•  U mulandu ci uno avyazi yakandondelezezya?

•  Vino ungacita

•  Vino auzo yakalanda

 Avyazi yako yakalanda ukuti yakwikako mano. Lelo wemo ungalola kwati avyazi yakakulondelezya muli vino ukacita. Wakwe:

•   Uwacance umwi uwi zina lyakuti Erin walanzile ukuti: “Ya tata yakatola foni, iyampatikizya ukuti njapeele pasiwedi nu kutandika ukuwelenga mameseji yonsi. Walanzile nu kuti: “Ndi cakuti nezya ukukana, yakaelenganya ukuti kuli vino nkufisa.”

•   Denise, wino ndakai ali ni myaka pakasi kakwe 20 na 25 , akaiusya ukuti ya nyina yatandike ukulondelezya pa mpiya zino wasumbanga kuli foni. Walanzile ukuti: “Yatandike ukulola pa nambala yonga na yonga nu kuzya umwineco wa nambala iyo alino na pali vino nkalanzyanya nu muntu wiyo.”

•   Uwacance uwi zina lyakuti Kayla walanzile ukuti ya nyina yawelenzile ibuku lyakwe limwi muno walembanga ivya nkama. Walanzile nu kuti: “Nalembangamo pali vino nayuvwanga na pali vino nayuvwanga pali aliyo! Kufuma sile lilyo kwene natiile ukulembamo.”

 Icisinka icicindame: Avyazi yako yakwata umulimo wa kukusakamala, nupya utange ufise vino yakulonda ukumanya pali wewe. Uzye insita zimwi cikaloleka ukuti yakacila umu cipimo? Limwi. Usuma u wakuti kwaya vimwi vino ungacita pakuti utayuvwa sana ukuti yakukulondelezya.

 Walanda vino ukuyuvwa. Baibo ikatukomelezya ukuti twaya “acumi muli vyonsi.” (Ayebulai 13:18, NWT) Waezya na maka ukuya uwa cumi ku yavyazi yako. Ndi cakuti ukwezya ukuya uwa cumi ku yavyazi yako nu kulanda pali vino ukuyuvwa cilalenga kuti yatalonda ukumanya pali vyonsi vino ukucita.

 Vino ufwile ukwelenganyapo: Uzye kufuma ku cisila waya umutailwe? Uzye ukawela pa ng’anda pa nsita ino avyazi yako yalanda? uzye ukafisa ivyuza vino wakwata? uzye ukafisa vino ukucita?

  “Ndinzile ukuzumilizyanya na avyazi yane. Nkayanena pali vyonsi ivikuncitikila. Nkayanena pali vyonsi vino yakulonda ukumanya nupya ukucita vivyo kwalenga yantaile icakuti yasilonda ukumanya vyonsi vino nkucita.”—Delia

 Wateeka umwenzo. Baibo ikalanda ukuti: “Cila muntu aicecete pa vicitwa vyakwe.” (Galatiya 6:4) Cikalondekwa ukuombesya pakuti ukwate imiyele iingalenga yauze ukukutaila, lelo ukuombesya ukukwata imiyele iyo kwacindama.

 Vino ufwile ukwelenganyapo: Avyazi yako yalipo acance. Uzye ukwelenganya ukuti cico cingalenga yaika mano uli ku umi wako?

 “Nkulola ukuti avyazi yakaiusya pali vino yaluvyanyizye nupya yasilonda ana yao yakacite ivili vimwi.”—Daniel.

 Waya na Mizu. Waezya ukulola ivintu wakwe vino avyazi yako yakuvilola. Baibo ikalanda ukuti umuci aakaombesya “akaangalila ningo icikacitika umu ng’anda yakwe” nu kuti isi musuma akakuzya ana kupitila “mu kuyasunda nu kuyasambilizya kwa wina Klistu.” (Mapinda 31:27; Efeso 6:4) Ukucita vivyo kutangupala, avyazi yakalondekwa ukumanya ivikucitika mu umi wako.

 Vino ufwile ukwelenganyapo: Uzye kulingana na vino wamanya acance, ndi cakuti wali muvyazi uzye ungazumilizya umwanako mulumendo nanti mukazyana ukulacita vyonsi kwene mu nkama ukwaula ukumanya?

“Ndi cakuti ucili umulumendo nanti umukazyana cikaloleka kwati avyazi yakukulondelezya. Nomba lyene vino nene wikolo nalola umulandu uno yafwile ukucitila vivyo. Iinzila ino yakalangilamo ukuti yaya nu kutemwa.”—James