ACANCE YAKAUZYA UKUTI
U Mulandu ci Uno Nemo Lyonsi Nkalandila Iviipe?
“Insita zimwi nkaikaanya mu milandile, nomba insita zimwi zyene nkalanda sile ukwaula nu kwelenganyapo!”—James.
“Ndi cakuti insakamala cimwi nkavwanga ukwaula ukwelenganyapo, nupya ndi nawezyako umwenzo nkalanda ukucila na pali vino ndinzile ukulanda. Fwandi ningati nkaluvyanya lyonsi sile.”—Marie.
Baibo ikati: “Ululimi . . . u moto” nupya “Elenganyini vino mutengo ukulu ukapya nu moto lino wasontekwa na kambilimbili kanono.” (Yakobo 3:5, 6) Uzye ilingi vyonsi vino walanda vikakuletelela? Nga vino cili, ale icipande cii cimakwazwa.
U Mulandu ci Uno Nemo Lyonsi Nkalandila Iviipe?
Ukukanamalilika. Baibo ikati: ‘Ilingi swensi kwene tukaluvyanya. Lelo ndi cakuti muntu umwi asyaluvyanya mu mazwi yano akalanda, ala umuntu wiyo u mumalilike.’ (Yakobo 3:2) Tutamalilika nupya ali mulandu uno tusipumikila sile lino tukupita lelo tukaluvyanya na lino tukuvwanga.
“Vino uwongo wane nu lulimi vitamalilika, ukulanda ukuti ningaikaanya mu milandile ala ntakweti mano.”—Anna.
Ukulandikisya. Baibo ikati: ‘Mu kuvula kwa mazwi, musiulwa ukuluvyanya.’ (Mapinda 10:19) Antu akalandalanda nupya aakakutika panono yakasosya sana yauze mu mivwangile yao.
“Antu acenjele sana pano muli asi aliyo yakavwanga lyonsi. Yesu wali ali muntu mucenjele sana uwaliko pano nsi, nomba insita zimwi wikalanga sile mya.”—Julia.
Miponto. Baibo ikati: “Akacincila ukuvwanga, ivivwangwa vyakwe vikatota wa mupeni.” (Mapinda 12:18) Inzila yonga umukalolekela ukucincila ukuvwanga i miponto, alikuti ukulanda amazwi akacisa yauze nupya amusalula. Antu akaponta insita zimwi yangati, “Inkusekesya sile!” Nomba ukuzewanya antu yauze asi cintu cakusekesya. Baibo ikatunena ukuti tutalinzile “kutukanana, nanti kwikilana kai mu musango uli onsi.”—Efeso 4:31.
“Natemilwe sana ivyakusekesya antu, imiyele iikalenga cangukile umuntu ukuponta, nupya calenganga ukuti lyonsi naya ni ntazi.”—Oksana.
Ndi cakuti walanda cimwi, utanga uciswilizye mu kanwa wakwe viivi kwene vino cingatala ukuswilizya kogeti nga wamufena
Ukuteeka ululimi
Ukusambilila ivya kuikanya mu milandile kwatala sana, nomba ivisinte vya muli Baibo vingakwazwa. Lola vii apisika.
‘Mwaelenganya sana pa mivwangile inu, lino muizi cele pa misanzi inu.’—Masamu 4:4.
Insita zimwi cikazipa ukwikala sile mya. Umukazyana umwi uwi zina lyakuti Laura walanzile ukuti: “Vino nkauvwa lino insoka limwi asi vino ningayuvwa pa cisila. Ndi cakuti ukali wasila, nkatemwa sana ukuti ntali nalanda vino nali nkulonda ukulanda.” Nanti sile ukukana landa pa masekondi sile anono kungakwazwa kukana landa iviipe.
“Amatwi ali yano yakakutikila ivya kuvwauvwa, na kanwa nako kakasaasula nu kuvwa ukulyompa kwa vilyo.”—Yobo 12:11.
Ungaicingilila ku ulanda ukafuma mu kuvwangavwanga ndi cakuti ukutala uwelenganya pali vino ukulonda ulande. Ungayuzya amauzyo yaa:
Uzye i vya cumi? Uzye vilimo icikuuku? Uzye ivicindama?—Loma 14:19.
Uzye ninguvwa uli ndi cakuti umwi wanena amazwi yaa?—Mateo 7:12.
Uzye yamalanga umucinzi ku muntu wino nkunena?—Loma 12:10.
Uzye ii inzila isuma iyakulandilamo amazwi yaa?—Kasambilizya 3:7.
‘Mwaicefya nu kulola auzo ukuya acindame kuluta mwemwe.’—Filipi 2:3.
Ukusunda kuu kungakwazwa ukulaelenganya ivisuma pali yauze, nupya vivyo kwene ivilakwazwa nu kulateeka ululimi nu kwelenganyapo lino utatala walanda cimwi. Nanti watulanda mpiti cimwi icakusosya yauze, ukuicefya kungakwazwa ukulenga uwelelo nupya ulinzile ukucita vivyo zuwa zuwa. (Mateo 5:23, 24) Lyene ulinzile ukwikako amano pakuti wateeka ululimi lwako.
Limwi Mungatemwa Ukulolako na Vii
ACANCE YAKAUZYA
Ningacita uli nga naluvyanya?
Muntu wensi akaluvyanya, lelo asi wensi akasambilila kuli vino waluvyanya.
MAVIDYO YAKWE TUKADOLI TWAKULENGA
Uzye Cuza wa Cumi Waya Uli?
Ya cuza ya ufi yatatala ukuzana, nomba uzye ungacita uli pakuti uzane cuza wa cumi?
