Ta ko Enjel̦ ro Rej Kõm̦m̦ani ñan Kõj?
Katak Jãn Naan In Anij
Ta ko Enjel̦ ro Rej Kõm̦m̦ani ñan Kõj?
Katak in ej uwaake jet kajjitõk ko me bõlen ekkã am̦ kajjitõk kaki. Im ej kwal̦o̦k eoon ta ko kwõmaroñ lo uwaak in kajjitõk kein ie ilo Baibõl̦ eo. Ri Kõnnaan ro an Jeova renaaj lukkuun m̦õn̦õn̦õ in kõmel̦el̦eik uwaak kein ñan eok.
1. Wõn enjel̦ ro?
Enjel̦ ro rej jetõb ro im rej mour ilañ. Reutiejl̦o̦k im rekajoorl̦o̦k jãn armej. Anij eo em̦ool ej juon jetõb bareinwõt. Ear kõm̦anm̦an enjel̦ ro m̦okta jãn an kar kõm̦anm̦an lal̦ in. (Job 38:4, 7; Matu 18:10) Elõñ milien enjel̦ ro retiljek rej pãd ilañ ippãn Jeova.—Riit Sam 103:20, 21, UBS; Daniel 7:9, 10.
2. Enjel̦ ro rej ke jipañ armej?
Enjel̦ ro rar jipañ juon em̦m̦aan eo ewãnõk etan Lot. Ear jokwe ilo juon jikin kweilo̦k me Anij ear l̦õmn̦ak in ko̦kkure kõn an armej ro ie nana. Ruo enjel̦ rar kakkõl Lot im baam̦le eo an bwe ren ko. Jet iaan armej ro rar l̦õmn̦ak bwe naan in kakkõl eo kar kõjak bajjek im rar jab roñjake. Bõtab, Lot im lim̦aro nejin rar maroñ el̦l̦ã im mour kõnke rar pokake naan in kakkõl eo jãn Anij me enjel̦ ro rar bõkl̦o̦k ñan er.—Riit Jenesis 19:1, 13-17, 26.
Ekkar ñan Baibõl̦ eo, enjel̦ ro rej jipañ armej ro rainin ilo aer tõl ro rej tiljek ilo jerbal in kwal̦o̦k naan kõn nuuj eo em̦m̦an kõn Aelõñ eo an Anij. (Matu 24:14) Nuuj eo em̦m̦an ekitibuj juon naan in kakkõl. Naan in kakkõl in ejjab kõjak bajjek ãinwõt kar naan in kakkõl eo ilo raan ko an Lot. Ej itok jãn Anij ikijjeen enjel̦ ro.—Riit Revelesõn 1:1; 14:6, 7.
Anij emaroñ kõjerbal enjel̦ ro ñan kakajoor kõj ñe jej jelm̦ae mãlejjoñ ko. Ear kõjerbal juon enjel̦ ñan kakajoor Jijej.—Riit Luk 22:41-43.
Ejjabto jãn kiiõ, Anij enaaj kõjerbal enjel̦ ro ñan jol̦o̦k armej ro renana me rej kõm̦m̦an bwe en wõr nana im eñtaan. Men in enaaj kanemkwoj armej jãn aer ioon jorrããn im eñtaan.—Riit 2 Tessalonika 1:6-8.
3. Ta ko enjel̦ ro renana rej kõm̦m̦ani ñan armej?
Ãinwõt an kar lõñ armej ro renana im rejjab pokake Anij, ãindein bareinwõt ilo lañ elõñ enjel̦ ro rar jum̦ae Anij. (2 Piter 2:4) Baibõl̦ ej n̦aetan rein tim̦on̦ ro. Eo eutiejtata iaan rein ej Setan Tepil̦ eo. Setan im enjel̦ rein renana rej m̦on̦e armej.—Riit Revelesõn 12:9.
Setan ej kõjerbal peejnej ko rekibbon, kien ko an armej, im kabuñ ko reriab ñan kareel armej im kõm̦m̦an bwe ren el̦l̦o̦k jãn Anij. Kõn men in, Setan eo ej pãd ilikin nana im kalijekl̦o̦k, lãj, im eñtaan ko me rej kajorrããn armej ro.—Riit 1 Jon 5:19.
4. Ewi wãween an enjel̦ ro renana m̦on̦e armej?
Em̦õj an Setan m̦on̦e elõñ armej kõn tõmak eo me ñe armej rej mej rej erom jetõb ro im kwõmaroñ kõnono ippãer. Ak Baibõl̦ ej ba bwe ñe armej remej ejjel̦o̦k aer maroñ ñan kõm̦m̦an jabdewõt. (Ekklisiastis 9:5) Bõtab, ekkã an enjel̦ ro renana m̦on̦e armej ilo aer anõke ainikien ro rejitenburu im rar mej. (Aiseia 8:19) Rein rej m̦on̦e armej ro jet ikijjeen aer kõjerbal ri anijnij ro, ri bubu ro, im ri jedjed iju ro. Naan in Anij ej kakkõl kõj bwe jen kõjparok jãn men kein renana. Innem, jej aikuj jol̦o̦k aolep men ko ippãd me ewõr kajitõbtõb im anijnij ie im renaaj kaal enjel̦ ro renana.—Riit Duteronomi 18:10, 11; Jerbal 19:19.
El̦aññe jej yokwe Jeova, jejjab aikuj mijake enjel̦ ro renana. Ñe jej katak Naan in Anij im pokake naan ko ie, jej jum̦ae Tepil̦ eo im ruwaakl̦o̦k ñan Anij. El̦apl̦o̦k an Jeova kajoor jãn enjel̦ ro renana. Enjel̦ ro retiljek an Jeova remaroñ kakajoor kõj ilo iien ad aikuj.—Riit Sam 34:7; Jemes 4:7, 8.
Ñan kal̦apl̦o̦k am̦ mel̦el̦e, lale jebta 10 ilo bok in, jeje in Ri Kõnnaan ro an Jeova. KATAK KO REM̦OOL JÃN BAIBÕL̦ EO
