Nga e Kintinu kia Nzambi mu Ntima aku Kina?
Mvutu za Bibila
Ve, e Kintinu kia Nzambi ke kina muna ntima mia Akristu ko. a Bibila kisonganga e fulu kikalanga e Kintinu kiaki kadi kiyikilanga kio vo “Kintinu kia zulu.” (Matai 4:17) Tala una Bibila kisongelanga vo e Kintinu i luyalu luna kuna zulu.
E Kintinu kia Nzambi kina ye ayadi, awana beyalwa, nsiku ye kani diavanga luzolo lwa Nzambi kuna zulu ye ova ntoto.—Matai 6:10; Lusengomono 5:10.
E Kintinu yovo luyalu lwa Nzambi, luyala “nkangu, zula ye ndinga zawonso” ova ntoto. (Daniele 7:13, 14) E wisa kiaki ke kiavewa kwa wantu ko kansi kwa Nzambi yandi kibeni.—Nkunga 2:4-6; Yesaya 9:7.
Yesu wavova vo ntumwa zandi zakwikizi bekunyikama muna Kintinu kia zulu se atinu.—Luka 22:28, 30.
Kintinu kina ye mbeni zayingi, kansi kisinga fwasa e mbeni zawonso.—Nkunga 2:1, 2, 8, 9; 110:1, 2; 1 Korinto 15:25, 26.
E Bibila ke kilonganga ko vo Kintinu kia zulu kina muna ntima mieto, i sia vo, kiyalanga ntima wa konso muntu. Kansi, kisonganga vo “e diambu dia Kintinu” yovo ‘nsangu zambote za Kintinu,’ kilenda vanga diambu muna ntim’a muntu.—Matai 13:19; 24:14.
E mvovo “Kintinu kia Nzambi ova kati kweno i kina,” adieyi misongele?
E mpila ina e sono kia Luka 17:21 kiasekolwelwa mu nsekola zankaka za Bibila, difilanga wantu ankaka mu kala ye lukatikisu mu kuma kia fulu kikalanga e Kintinu kia Nzambi. Muna bonga e nona, e nsekola ya Rei Jaime, yasekola e sono kiaki vo: “e kintinu kia Nzambi kina muna kati kweno.” Muna toma bakula e sono kiaki, tufwete sia sungididi muna tini ivitidi ye eyi ilendi.
Kintinu kia Nzambi ke kiakala ko muna ntima miambi mia mbeni za Yesu ana bavavanga kumvonda
Yesu wamokenanga ye Afarisi, buka kia afidi a mabundu ana bakala vo mbeni zandi ye bavavanga kumvonda. (Matai 12:14; Luka 17:20) Nga diansongi diadi kala mu yindula vo e Kintinu kiakala muna kati kwa afarisi awaya akwa lulendo? Yesu wabavovesa vo: “Muna kati nuazala yo umpuki ye umpumbulu.”—Matai 23:27, 28.
Nsekola zankaka za Bibila zitoma sekolanga mvovo mia Yesu muna Luka 17:21: “Kintinu kia Nzambi kina vana kati kweno.” (mvovo wa ndombe i weto; Nova Versão Internacional) “E Kintinu kia Nzambi ova kati kweno i kina.” (Nsekola ya Nz’ampa) E Kintinu kia Nzambi kiakala “vana” vena afarisi yovo ‘vana kati’ kwau, kadi Yesu ona wasolwa kwa Nzambi muna kala se Ntinu, wakala vana ntadisi au.—Luka 1:32, 33.
a Mabundu mayingi ma kikristu melonganga vo Kintinu kia Nzambi kina muna ntima wa konso muntu. Muna bonga e nona e dibundu dia Convenção Batista do Sul, diyikanga vo Kintinu kia Nzambi i luyalu lwa Nzambi kina muna ntima ye muna zingu kia konso muntu.” Diau dimosi mpe, o mpelo Bento XVI wasoneka muna nkand’andi, Yesu wa musi Nazarete vo “e Kintinu kia Nzambi kina muna ntima mia wantu ana bekunwilanga.”
Nanga Oyangalela Mpe Malongi Mama
ESSENTIAL BIBLE TEACHINGS
Nki i Kintinu kia Nzambi?
Muna salu kiandi kia umbangi, Yesu watoma vovela oma ma Kintinu kia Nzambi ke mu mambu mankaka ko. Tuka kolo, alongoki andi besambanga kimana e Kintinu kiza.
EYINGIDILU DIA NKANGU
Nani i Ntinu a Kintinu kia Nzambi?
Ayingi muna asoneki a Bibila basoneka mambu mayingi malenda kutusadisa mu zaya ndiona okituka Ntinu a Kintinu kia Nzambi. Muna lusansu lwa wantu, muntu mosi kaka wayifwanisa mu kala se Ntinu.
