Зошто се распаѓаат браковите?

На Исус „му пристапија фарисеи за да го искушаат, па го прашаа: ‚Дозволено ли е мажот да се разведе од својата жена од која и да било причина?‘“ (Матеј 19:3).

НЕКОИ луѓе што живееле во времето на Исус прашале дали браковите треба да траат и дали е можно да се постигне тоа. Исус им рекол: „Зарем не сте читале дека оној што ги создаде во почетокот, ги создаде машко и женско и рече: ‚Затоа човекот ќе ги остави татка си и мајка си и ќе се прилепи до својата жена, и двајцата ќе бидат едно тело‘? Така повеќе не се две, туку едно тело. Затоа, Бог што составил, човек да не разделува!“ * (Матеј 19:4-6). Очигледно, Бог имал намера бракот да биде трајна врска.

Во многу земји денес, околу 40 отсто од луѓето што се во брак ‚се разделуваат‘, односно нивниот брак завршува со развод. Дали библиските совети во врска со бракот се застарени? Можно ли е браковите да пропаѓаат затоа што проблемот е во самото брачно уредување?

Размисли за следнава споредба: Две брачни двојки купуваат ист модел автомобили. Едната двојка добро го одржува и внимателно го вози својот автомобил. Затоа тој не се расипува. Другата двојка не вложува ниту време ниту труд да го одржува автомобилот и вози крајно невнимателно. Тој се расипува и тие креваат раце од него. Во кого е проблемот — во автомобилот или во сопствениците? Очигледно е дека најголема вина носат сопствениците.

Слично на тоа, фактот што многу бракови пропаѓаат не значи дека нешто не е во ред со брачното уредување. Доказ за тоа се милионите бракови што успеваат. Тие бракови ги прават среќни и им носат стабилност на брачните партнери, на семејствата и на целото општество. Но, исто како еден автомобил, бракот треба добро да се одржува за да трае.

Сеедно дали си во брак само неколку дена или, пак, со децении пловиш во брачните води, библиските совети за тоа како да се одржи и зајакне бракот се многу делотворни. Да разгледаме неколку примери.

[Фуснота]