MOKILI ya lelo etondi na mikakatano. Bitumba, makama oyo eutaka na mipɛpɛ makasi to koningana ya mabele, maladi, bobola, kozanga bosembo, mpe makambo mosusu ya mabe ezali konyokola bamilio ya bato. Mbala mosusu, yo mpe ozali na makambo oyo ezali kotungisa yo mokolo na mokolo. Nani akoki kosalisa biso? Ezali nde na moto oyo akipaka biso?

Tokoki kondima ete Nzambe akipaka mpenza biso. Alobi boye na Liloba na ye Mosantu: “Mwasi akoki nde kobosana mwana na ye oyo ye azali komɛlisa mabɛlɛ mpe ayokela mwana ya libumu na ye mawa te? Ata basi wana bakoki kobosana, kasi ngai nakobosana yo te.” a

Koyeba likambo yango ebɔndisi biso mpenza! Bolingo oyo Nzambe alingaka biso eleki mosika bolingo oyo mama alingaka mwana na ye, atako bolingo oyo mama alingaka mwana na ye ezalaka makasi. Nzambe akosundola biso ata mokolo moko te! Kutu, asilá kosalisa biso na ndenge ya kokamwa. Na ndenge nini? Na ndenge alakisi biso nzela ya kozala na bomoi ya esengo. Nzela yango ezali kondima ya solosolo.

Soki ozali na kondima ya solosolo, okokóma na esengo. Kondima ya ndenge wana ekosalisa yo okima mikakatano mingi mpe olonga mikakatano oyo okoki kokima te. Ekosalisa yo mpe opusana penepene na Nzambe, ozala na kimya na makanisi mpe na motema. Kondima ya solosolo ekopesa yo mpe libonza ya malamu na mikolo ezali koya: bomoi ya seko na Paradiso!

Kasi, kondima ya solosolo ezali nini? Mpe ndenge nini okoki kokóma na kondima ya ndenge wana?