Biiblã pa wilg a Zeezi Kirist rogmã daar takɩ ye. Sɛb nins sẽn be tẽngrã wilgda rẽ.

•   “ “Ned pa mi Kiristã rogmã sẽn sɩd yɩ daar ningã ye.”—New Catholic Encyclopedia.

•   “ “Ned pa mi Kiristã rogmã daar takɩ ye.”—Encyclopedia of Early Christianity.

 Baa Biiblã sẽn pa wilg a Zeezi sẽn dog wakat ningã, a goma bũmb a yiib sẽn maan a rogmã wakat yelle, tɩ kɩt tɩ neb wʋsg yetẽ t’a rogmã pa yɩ yʋʋm-sar kiuug rasem 25 ye.

Pa yɩ waood wakat ye

1.   Sõadgã. Bilf sẽn deng a Zeezi rogmã, a Sezaar Ogust yiisa noor n yeel “tɩ b sõd dũniyã nebã fãa.” Ned kam fãa ra segd n kula “a meng tẽngẽ,” tɩ rẽ ra tõe n yɩ so-toak sẽn na n kaoos rasem a yopoe bɩ sẽn yɩɩd rẽ. (Luk 2:1-3) Tõe tɩ sõadgã yaa sẽn na n sõng ne yõor-yaoodã reegr la sodaarã yãkre. Rẽnd baa sẽn da yaa yʋʋmdã wakat ning fãa la a Sezaar Ogust kõ no-kãnga, ra pa na n yɩ neb wʋsg noog ye. La yaa vẽeneg t’a Ogust sã n da modg neb wʋsg tɩ b tog so-wok waood wẽnde, a ra na n paasa a nin-buiidã sũ-sãamsã.

2.   Piisã. Pe-kɩɩmb n da “be we-kɛɛng ne yʋng n gũud b piisi.” (Luk 2:8) Sebr a yembr (La vie quotidienne en Palestine au temps de Jésus) yeelame tɩ piisã ra bee yɩng “semen sẽn deng Pakã [tʋʋlg kiuugã baasg sẽnese]” n tãag sɩpaolg kiuugã pʋɩ-sʋka. Sebrã paasame: “B ra pagda piisã waoodã wẽnde. Rẽ bal seka d na bãng tɩ nebã sẽn yãk daar ning n maand Nowɛllã, rat n yeel tɩ waood wẽndã pa tõe n yɩ sɩd ye. Bala, Evãnzillã yetame tɩ pe-kɩɩmbã ra bee weoogẽ.”

Yɩɩ bõn-bɩʋʋng wall sɩpaolg kiuugu

 D sã n tik a Zeezi kũumã sẽn yɩ Pak daare, rat n yeel tɩ yʋʋmd 33 Nizã kiuug rasem 14 sẽn yɩ tʋʋlg wakatã n sõde, d tõe n bãnga a Zeezi rogmã sẽn yɩ wakat ningã. (Zã 19:14-16) A Zeezi sẽn wa n na n sɩng a koɛɛgã mooneg sẽn kaoos yʋʋm a tã la pʋɩ-sʋkã t’a tara yʋʋm 30. Rẽnd a roga yʋʋmd a 2 soabã sẽn deng neb wʋsg sẽn tẽed t’a roga wakat ningã.—Luk 3:23.

 Sẽn mik tɩ bũmb kae sẽn wilgd t’a Zeezi rogmã yɩɩ yʋʋm-sar kiuug rasem 25 wã, bõe yĩng tɩ b maand Nowɛllã daar-n-kãnga? Sebr a yembr (Encyclopædia Britannica) yeelame tɩ wõnda tũudmã taoor dãmb yãka daar-n-kãng sẽn na yɩl “tɩ zems ne tigr ning Rom ziri tũudmã rãmb sẽn da maand n ‘tẽegd wĩntoogã rogem daare,’” solstis divɛɛrã a sasa wã. Sebr a to (The Encyclopedia Americana) yeelame tɩ bãngdb wʋsg tẽedame tɩ b maana woto “sẽn na yɩl tɩ Kirist tũudmã yɩ neb nins sẽn tuubã noogo.”