പിശാച് എവിടെയാണ് വസിക്കുന്നത്?
ബൈബിളിന്റെ ഉത്തരം
ആത്മവ്യക്തിയായതുകൊണ്ട് പിശാച് ഒരു അദൃശ്യമണ്ഡലത്തിലാണു ജീവിക്കുന്നത്. എന്നാൽ ഇവിടെയുള്ള ചിത്രത്തിൽ കാണുന്നതുപോലെ, ദുഷ്ടന്മാരെ ദണ്ഡിപ്പിക്കുന്ന ഒരു തീനരകമല്ല പിശാച് വസിക്കുന്ന ആ സ്ഥലം.
“സ്വർഗത്തിൽ ഒരു യുദ്ധം”
കുറെക്കാലത്തേക്ക്, സ്വർഗത്തിൽ സഞ്ചരിക്കാനും വിശ്വസ്തരായ ദൈവദൂതന്മാരോടൊപ്പം ദൈവമുമ്പാകെ ചെല്ലാനും ഉള്ള സ്വാതന്ത്ര്യം പിശാചായ സാത്താന് ഉണ്ടായിരുന്നു. (ഇയ്യോബ് 1:6) എന്നാൽ, “സ്വർഗത്തിൽ ഒരു യുദ്ധം” ഉണ്ടാകുമെന്നും അതിന്റെ ഫലമായി സാത്താനെ സ്വർഗത്തിൽനിന്ന് ‘ഭൂമിയിലേക്കു എറിഞ്ഞുകളയുമെന്നും’ ബൈബിൾ മുൻകൂട്ടിപ്പറഞ്ഞിരുന്നു. (വെളിപാട് 12:7-9) സ്വർഗത്തിൽ ഈ യുദ്ധം നടന്നുകഴിഞ്ഞതായി ബൈബിളിലെ കാലക്കണക്കും ലോകസംഭവങ്ങളും തെളിയിക്കുന്നു. പിശാച് ഇപ്പോൾ വസിക്കുന്നത് ഭൂമിയെ ചുറ്റിപ്പറ്റിയാണ്.
അതിന്റെ അർഥം ഭൂമിയിൽ ഒരു പ്രത്യേകസ്ഥലത്താണ് പിശാച് ജീവിക്കുന്നത് എന്നാണോ? ഉദാഹരണത്തിന്, പുരാതന നഗരമായ പെർഗമൊസിനെ ‘സാത്താന്റെ സിംഹാസനമുള്ളിടം’ എന്നും ‘സാത്താൻ വസിക്കുന്ന’ നഗരമെന്നും വിളിച്ചിരിക്കുന്നു. (വെളിപാട് 2:13) ആ നഗരത്തിൽ വ്യാപകമായിരുന്ന സാത്താന്യ ആരാധനയെ സൂചിപ്പിക്കുന്നതിനുവേണ്ടിയായിരിക്കാം ഈ പ്രയോഗങ്ങൾ ഉപയോഗിച്ചത്. ‘ഭൂമിയിലെ എല്ലാ രാജ്യങ്ങളുടെ’ മേലും സാത്താൻ ഭരണം നടത്തുന്നതായി ബൈബിൾ പറയുന്നു. അതു സൂചിപ്പിക്കുന്നത് സാത്താൻ ഭൂമിയിലെ ഒരു പ്രത്യേകസ്ഥലത്തല്ല വസിക്കുന്നത് എന്നാണ്. ഭൂമിയെ ചുറ്റിപ്പറ്റിയാണ് അവന്റെ വാസം.—ലൂക്കോസ് 4:5, 6.