Ewi Wãwen Baamle eo Emaroñ Jibõñ?

“Mokta eman eo ej irak, im ej wõnmanlok im irak, im ilo jemlokõn, dren in karek eo ej kamaloñ eman eo.”—Juõn jabõn kennan an dri Esia.

KWÕJ etetal itõrerein juõn lobiroro, ilo idriñ, kworuñlok na iloan. Kwoj lukkun kate yuk ñõn wõnliñtak ak kwojjab lo tõbrõk.

Karek emaroñ jelet aolepen ro uan baamle eo ilo ejja wãwen in wõt. Lio belen dri karek eo ej kate wõt e ñõn jibõñ eo belen ñõn jolok mõnit  in. Kin an yokwe e, ej kõmõn elõñ men ko ñõn jibõñ e bwe en bwijrõk jen an karek, ak ej wõnmanlok wõt. Ej noji dren in karek ko limen ak ej bar wia. Ej noji jããn ko an, ak ej muri jen ro mõtõn bwe en wia. Lio ej rejañ leo belen bwe en bwijrõk jen an irak elañe ej yokwe baamle eo an, mour eo an, im Anij, ak ejelok tõbrõk. Meñe lio ej lukkun kate wõt e ñõn kabwijrõk dri karek eo belen, ej laplok wõt an baamle eo ber ilo abañ eo an dri karek eo. Ñõn jibõñ dri karek eo, ro uan baamle eo rej aikwij mokta melele kin joñõn nana in karek. Rej aikwij jela etke jet wãwen ko ñõn kamarmire abañ in relikjõp im katak kin wãwen ko jet me eor tõbrõkin.

Dri karek eo ejjab baj karek wõt ak ej juõn nañinmij eor iben kinke elap wõt an lemnok kin drenin karek im ekõnan wõt bwe en irak le jen joñõn. Meñe elõñ taktõ ro rej errã bwe ejelok juõn wãwen ñõn kamarmire nañinmij in, ak dri karek eo emaroñ anjo ion nañinmij in elañe ej bwijrõk jen an irak toõn wõt an mour.−Keiri Matu 5:29.

Jemaroñ keiri wãwen in ñõn juõn eo eor an nañinmij in tõñal. Meñe ejjab maroñ jolok nañinmij eo an kin tõñal, ak emaroñ kejbãrok bwe nañinmij in en jab laplok elañe ej bwijrõk jen an mõña men ko retõñal. Eindrein, dri karek eo ejjab maroñ jolok nañinmij eo an kin karek, ak emaroñ kejbãrok e ilo an jab bar irak drenin karek ñõn jidrik.

Bõtab, ejjab juõn men ebiruru ñõn kõmõne. Dri karek eo emaroñ mõne e mõke im kwalok an nan in jekben. Emaroñ ba, ‘Ejjab lap aõ ekarekrek.’ ‘Baamle eo aõ ej kõmõn menin aõ karek.’ ‘Ij irak bwe in jolok aõ illu iben booj en aõ.’ Kin nan in jekben kein an emaroñ kõmõn bwe baamle eo en errã iben. Lio emaroñ ba, ‘Jemõm ej aikwij irak bwe en jolok an mõk.’ Ak ajiri eo emaroñ ba, ‘Jema ej aikwij irak bwe en jolok an inebata iben jinõ.’ Rej kwalok jabrewõt nan in jekben ñõn noje abañ eo bwe jemeir ej juõn dri karek. Juõn taktõ etan Susan Forward ear ba: “Rej riõp, kwalok nan in jekben ko, im noje bwir ko an dri karek eo bwe en ber wõt ibeir.”

Ro uan baamle eo rejjab maroñ in jibõñ dri karek eo elañe rejjab mokta jibõñ ir mõke. Jet remaroñ jab errã im ba, ‘Dri karek eo wõt ej aikwij jibõñ im ejjab ña!’ Bõtab, ewi joñõn an dri karek eo jelet iñjake im makõtkit ko am? Ewi ikutkut in an kaillu, kainebataik, kabwok, im kamijõk yuk? Jete alen kwar aikwij ber imweo im jibõñ dri karek eo meñe kwon kar aikwij in kõmõni men ko raurõklok ilo ien eo? Ñe ro uan baamle eo rej bõk buñten ne ko ñõn kakõmõnmõnlok mour ko air, dri karek eo enaj lore joñok ko air.

Jab kõtlok bwe dri karek eo en naruõm. Emaroñ ba, ‘Elañe ear emõn am kõmõn ñõn iõ, iban kar ekarekrek.’ Dri kakabilek eo Toby Rice Drews ej ba, “Dri karek eo emaroñ ba nan kein kinke ekõnan bwe kwon tõmak e im lemnok bwe unin an ekarekrek ej kin kwe.” Jab tõmak e. Dri karek eo ejjab atartar wõt ion drenin karek ak ej bareinwõt atartar ion armij ro me rej rejetake nan in jekben ko an ak riõp ko an. Ilo air kõmõne men in, ro uan baamle eo rejjab kile bwe rej jibõñ dri karek eo bwe en wõnmanlok wõt im karek.

Juõn jabõn kennan ilo Baibel me ej konono kin juõn eo emõkõj an illu emaroñ bar jerbal ñõn juõn eo ekarekrek: “En make bõk leen. Elañe kwoj jibañe juõn alen, innem kwonaj aikwij in bar jibañe tokelik.” (Ken. 19:19, UBS) Aet, ej erro eo an dri karek eo mõke ñõn kajelaik booj eo an bwe ejjab maroñ jerbal, en mõke etal ñõn jikin kiki eo an, im karreoik e im aolep men ko ear kattoni. Elañe baamle eo rej kõmõni aolep men kein ñõn e, ilo mol rej jibõñ e bwe en wõnmanlok wõt im karek, mae ien emij.

Kabukot jibõñ. Ejjab biruru ñõn an ro uan baamle eo anemkwoj jen abañ in im jet ien rejjab maroñ kõmõne men in elañe ejelok jibõñ jen ro jet. Kwoj lukkun aikwij atartar ion ro mõtõm me rejamin rejetake nan in jekben ko an dri karek eo im reban kõtlok bwe kwon ber wõt ilo abañ in.

Enaj juõn men ekamõnõnõ elañe dri karek eo ekõnan bõk jibõñ kin abañ eo an. Bõtab, ej buñten ne eo moktata ñõn an kamarmire abañ in an. Iomin jejjo wõt ran, taktõ ro remaroñ kabwijrõk wãwen an drenin karek jelet enbwinin dri karek eo, bõtab, ebinlok ñõn jolok iñjake eo kin ijol drenin karek jen lemnok eo an juõn dri karek.