Aolep iien juon kõrã etan in Estelle, * (Lale kõmel̦el̦e eo itulal̦.) ear bõk ajri ro 7 nejin im rar etal im jar. Kõrã in ej ba: “Iar ba ñan rũkaki eo ilo kabuñ eo aõ bwe ikõn̦aan katak kõn Baibõl̦.” Bõtab, rũkaki in ear jab katak Baibõl̦ ippãn. Tokãlik, kõrã in ear bõjrak an etal im jar. Estelle ej wõnm̦aanl̦o̦k im ba: “Ruutiej ro ilo kabuñ eo aõ rar jejetok im ba bwe el̦aññe ijjab maroñ etal im jar, eokwe in ijjilõkl̦o̦k wõt jããn. Iar ba ilo bũruõ, ‘Rejjab kea ñe ijjab etal im jar ak men eo wõt rej kea kake ej bwe in lel̦o̦k jããn.’”

Bar juon kõrã etan in Angelina me aolep iien ear etal im jar ej ba: “Kajjojo iien amim jar ewõr pileij in jaba rej leto letak jilu alen. Im ilo aolepen iien kein rej kõtmãne bwe kõmin jabawõt. Aolep iien rej kajjitõk bwe kõmin lel̦o̦k jããn. Iar ba ilo bũruõ, ‘Anij ejjab pãd ippãn armej rein.’”

Ak ta kõn kabuñ ko ilo bukwõn eo am̦? Rej ke kajju ba bwe armej ren lel̦o̦k jããn? Ak rej ke iuuni armej ilo wãween ko jet ñan lel̦o̦k jããn? Men in ej ke errã ilo naan ko ilo Baibõl̦?

Jijej ej eo me ear kajutak kabuñ in Kũrjin. Ear ba: “Em̦õj lewaj kõn ejjel̦o̦k on̦ean, innem kom̦win lel̦o̦k im jab bõk on̦ean.” (Matu 10:8, UBS) Naan ko ilo Baibõl̦ relukkuun aorõk im rej ñan aolep ro im rekõn̦aan roñjake. Kõn men in, ejjel̦o̦k juon en kar bõk on̦ean kõn an kwal̦o̦k kõn Baibõl̦.

Elemen an kar Kũrjin ro ilo iien ko etto kõl̦l̦ã on̦ean aikuj ko an eklejia ko aer?

Kajjojo iaaer rar jabawõt kõn joñan eo rar make pepe kake ilo bũrueer im “jab ilo bũrom̦õj ak kõn an aikuj kõm̦m̦ane, bwe Anij ej yokwe eo em̦õn̦õn̦õ in lel̦o̦k.” (2 Korint 9:7) Rijjelõk Paul ear ba: “Kõmar jerbal boñ im raan, bwe kõmin jab men in eddo ñan jabdewõt iaami, im kwal̦o̦k ñan kom̦ gospel an Anij.” (1 Tessalonika 2:9) Innem, Paul ear jerbal im kõm̦m̦an em̦ nuknuk ko ñan an maroñ kabwe aikuj ko an.​—Jerbal 18:2, 3.

Ekkã an Ri Kõnnaan ro an Jeova kweilo̦k ilo m̦õko me em̦m̦an joñaer. Rej n̦aetan m̦õkein Im̦õn Kweilo̦k. Ak elemen aer kabwe men ko rej aikuji ñan Im̦õn Kweilo̦k ko aer? Eokwe, rejjab leto letak pileij in jaba im rejjab ijjilõkl̦o̦k lõta ñan armej ro bwe ren jilkinl̦o̦k jããn ñan er. Jãn aer ãindein ewõr bo̦o̦k in jabawõt ko ilowaan Im̦õn Kweilo̦k ko aer. Im jabdewõt ro me rekõn̦aan kwal̦o̦k aer kam̦m̦oolol kõn katak ko me rej wal̦o̦k ie, remaroñ make likũt jããn ilo bo̦o̦k kein.

Ewõr on̦ean kõm̦m̦ane bok in kab on̦ean jilkintok. Meñe ãindein ak kwõban lo kein karreelel ko an peejnej ko ilo bok in im kwõban lo aer ba bwe kwõn jilkinl̦o̦k jããn. Unin kar kõm̦m̦ane bok in ej ñan kajeededl̦o̦k katak ko rem̦ool jãn Baibõl̦.

Innem, ta am̦ baj l̦õmn̦ak: Wãween kein rej kõm̦m̦ani rej ke l̦oore naan ko an Jijej kab joñak eo an Kũrjin ro ilo iien ko etto?