu. Tuna ye vuvu vo ongeye mpe oyangalela dio. Yambula Yave kasambula luzolo lwaku lwa zaya mana kieleka kelonganga o Nkand’a Nzambi.