Etke Eo Ej Roñjake Jar Ej Kõtl̦o̦k an Wõr Eñtaan?

MEÑE jet armej rejjab tõmak bwe ewõr Anij ak rej jar. Etke rejjab tõmak bwe ewõr Anij? Bõlen kõnke rej lo an l̦ap eñtaan im nana ilo lal̦ in. Em̦õj ke am̦ baj l̦õmn̦ak ippam̦ make etke Anij ej kõtl̦o̦k bwe en wõr eñtaan?

Anij ear ke kõm̦anm̦an armej bwe ren jerawiwi im eñtaan? Ealikkar bwe enaaj kar pen ad kautiej juon anij rot in el̦aññe ear kõm̦anm̦an kõj bwe jen eñtaan. Ak l̦õmn̦ak kõn men in. Ñe kwõn kar etetal iturin juon wa me elukkuun kããl im em̦m̦an, ak ke kwõj etal ñan turãjet kwõj lo bwe elukkuun jorrããn im kurere rãjetin, kwõn kar ke ba bwe ãindein an kar kom̦bani eo kõm̦m̦ane wa eo? Kwõban kar ñan jidik! Kwõn kar jel̦ã kadede bwe elukkuun kar em̦m̦an wãween an kom̦bani eo kõm̦m̦ane wa eo. Bõtab, unin an jorrããn im kurere ej kõnke emaroñ kar wõr juon men ak armej me ear ko̦kkure.

Ãindein, ñe jej lo an lal̦ in aiboojoj im em̦m̦an wãween kar kõm̦m̦ane, ak ijo turãjet jej lo an armej ro ilo lal̦ in eñtaan im jorrããn, jen kar ke ba bwe ãindein an kar Anij kõm̦anm̦an lal̦ in? Baibõl̦ eo ej katakin bwe Anij ear kõm̦anm̦an armej ro m̦oktata bwe ren weeppãn ak tokãlik rar make kõm̦m̦an bwe ren iioon jorrããn. (Duteronomi 32:​4, 5) El̦ap ad m̦õn̦õn̦õ bwe em̦õj an Anij kallim̦ur bwe enaaj jol̦o̦k aolep nana jãn lal̦ in im bwe armej ro rej pokake renaaj weeppãn. Ijoke, en baj to wõt an Anij kõm̦m̦ani men kein?

Etke Eto an Wal̦o̦k Eñtaan?

Unin an kar Jeova kõtl̦o̦k wõt an wõr nana ej kõnke kar jum̦ae jim̦we im maroñ eo an ñan irooj ioon armej. Jeova ear jab kõm̦anm̦an armej ro bwe ren irooj iooer make. Anij ear wõr an maroñ ñan irooj ioon armej. Baibõl̦ eo ej make ba: “E jab an juon armej eo ej etetal bwe en jiniet buñtõn neen.” (Jeremaia 10:​23) Ekabũrom̦õjm̦õj bwe armej ro m̦oktata rar kããlõt ñan jum̦ae jim̦we im maroñ eo an Anij ñan irooj iooer. Aer kar kõtrai kien eo an Anij ear kõm̦m̦an bwe ren ri jerawiwi. (1 Jon 3:⁠4) Kõn men in, rar  luuji mour weeppãn eo aer im men in ear bõktok jorrããn ñan er kab aolep ro nejier.

Ium̦win elõñ to̦ujin iiõ ko, Jeova ear kõtl̦o̦k bwe armej ro ren irooj iooer make. Bõtab, bwebwenato ko an armej rej kalikkar bwe ejjel̦o̦k ippãn armej ro maroñ im jim̦we ñan kõm̦m̦ane men in. Ealikkar bwe aolep kien ko an armej rej kõm̦m̦an bwe en wõr eñtaan im jorrããn. Ejjel̦o̦k juon iaan kien ko an armej enañin kar kajem̦l̦o̦k tarin̦ae, nana, kalijekl̦o̦k, im nañinmej ko.

Ewi Wãween Anij Enaaj Kõm̦m̦an bwe Mour En Bar Jepl̦aak ñan Jinoin?

Baibõl̦ eo ej kallim̦ur bwe m̦õttan jidik Anij enaaj ukot lal̦ in ñan juon pedetaij im eobrak kõn armej ro rewãnõk. (2 Piter 3:​13) Ro wõt im ejim̦we wãween aer kõjerbal anemkwoj in kããlõt eo aer ñan kwal̦o̦k yokwe ñan doon im ñan Anij renaaj jukjuk im amn̦ak ilo lal̦ eo ekããl.​​—Duteronomi 30:​15, 16, 19, 20.

Baibõl̦ ej bar ba bwe ilo naaj “raan in ekajet” eo me ej itok wõt, Anij enaaj jol̦o̦k eñtaan im armej ro rej kõm̦m̦an bwe en wõr eñtaan. (2 Piter 3:⁠7) Ãlikin men in, Jijej Kũraij, eo Anij ear kapiti, enaaj irooj ioon armej ro me rar pokake. (Daniel 7:​13, 14) Ilo an Jijej naaj irooj, ta ko enaaj katõpraki? Baibõl̦ eo ej ba: “Ro ettã bũrueer renaaj jolõt ãne eo, im renaaj m̦õn̦õn̦õ kõn aenõm̦m̦an el̦ap.”​​—Sam 37:⁠11.

Ãinwõt Kiiñ eo ilañ, Jijej enaaj jol̦o̦k nañinmej, rũttol̦o̦k, im mej kab aolep nana ko me rar itok wõt jãn an armej ro m̦oktata jum̦ae Jeova, eo im ej “unin mour.” (Sam 36:​9, UBS) Jijej enaaj kãjmour aolep ro me rej m̦õn̦õn̦õ kõn wãween an irooj ilo yokwe. Ium̦win kien eo an, kallim̦ur kein ilo Baibõl̦ renaaj jejjet kitieer:

◼ “Ri jokwe ie ejamin ba, ‘I nañinmej.’ Naaj jol̦o̦k bõd an ro ri jokwe ilowaan.”​​—Aiseia 33:⁠24.

 ◼ “[Anij] enaaj kõm̦õrãik jãn mejeir dãnnin kõmjaal̦al̦ otemjej, im enaaj ejjel̦o̦k bar mej, im re jamin bar liaajlo̦l̦, ak jañ, ak eñtaan; bwe men ko m̦okta re jako.”​​—Revelesõn 21:⁠4.

Ejjab ke menin kaenõm̦m̦an ñan jel̦ã bwe m̦õttan jidik Anij enaaj kajejjet kallim̦ur eo an ñan jol̦o̦k aolep nana im eñtaan? Ilo tõre in jej kõttar wõt, jen jab pere im l̦õmn̦ak bwe Anij ejjab roñjake jar ko ad ñe jej lo an wõr eñtaan.

Anij emour im ej pãd. Ej roñ am̦ jar, im ej loe am̦ eñtaan im rup bũruom̦. Ej kijooror in lo am̦ mour im m̦õn̦õn̦õ ilo iien eo me kwõban bar eñtaan im enaaj ejjel̦o̦k am̦ pere kõn jabdewõt.