“Batu ba Bañata Mwa Lifasi ha ba Sepahali”

Kwa Wiko wa Africa, mushimani wa lilimo ze 12 za ku pepwa u swelwi mwa sipatela kabakala ku itusisa mulyani wa buhata wa malaria o ne ba lekile bo mahe kwa sintolo sa milyani se si lumelelizwe ki ba mulao. Dokota yo muñwi u bulela kuli: “Se lu fumani milyani ya buhata mwa lintolo ka lilimo ze 15.” *

Kwa Asia, bashemi ba ba na ni mwana wa mushimani ya sa zo pepwa ba komokile hahulu ku ziba kuli mabisi a twi ki a yaha mubili a ne ba fepanga mwanaa bona a na ni kalulo ye ñwi ye lubeta kwa mubili. Ka bumai, mwanana yo wa timela.

Muuna wa lipisinisi ya sepahala wa kwa America u putelezi batu ka ku ba uzweza masheleñi a eza madola a mañata-ñata! Batu ba bañata-ñata ba fumani kuli masheleñi a bona a penshini a ile mwa nakuwana kabakala buputeleli bo, bo bu bulezwi kuli ki “buputeleli bo bu bile bo bu maswe hahulu mwa lilimo ze mwanda ze felile.”

MWA lifasi kacenu, ibata iba mañi ni mañi a kile a bona batu ba bañwi ha ba eza lika ze ne tahisize kuli a tuhele ku ba sepa. Mane ku totobela kwa sifumu sa linaha mwa lifasi ku tahisizwe hahulu ki ‘ku sa sepahala kwa batu ba bañata mwa lifasi,’ sina mo u bulela mutende wa kwa France o bizwa Le Monde.

Ki lika mañi ze ñwi ze tahisize kuli mwa lifasi kacenu ku be ni ‘batu ba bañata ba ba sa sepahali’? Kana ku na ni ye mu kona ku sepa?

[Litaluso za kwatasi 3]