အုပ်ချုပ်ရေးအဖွဲ့ဆီက စာ
ချစ်ရတဲ့ ညီအစ်ကို၊ ညီအစ်မ–
ကျမ်းစာမှာ အများအားဖြင့် လူတွေအကြောင်း ရေးထားတယ်ဆိုတာ သင်သိမှာပါ။ အများစုဟာ သစ္စာရှိ အမျိုးသား/သမီးတွေ ဖြစ်ပြီး ကျွန်တော်တို့လို “ခံစားချက်ရှိတဲ့သူ” တွေ၊ အခက်အခဲတွေ ကြုံခဲ့ရသူတွေပါ။ (ယာကုပ် ၅:၁၇) တချို့က ဆင်းရဲဒုက္ခတွေ၊ ပူပင်သောကတွေနဲ့ ဝန်ပိခဲ့ကြတယ်။ တချို့ကျတော့ မိသားစုဝင်၊ ယုံကြည်သူချင်းတွေကြောင့် စိတ်ဆင်းရဲခဲ့ကြတယ်။ တချို့ဆိုရင် ကိုယ်လုပ်ခဲ့တဲ့အမှားကြောင့် အပြစ်ရှိတယ်လို့ ခံစားပြီး ဝမ်းနည်းခဲ့ကြတယ်။
အဲဒီလိုအခြေအနေတွေကြောင့် တချို့ ယေဟောဝါနဲ့ ဝေးကွာသွားကြတယ်။ ဒါပေမဲ့ ဘုရားသခင်ကို အပြီးအပိုင် ကျောခိုင်းသွားတာလား။ မဟုတ်ပါဘူး။ အများစုက “လမ်းပျောက်တဲ့သိုးလို ဖြစ်နေလို့ ကျွန်တော်မျိုးကို လိုက်ရှာလှည့်ပါ။ ပညတ်ချက်တွေကို မမေ့ပါဘူး” လို့ ဆုတောင်းတဲ့ ဆာလံဆရာလို ဖြစ်နေကြတယ်။ (ဆာလံ ၁၁၉:၁၇၆) သင်ကော အဲဒီလို ခံစားနေရသလား။
အဖွဲ့အစည်းနဲ့ ဝေးသွားသူတွေကို ယေဟောဝါ အမြဲသတိရနေပါတယ်။ ဒါကြောင့် ယုံကြည်သူချင်းတွေကတစ်ဆင့် သူတို့ကို ကူညီပေးတယ်။ ဥပမာ၊ ဆင်းရဲဒုက္ခပေါင်းစုံ ကြုံခဲ့ရတဲ့ ယောဘကို ယေဟောဝါ ဘယ်လို ကူညီပေးခဲ့သလဲဆိုတာ သုံးသပ်ကြည့်ပါ။ ယောဘက ပစ္စည်းဥစ္စာတွေ ဆုံးရှုံး၊ သားသမီးတွေ သေဆုံးပြီး ဆိုးရွားတဲ့ အနာစိမ်းတွေ ပေါက်ခဲ့တယ်။ မိတ်ဆွေတွေကလည်း သူ့ကို စကားနဲ့ ထိုးနှက်ကြတယ်။ ယောဘက အချိန်အတိုင်းအတာတစ်ခုအထိ စဉ်းစားတွေးခေါ်ပုံ လွဲမှားခဲ့ပေမဲ့ ယေဟောဝါဘုရားကို ကျောခိုင်းမသွားပါဘူး။ (ယောဘ ၁:၂၂။ ၂:၁၀) သူ့စဉ်းစားတွေးခေါ်ပုံ မှန်လာအောင် ကိုယ်တော် ဘယ်လို ကူညီပေးခဲ့သလဲ။
ဧလိဟုလို့ခေါ်တဲ့ ယုံကြည်သူချင်းကို သုံးပြီး ယောဘကို ယေဟောဝါ ကူညီပေးခဲ့တယ်။ ယောဘရဲ့ ခံစားချက်တွေကို ဧလိဟု နားထောင်ပြီးမှ စကားစပြောတယ်။ သူ ဘာပြောမလဲ။ ယောဘကို ပြစ်တင်ဝေဖန်မှာလား။ အပြစ်ရှိတယ်၊ ရှက်စရာကောင်းတယ်လို့ ခံစားရအောင် ပြောမှာလား။ ယောဘထက် သူ သာတယ်လို့ ထင်ခဲ့သလား။ လုံးဝ မဟုတ်ပါဘူး။ ဘုရားသခင်ရဲ့ လမ်းညွှန်မှုနဲ့ ဧလိဟုက “ကျွန်တော်နဲ့ ခင်ဗျားဟာ စစ်မှန်တဲ့ဘုရားရှေ့မှာ အတူတူပါပဲ။ ကျွန်တော့်ကိုလည်း ရွှံ့မြေနဲ့ပဲ ပုံသွင်းထားတာပါ။ ဒါကြောင့် ကျွန်တော့်ကို ကြောက်စရာ မလိုပါဘူး။ ကျွန်တော့်စကားတွေက ခင်ဗျား စိတ်ထိခိုက်လောက်တဲ့အထိ မဖြစ်စေရပါဘူး” လို့ ပြောတယ်။ (ယောဘ ၃၃:၆၊ ၇) ဧလိဟုက ယောဘကို စိတ်ဆင်းရဲအောင် လုပ်မယ့်အစား မေတ္တာနဲ့ တည့်မတ်ပေးပြီး အားပေးခဲ့တယ်။
ကျွန်တော်တို့လည်း ဧလိဟုလို သဘောထားမျိုးနဲ့ ဒီဘရိုရှာကို ပြင်ဆင်ထားတယ်ဆိုတာ မှတ်သားစေလိုပါတယ်။ အဖွဲ့အစည်းကနေ တဖြည်းဖြည်း ဝေးသွားတဲ့သူတွေရဲ့ အခြေအနေတွေ၊ ခံစားချက်တွေကို ကျွန်တော်တို့ ဦးဆုံးနားထောင်ပြီး သေသေချာချာ ဆင်ခြင်သုံးသပ်ပါတယ်။ (ပညာအလိမ္မာ ၁၈:၁၃) ပြီးတော့ သူတို့လို ဖြစ်ခဲ့တဲ့ ရှေးခေတ် သစ္စာရှိကျေးကျွန်တွေကို ယေဟောဝါ ဘယ်လိုကူညီပေးခဲ့သလဲဆိုတဲ့ ကျမ်းစာမှတ်တမ်းတွေကို ဆုတောင်းပြီး ဆန်းစစ်လေ့လာတယ်။ နောက်ဆုံး ဒီနေ့ခေတ် အဖြစ်အပျက်တွေနဲ့ ကျမ်းစာမှတ်တမ်းတွေကို ပေါင်းစပ်ပြီး ဒီဘရိုရှာကို ထုတ်ဝေထားတာပါ။ ဒီဘရိုရှာကို ဆန်းစစ်လေ့လာကြည့်ပါလို့ အထူး မေတ္တာရပ်ခံလိုပါတယ်။ သင့်ကို ကျွန်တော်တို့ စိတ်ရင်းမှန်နဲ့ ချစ်တယ်ဆိုတာ ယုံကြည်စိတ်ချပါ။
ယေဟောဝါသက်သေတွေရဲ့ အုပ်ချုပ်ရေးအဖွဲ့