Nushale bashindame padi muana utomboka

MAMU kampanda muena Kristo utudi binyike dîna ne: Jeanne, wakadienzeja bua muanende wa balume ikale munange Yehowa Nzambi. Kadi pakavua muana eu ne bidimu bipatshila ku 19, wakabatombokela, kumbuka ne kumbelu. Mamuende wakamba ne: “Katshia tshivua muanji kumvua bibi mushindu eu to! Muananyi uvua mungele mâyi ku makasa, uvua muntape ku muoyo ne mvua mupange tshia kuenza. Meji mabi akampita mutu.”

Pamuapa wewe pebe uvua mudienzeje bua kukolesha bana bebe bimpe, kadi padibu bakola, umue anyi ba bungi ba kudibu badi balua kutombokela Yehowa Nzambi. Mmunyi muudi mua kupita bimpe ne bualu ebu? Bua wewe kushala mushindame mu mudimu wa Yehowa, udi mua kuenza tshinyi?

Pakatomboka bana ba Yehowa

Bualu bua kumpala nkumanya ne: Yehowa mmumanye bimpe menemene muudi umvua amu. Yeshaya 49:15, udi wamba ne: ‘Mukaji udi mua kupua muanende utshidi wamua mabele muoyo, bua yeye kafuidi muana wa balume wakulelaye luse anyi? Bulelela, bantu aba mene badi mua kupua muoyo, kadi meme tshiena nkupua wewe muoyo.’ Nunku Yehowa udi umvua anu mutu batatu ne bamamu bumvua. Kadi ela meji muvuaye mumvue pavua banjelu bonso bamutumbisha ne bamukuatshila mudimu. Umue musangu pavuaye wandamuna Yobo, ne ‘dîyi dipatuka mu mvunde,’ wakavuluka bikondo bia disanka bivuaye mupitshishe ne bana bende banjelu, patshivuabu bonso mu buobumue. Wakebeja Yobo ne: ‘Wewe wakadi kudi kunyi pangakajadika bishimikidi bia buloba? Pakimba mitoto ya nkesha misambu diatshimue, ne pakela bana balume bonso ba Nzambi mbila yabu bua disanka diabu?’—Yobo 38:1, 4, 7.

Pashishe, Nzambi mulelela wakamona umue wa ku banjelu umutombokela, ulua Satana. (“Satana” udi umvuija “Ntomboji”). Yehowa wakamona kabidi muakatomboka Adama muanende wa kumpala uvua pa buloba, ne mukajende Eva uvua kayi kalema. (Genese 3:1-6; Buakabuluibua 12:9) Pakapita matuku, banjelu bakuabu ‘bakashiya muaba wabu,’ e kutombokelabu Nzambi.​—Yuda 6.

Bible kêna utuambila mushindu wakumvua Yehowa pavua bamue ba ku bana bende aba bavua kabayi kalema bamutombokele to. Kadi Bible udi wamba nunku: ‘Yehowa wakamona ne: Mibi ya bantu idi idiundadiunda munkatshi mua ba pa buloba ne meji adibu bela mu  mitshima yabu adi mabi matuku onso. Mutshima wa Yehowa wakanyingalala bualu bua yeye wakafuka bantu pa buloba; kanyinganyinga kakadi mu mutshima wende.’ (Genese 6:5, 6) Nansha pakatombokela bena Isalele Yehowa, ‘biakanyingalaja’ mutshima wende, ‘biakamutatshisha.’​—Musambu 78:40, 41.

Nunku tudi tumvua ne: Yehowa udi umvuila baledi badi batata ne banyingalala bua bana babu badi batomboke. Yehowa mmufile mibelu mimpe mu Bible, udi ukolesha baledi ku muoyo bua kubambuluisha padi malu a buena aa abakuata. Nzambi udi ubalomba bua bamupuile ntatu yabu yonso, badipuekeshe ne bakandamene Satana Diabolo. Tumonayi mpindieu mudi mibelu idi ilonda eyi mua kukuambuluisha bua wewe kushala mushindame padi muanebe utomboka.

Upuila Yehowa ntatu yebe

Yehowa mmumanye ne: padi baledi bamona ne: muanabu udi mua kudienzela bibi anyi ne: badi mua kumuenzela bibi kudi bantu bakuabu, bitu bibatonda bikole kupita ntatu mikuabu. Mupostolo Petelo udi uleja mushindu udi baledi mua kupita ne bualu ebu ne malu makuabu kabidi. Udi wamba ne: ‘Nuteke ntatu yenu yonso kudi Yehowa, bualu bua yeye udi unulubulula’ anyi unutabalela. (1 Petelo 5:7) Mubelu mulenga eu udi mua kukuatshisha bikole baledi badi ne muanabu mutomboke mushindu kayi?

Patshivua muanebe mutekete imue misangu, uvua umutabalela bua kumuepula ku njiwu, ne uvua ukutumikila. Kadi padiye ukola, bukokeshi buuvua nabu kudiye budi mua kukepela, kadi dijinga diebe dikole dia kumuepula ku njiwu diodi ki ndikepele to, didi mene mua kukola.

Nunku padi muanebe utomboka, ne malanda ende ne Nzambi afua, kakutshiyi muntu udi mua kumutangila ne malu mabi amufikila, udi mua kuela meji ne: wewe ke uvua muenze tshilema. Mamu Jeanne utukadi batele wakumvua pende nanku. Wakamba ne: “Dituku dionso mvua anu ngela meji bua malu avua menzeke kale bua kumona tshilema tshimvua muenze; mvua ngumvua bibi be!” Kadi pabi edi ke dîba didi Yehowa musue bua wewe ‘kuteka ntatu yebe yonso kudiye’! Neakuambuluishe. Mufundi wa Misambu wakamba ne: ‘Teka bujitu buebe pambidi pa Yehowa, ne yeye neakukoleshe; kêna witabuja tshiendelele bua bantu bakane banyungishibue.’  (Musambu 55:22) Ke tshiakafikila Mamu Jeanne. Wakamba ne: “Ngakakuatshila Yehowa malu onso avua mantonde. Ngakamupumuina bionso bimvua ngumvua munda muanyi, ke meme kumvua bimpe be!”

Bu muutu wenza bilema, uvua mua kuikala muenze bimue bilema mu dikolesha dia muana. Kadi udi wimanyina pa bilema ebi bua tshinyi? Yehowa mene katu wimanyinapu to, bualu wakafundisha mêyi aa kudi mufundi wa Misambu: ‘Yehowa, bu wewe mubale dipambuka dia bantu, mmuntu kayi wakadi mua kuimana, Mukalenge?’ (Musambu 130:3) Nansha bu wewe kuyi wenza bilema, muanebe uvua anu mua kutomboka. Nunku sambila Yehowa, umuambile muudi umvua, yeye neakuambuluishe bua kupita bimpe ne tshilumbu etshi. Kadi bua wewe kushala mushindame mu mudimu wa Yehowa ne kukandamena Satana, udi ne bua kuenza makuabu malu.

Udipuekeshe

Petelo wakamba ne: ‘Nudipuekeshe kuinshi kua tshianza tshikole tshia Nzambi, bua yeye anubandishe mu tshikondo tshiasungulaye.’ (1 Petelo 5:6) Kadi bua tshinyi bidi bikengela kudipuekesha padi muanebe utomboka? Mbualu, udi udiumvua bu mupile ne umvua bikusama ku muoyo, kuikala ne muana wa nunku kudi mua kukufuisha ka bundu. Udi mua kuikala welangana meji bua mudi bienzedi bia muanebe binyange lumu lua dîku diebe, nangananga bobu mua kumuipata mu tshisumbu tshia bena Kristo. Kudipisha eku ne lumu ludi lunyanguke bidi mua kukutekesha mu mikolo, wewe kubenga bua kubuela mu bisangilu bia bena Kristo.

Mu nsombelu wa nunku, mbimpe kuenza malu ne meji makane. Nsumuinu 18:1 udi utuambila ne: ‘Udi udipandulula kudi banga bantu udi ukeba anu bualu budiye musue, ne udi upatula mêyi a tshiji tshikole bua kupidia meji makane.’ Wewe ubuela mu bisangilu bia bena Kristo bionso, neulonge malu mimpe be, ne neukole ku muoyo. Mamu Jeanne wakamba ne: “Kumpalampala, tshivua musue kupetangana ne muntu to. Kadi, ngakela meji, pashishe meme kuvuluka mudi malu amvua ne tshibidilu tshia kuenza mu ditendelela Nzambi mikale ne mushinga. Kabidi, bu meme mushale anu kumbelu, mvua mua kuikala mufue anu mu diela meji bua tshilumbu etshi. Bisangilu biakansaka bua kutuma meji anyi ku malu malenga a Nzambi. Ndi nsanka bikole bua mumvua tshiyi mudisombele nkayanyi, ne bua muvua bena Kristo nanyi bansambe.”​—Ebelu 10:24, 25.

Kadi wavuluka ne: muntu yonso mu dîku udi ne bua ‘kudiambuila bujitu buende’ bua mudiye muena Kristo. (Galatia 6:5) Yehowa udi ulomba baledi bua banange bana babu, ne babalongeshe. Udi ulomba bana bua batumikile baledi babu, ne babanemeke. Bikala baledi benze muabu muonso bua kukolesha bana babu ‘ne dibela ne didimuija bia Mukalenge,’ nebikale ne lumu luimpe ku mêsu kua Nzambi. (Efeso 6:1-4) Bikala muana ubenga mibelu milenga ya baledi bende, lumu luende yeye ke luanyanguka. Nsumuinu 20:11 udi wamba ne: ‘Muana mene udi umuenesha tshikadilu tshiende ku bienzedi biende, ne bikala mianda idiye wenza milengele ne miakane.’ Bulelela, nansha muakatomboka Satana, lumu lua Yehowa kalutu lunyanguke ku mêsu kua bantu bavua bamanye bimpe tshivua tshienzeke to.

Ukandamene Diabolo

Mupostolo Petelo udi wamba ne: ‘Nuikale bapole, nutabale; muena lukuna wenu, Diabolo mene, udi wendakana bu nyama wa ntambue udi ukungula, ukeba bantu ba kudieye.’  (1 Petelo 5:8) Diabolo utu utamba kukeba bua kukuata bansonga ne bantu badi kabayi bamonemone malu, anu bu mutu ntambue wenza. Mu bikondo bia kale, ntambue ivua yendakana mu Isalele; nanku bimuna bivua mu njiwu. Kana ka mukoko kavua kadiyila kua tshianana bavua mua kukuata bipepele kudi ntambue. Bavua mua kushipa mamuaku pavuaye uteta bua kukasungila. Ntambue uvua ushipa kabidi tshimpanga pavuatshi tshipota. Ke bualu kayi, bivua bikengela balami ba mikoko ba dikima bikaleku bua kulama tshisumbu tshia mikoko.​—1 Samuele 17:34, 35.

Bua kusungila bantu badi bu mikoko kudi Satana udi bu “nyama wa ntambue udi ukungula” eu, Yehowa mmuteke bantu badi bu balami ba mikoko bua kutangila tshisumbu; mfumuabu Yezu Kristo “Mulami Munene” ke udi Nzambi muteke bua kubalombola. (1 Petelo 5:4) Petelo udi ubapesha mubelu eu, ubambila ne: ‘Nulame tshisumbu tshia mikoko ya Nzambi tshidi munkatshi muenu, nuyilame, kanuyi benzejibue ku bukole, kadi ne mitshima ya disanka bu mu disua dia Nzambi; ki mbualu bua kukeba biuma, kadi nuikale ne mutshima mulongolola bimpe.’ (1 Petelo 5:1, 2) Nuenu nueleshangana diboko ne balami aba, badi mua kuambuluisha muanenu.

Kadi imue misangu padi balami aba basua kubela muanebe eu, muoyo wa buledi udi mua kukusaka bua kumuakuila bikole bua kabalu kumupesha dinyoka to. Kadi kuenza nunku ntshilema tshinene be! Bualu Petelo udi wamba ne: ‘Nukandamene Diabolo,’ kadi kêna wamba ne: Nukandamene balami aba to.​—1 Petelo 5:9.

Padi dinyoka dikale dikole

Bikala muanebe eu muikale muena Kristo mutambule kadi kayi musue kushintuluka, udi mua kupeta dinyoka dikole menemene: badi mua kumuipata mu tshisumbu tshia bena Kristo. Dîba adi malanda ebe nende neikale bilondeshile bidimu bidiye nabi ne malu makuabu.

Tshilejilu, bikala muanebe eu utshidi muana mukese ne muikale kumbelu kuebe, neutungunuke amu ne kutangila majinga ende a ku mubidi. Udi kabidi mua kumulongesha bikadilu bilenga ne kumupesha manyoka. (Nsumuinu 1:8-18; 6:20-22; 29:17) Udi kabidi mua kulonga nende Bible bu mututu tulonga ne bantu bakuabu bonso: umuela nkonko, yeye wandamuna. Udi mua kuenza mudimu ne mvese ne mikanda ya ‘mupika wa lulamatu ne wa budimu’ kabidi. (Matayo 24:45, NW) Udi kabidi mua kuya nende mu bisangilu, kusomba nende kaba kamue. Bionso ebi anu bua Bible amuambuluishaku.

Kadi malu mmashilangane bikala muana eu muntu mukole ne katshiyi kumbelu kuebe. Mupostolo Paulo wakapesha bena Kristo ba mu Kolinto mubelu eu: ‘Kanubuelakanyi ne muntu udi ne dîna dia muanetu wa mu Kristo bikalaye muena masandi, anyi muena lukuka lua bintu, anyi muena mpingu, anyi mupendianganyi, anyi mukuatshiki wa maluvu, anyi munyengi wa bintu; kanudi mene ne muntu wa nunku.’ (1 Kolinto 5:11) Nansha mudi malu manene a mu dîku mua kulomba bua nuenu kupetangana nende, kanuena ne bua kupetangana nende dîba dionso tshianana tshianana to.

Padi bakulu bapesha muana eu dinyoka bilondeshile tshidi Bible wamba, kubengi tshidibu benza to, kutshipepeji to. Wewe mutue ku tshia muanebe, kakukandamena Diabolo to. Malanda ebe ne Nzambi neanyanguke. Kadi wewe mutue ku tshia bakulu, neushale ‘mujalame mu ditabuja diebe,’ newambuluishe muanebe eu bimpe bitambe.​—1 Petelo 5:9.

Yehowa neakukuatshishe

Bikala muanebe mutomboke, vuluka ne: kuena nkayebe to, nudi ba bungi. Kadi nansha tuetu mua kupeta mateta a mushindu kayi, Yehowa neatukuatshishe.​—Musambu 68:19.

Sambila Yehowa bikole, umueyemene. Buela mu bisangilu bionso bia tshisumbu. Itaba dinyoka didi balami ba tshisumbu bapeshe muana. Wewe muenze nunku, neushale mushindame. Tshilejilu tshiebe tshimpe tshidi mua kuambuluisha muanebe bua kumvua dîyi dia Yehowa ne kupingana kudiye.​—Malaki 3:6, 7.

[Bimfuanyi mu dibeji 18]

Masambila ebe ne bisangilu bia tshisumbu nebikuambuluishe