Muhato 5-Mu-Tundamene mi mu Susueze Lubasi Lwa Mina

“Mutu kaufela ya na ni ngana u sebeza ka zibo ya hae.” (Liproverbia 13:16) Ku ituta mwa ku bela ni buikangulo bo bunde kwa kona ku mi tusa hahulu ni ku mi susueza ku eza licinceho ze ka mi tusa ku ikangula hande hamoho ni lubasi lwa mina.

◯ Mu Zwelepili ku Ituta. Mwa linaha ze ñata, likopano za muso ni ze si za muso li fanga lituto ni lihatiso ze bulela fa litaba ze shutana-shutana ze ama buikangulo. Mu itusise litukiso zeo, mi mu itute linzila ze kona ku mi tusa ku ikangula hande ni ku mi tusa ku ambuka lika ze kona ku beya buikangulo bwa mina mwa lubeta. Mu tabele ku ituta lika ze nca ni ku eza licinceho ze bunolo.

Mikwa ye minde ye mu ituta ni ku latelela, ya kona ku tusa bana ba mina hamohocwalo ni baikulu ba mina. Bashemi ha ba toma mutala o munde ka ku ba ni mucelo o munde, ku ba ni bukeni, ku lobalanga lihola ze swanela, ku ezanga lipapali ze tiisa mubili, ni ku isileleza kwa matuku, bana ba bona ba ka tusiwa ki mutala wo.—Liproverbia 22:6.

◯ Ki lifi ze ñwi ze kona ku mi susueza? Takazo ya ku ipabalela haki yona feela ye kona ku mi susueza ku nga mihato ye ka mi tusa ku ba ni buikangulo bo bunde mwa bupilo. Ku tuhela mikwa ye maswe ye se mu bile ni yona ka nako ye telele ku kona ku ba taata, mi ku eza licinceho nihaike ze bunolo ku tokwa kuli mu be ni mabaka a matuna a mi susueza ku eza cwalo. Mane batu ba bañwi ba kona ku palelwa ku nga nihaiba mihato ye ba ziba kuli ya kona ku ba sileleza kwa butuku bo butuna kamba kwa lifu. Ba kona ku susuezwa kiñi kuli ba nge mihato ye kona ku ba tusa? Sina feela mo lu swanela ku pilela kaufela luna, ba swanela ku ba ni mulelo o mutuna mwa bupilo.

Batu ba ba nyalani ba tokwa ku ba ni buikangulo bo bunde ni maata kuli ba zwelepili ku tusana. Bashemi ba tabela ku zwelapili ku tusa bana ba bona ni ku ba luta. Bana ba ba hulile ba tokwa ku babalela bahabo bona ba ba supala. Hape mu hupule takazo ye mu na ni yona ya kuli mu be mutu ya na ni tuso kwa batu be mu pila ni bona, ku fita ku ba mushimbo ku bona. Ku eza zeo kaufela ku tokwa lilato ni buiyakato ku ba bañwi.

Mane se si kona ku mi susueza hahulu ku iyakatwa za buikangulo bwa mina ki buitebuho ni buipeyo bwa mina ku Mubupi wa luna. Batu ba ba lumela ku Mulimu ba tabela ku bukeleza bupilo bwa bona, ili mpo ya butokwa ya ba file. (Samu 36:9) Ha lu na ni buikangulo bo bunde, lu kona ku sebeleza Mulimu hande hahulu. Leo ki lona libaka le lituna ka ku fitisisa ha lu swanela ku tokomela za buikangulo bwa luna.

[Manzwi a fa likepe 8]

Mu ikole bunde bwa ku ba ni mupilelo o tahisa buikangulo bo bunde