သူတို့ရဲ့ယုံကြည်ခြင်းကို အတုယူပါ | စာရာ
ဘုရားသခင်က “မင်းသမီး” လို့ နာမည်ပေးခဲ့သူ
အလုပ်ကို တကုပ်ကုပ်လုပ်နေတဲ့ စာရာဟာ ခါးကိုဆန့်ပြီး ရှေ့ကို မျှော်ကြည့်လိုက်တယ်။ သူ့ကြီးကြပ်မှုအောက်မှာ ကျွန်တွေဟာ ပျော်ပျော်ရွှင်ရွှင် အလုပ်ကိုယ်စီ လုပ်နေတယ်။ စာရာကလည်း သူ့အလုပ်တွေကို ဝီရိယရှိရှိ လုပ်တယ်။ ပြဲသွားတဲ့ တဲရွက်ထည်ကို ဖာထေးပြီးနောက် အညောင်းပြေအောင် လက်တွေကို နှိပ်နယ်နေတယ်လို့ မြင်ယောင်ကြည့်လိုက်ပါ။ နှစ်နဲ့ချီ နေဒဏ်မိုးဒဏ်ခံရလို့ အရောင်လွင့်နေတဲ့ ဆိတ်မွေးရက်ထည်ကို ကြည့်ပြီး လှည့်လည်သွားလာတဲ့ဘဝနဲ့ နေလာတာ အတော်ကြာပြီဖြစ်မှန်း စာရာ အမှတ်ရနေမှာပဲ။ မွန်းလွဲပိုင်းလွန်လို့ နေဝင်ချိန် ရောက်လာပြီ။ မနက်တုန်းက သူ့မျက်စိရှေ့မှာပဲ အာဗြဟံ * ထွက်သွားတယ်။ အခု အာဗြဟံ ပြန်လာမယ့်လမ်းကို လည်တဆန့်ဆန့်နဲ့ သူ မျှော်ကြည့်နေတယ်။ ခပ်လှမ်းလှမ်းက တောင်ကုန်းနားမှာ အာဗြဟံရဲ့ အရိပ်အယောင်လည်း ပေါ်လာရော သူ့မျက်နှာ ဝင်းပသွားတယ်။
အာဗြံဟံဟာ သူ့မိသားစုကြီးနဲ့အတူ ယူဖရေးတီးမြစ်ကို ဖြတ်ကူးပြီး ခါနန်ပြည်ကို ဆင်းသွားတာ ဆယ်နှစ်ကျော် ကြာခဲ့ပြီ။ တစ်ခါမှမသွားဖူးတဲ့ ဒီခရီးစဉ်တစ်လျှောက်မှာ စာရာဟာ သူ့ယောက်ျားကို ကြည်ကြည်ဖြူဖြူ ထောက်မပေးတယ်။ ဘုရားမျက်နှာသာရမယ့်မျိုးနွယ် ပေါ်ထွန်းလာဖို့ဆိုတဲ့ ယေဟောဝါရဲ့ ရည်ရွယ်ချက်ကို အကောင်အထည်ဖော်ရာမှာ အာဗြဟံ ဘယ်လောက်အရေးပါမှန်း စာရာ သိထားလို့ပဲ။ စာရာကျတော့ကော။ စာရာဟာ မြုံနေပြီး အသက်ကလည်း ၇၅ နှစ် ရှိနေပြီ။ ‘ငါဟာ အာဗြဟံရဲ့ဇနီးဖြစ်နေတော့ ယေဟောဝါရဲ့ကတိ ဘယ်လိုလုပ် ပြည့်စုံလာနိုင်မှာလဲ’ လို့ သူတွေးမိမှာပဲ။ သူ အဲဒီလို စိုးရိမ်ရုံတင်မကဘူး၊ စိတ်မရှည်တဲ့အထိ ဖြစ်လာမှာကို နားလည်ပေးနိုင်ပါတယ်။
ကျွန်တော်တို့လည်း ဘယ်အချိန်ကျမှ ဘုရားရဲ့ကတိတွေ ပြည့်စုံလာပါ့မလဲဆိုပြီး တွေးမိတဲ့အခါတွေ ရှိနိုင်တယ်။ အထူးသဖြင့် ကတိတစ်ခု ပြည့်စုံလာမှာကို မျှော်လင့်တကြီး စောင့်စားနေချိန်မှာ စိတ်ရှည်ဖို့ တော်တော်ခက်တယ်။ စာရာရဲ့ ယုံကြည်ခြင်းကနေ ကျွန်တော်တို့ ဘာသင်ယူနိုင်သလဲ။
“ယေဟောဝါဘုရားက ကျွန်မကို သားသမီးမပေးဘူး”
အာဗြဟံရဲ့မိသားစု အီဂျစ်ပြည်ကနေ ပြန်လာတာ မကြာသေးဘူး။ (ကမ္ဘာဦး ၁၃:၁-၄) လုဇလို့ ခါနန်လူမျိုးတွေခေါ်တဲ့ ဗေသလမြို့ရဲ့ အရှေ့ဘက် ကုန်းပြင်မြင့်မှာ စခန်းချနေကြတယ်။ အဲဒီကုန်းပြင်မြင့်ကနေ ကတိထားရာပြည် တစ်ဝန်းလုံးကို စာရာ မြင်နိုင်တယ်။ ခါနန်ကျေးရွာတွေ၊ လမ်းမကြီးတွေကို လှမ်းမြင်နိုင်တယ်။ ဒါပေမဲ့ အဲဒီရှုခင်းတွေဟာ စာရာရဲ့မွေးရပ်မြေနဲ့ နည်းနည်းမှမတူဘူး။ မိုင် ၁,၂၀၀ (ကီလိုမီတာ ၁,၉၀၀) အကွာ၊ မက်ဆိုပိုတေးမီးယားမှာရှိတဲ့ ဥရမြို့မှာ စာရာ ကြီးပြင်းလာတာ။ ချမ်းသာကြွယ်ဝတဲ့ အဲဒီမြို့မှာ စျေးတွေရှိပြီး သက်သောင့်သက်သာ နေနိုင်ခဲ့တယ်။ အမိုးအကာ အခိုင်အခံ့ရှိတဲ့အပြင် ရေပိုက်လိုင်းစနစ်ပါရှိတဲ့ အိမ်ကြီးအိမ်ကောင်းကိုသာမက ဆွေမျိုးသားချင်းတွေကိုပါ စာရာ ထားရစ်ခဲ့ရတယ်။ အရှေ့ဘက်ကို မျှော်ကြည့်ပြီး ကလေးဘဝက ဇိမ်ကျကျနေခဲ့တဲ့အိမ်ကို စာရာ လွမ်းဆွတ်နေမှာပဲလို့ ထင်ရင်တော့ ဘုရားသခင်ကို ချစ်တဲ့ အဲဒီအမျိုးသမီးအကြောင်း ကောင်းကောင်းမသိလို့ ဖြစ်ရမယ်။
နောက်အနှစ် ၂,၀၀၀ လောက်မှာ တမန်တော်ပေါလုက စာရာနဲ့ အာဗြဟံရဲ့ ယုံကြည်ခြင်းအကြောင်း စွမ်းအားတော်လမ်းညွှန်မှုနဲ့ ရေးခဲ့တယ်။ “ထွက်လာခဲ့တဲ့နေရာကို သူတို့ တမ်းတနေတယ်ဆိုရင် ပြန်သွားနိုင်တာပဲ” လို့သူပြောတယ်။ (ဟီဘရူး ၁၁:၈၊ ၁၁၊ ၁၅) စာရာကော အာဗြဟံပါ အတိတ်ကို တမ်းတသူတွေ မဟုတ်ဘူး။ သူတို့မှာ အဲဒီလိုအတွေးမျိုး ရှိခဲ့ရင် အိမ်ပြန်သွားလောက်ပြီ။ ဥရမြို့ကို ပြန်သွား ရင်တော့ ယေဟောဝါပေးတဲ့ အခွင့်ထူးကြီးကို လက်လွှတ်လိုက်ရမှာပဲ။ သန်းနဲ့ချီတဲ့လူတွေရဲ့ ရင်ကိုထိစေတဲ့ ယုံကြည်ခြင်းစံနမူနာရှင် ဖြစ်ဖို့နေနေသာသာ သူတို့ကို ဘယ်သူမှ သတိရကြမှာ မဟုတ်ဘူး။
စာရာဟာ အတိတ်ကို ပြန်တမ်းတနေမယ့်အစား ရှေ့ကိုပဲ အာရုံစိုက်တယ်။ ဒါကြောင့် အဲဒီပြည်မှာ လှည့်လည်နေထိုင်ချိန်အတွင်း တဲအိမ်ကို ဖြုတ်သိမ်း၊ တိရစ္ဆာန်အုပ်နဲ့အတူ ပြောင်းရွှေ့၊ တဲအိမ်ကို ပြန်တပ်ဆင်ရာမှာ ယောက်ျားကို ကူညီပေးခဲ့တယ်။ တခြားအခက်အခဲတွေ၊ အပြောင်းအလဲတွေကိုလည်း ကြုံခဲ့ရတယ်။ ယေဟောဝါက အာဗြဟံကို သူ့ကတိအကြောင်း အကြိမ်ကြိမ် ပြောပြပေမဲ့ စာရာအကြောင်း တစ်ခွန်းမှ မပြောဘူး။—ကမ္ဘာဦး ၁၃:၁၄-၁၇။ ၁၅:၅-၇။
နောက်ဆုံးတော့ စာရာက အာဗြဟံကို သူ့စိတ်ထဲမှာရှိနေတဲ့ အစီအစဉ်အကြောင်း ပြောပြချိန်တန်ပြီလို့ ယူဆတယ်။ “အစ်ကို၊ ကျွန်မပြောတာ နားထောင်ပါဦး။ ယေဟောဝါဘုရားက ကျွန်မကို သားသမီးမပေးဘူး” လို့ ပြောတဲ့အခါ သူ ဘယ်လောက် စိတ်အနှောင့်အယှက်ဖြစ်နေမယ်ဆိုတာ ပုံဖော်ကြည့်ပါ။ မျိုးဆက်အတွက် ကျွန်မိန်းမ ဟာဂရကို ယူဖို့ သူ့ယောက်ျားကို ပြောတယ်။ အဲဒီလိုပြောတဲ့အခါ စာရာ ဘယ်လောက်တောင် မချိတင်ကဲဖြစ်နေမယ်ဆိုတာ မြင်ယောင်ကြည့်ပါ။ အခုချိန်မှာ အဲဒီလိုတောင်းဆိုတာ ထူးဆန်းနေပုံပေါက်တယ်။ အဲဒီအချိန်တုန်းကတော့ လူတစ်ယောက် မျိုးဆက်မပြတ်ဖို့ မယားငယ်ယူတာ အဆန်းမဟုတ်ဘူး။ * ဒီနည်းနဲ့ အာဗြဟံရဲ့ သားမြေးကတစ်ဆင့် လူမျိုးတစ်မျိုး ဆင်းသက်လာမယ်ဆိုတဲ့ ဘုရားရဲ့ရည်ရွယ်ချက် အကောင်အထည်ပေါ်လာမယ်လို့ စာရာ ယူဆနေတာများလား။ ဘယ်လိုပဲဖြစ်ပါစေ သူ့ဘက်က စွန့်လွှတ်အနစ်နာခံဖို့ အသင့်ရှိခဲ့တယ်။ အာဗြဟံ ဘယ်လိုတုံ့ပြန်သလဲ။ “[စာရာ] ပြောတာကို နားထောင်တယ်” လို့ ကျမ်းစာပြောတယ်။—ကမ္ဘာဦး ၁၆:၁-၃။
ယေဟောဝါ လှုံ့ဆော်ပေးလို့ စာရာ အဲဒီလိုတောင်းဆိုတာလား။ မဟုတ်ပါဘူး။ လူ့အမြင်နဲ့ကြည့်ပြီး တောင်းဆိုခဲ့တာ။ သူ ကလေးမရတာ ဘုရားသခင်ကြောင့်လို့ ထင်နေတယ်။ ဘုရားမှာ တခြားဖြေရှင်းနည်းရှိမှန်း သူ မတွေးမိဘူး။ သူ့ဖြေရှင်းနည်းကြောင့် သူပဲ နာကျင်ခံစားခဲ့ရတယ်။ ဒါပေမဲ့ သူ့ရဲ့တောင်းဆိုမှုက ကိုယ်ကျိုးမငဲ့သူဖြစ်မှန်း ဖော်ပြတယ်။ အရာရာထက် ကိုယ့်ဆန္ဒကို ဦးစားပေးတတ်တဲ့ လောကကြီးမှာ စာရာရဲ့ ကိုယ်ကျိုးမငဲ့တဲ့ စိတ်ဓာတ်ဟာ တကယ့်ကို အထင်ကြီးစရာပဲ။ ကိုယ်ကျိုးထက် ဘုရားရဲ့ ရည်ရွယ်ချက်တွေကို ဦးစားထားမယ်ဆိုရင် စာရာရဲ့ ယုံကြည်ခြင်းကို တုပရာရောက်ပါလိမ့်မယ်။
“ခင်ဗျား ရယ်ပါတယ်”
မကြာခင်မှာပဲ ဟာဂရမှာ ကိုယ်ဝန်ရှိလာတယ်။ ဟာဂရဟာ အရေးပါသူဖြစ်ပြီအထင်နဲ့ သခင်မ စာရာကို မလေးမစားလုပ်တော့တယ်။ မြုံနေတဲ့စာရာခမျာ တော်တော့်ကို ခံရခက်မှာပဲ။ ဘုရားရဲ့ ထောက်မမှုရထားတဲ့ စာရာဟာ အာဗြဟံဆီက ခွင့်ပြုချက်ယူပြီး ဟာဂရကို တစ်နည်းနည်းနဲ့ ဆုံးမတယ်။ နောက်တော့ အိရှမေလ မွေးလာတယ်။ (ကမ္ဘာဦး ၁၆:၄-၉၊ ၁၆) နှစ်အတော်ကြာပြီးနောက် စာရာ အသက် ၈၉ နှစ်၊ အာဗြဟံ အသက် ၉၉ နှစ်မှာ ယေဟောဝါ ဆီက သတင်းရတဲ့အကြောင်း ကျမ်းစာမှာ ဖော်ပြတယ်။ တကယ့်သတင်းထူးပါပဲ။
သားမြေးတွေ အများကြီးရစေမယ်လို့ မိတ်ဆွေအာဗြဟံကို ယေဟောဝါ ကတိပေးပြန်တယ်။ နာမည်လည်း ပြောင်းပေးလိုက်တယ်။ အဲဒီအချိန်ထိ သူ့ကို အာဗြံလို့ပဲ လူသိများတယ်။ ဒါပေမဲ့ ယေဟောဝါက “လူအမြောက်အမြားရဲ့ဖခင်” လို့ အဓိပ္ပာယ်ရတဲ့ အာဗြဟံဆိုပြီး နာမည်ပေးတယ်။ ဒီအချိန်မှာတော့ ယေဟောဝါက စာရာရဲ့အခန်းကဏ္ဍကို ဦးဆုံးအကြိမ် ဖော်ပြတယ်။ “ငြင်းခုံရန်တွေ့တတ်သူ” လို့ အဓိပ္ပာယ်ရတဲ့ စာရဲဆိုတဲ့နာမည်ကို စာရာလို့ ပြောင်းပေးလိုက်တယ်။ ကျွန်တော်တို့အားလုံး ရင်းနှီးပြီးသား စာရာဆိုတဲ့နာမည်ဟာ “မင်းသမီး” လို့ အဓိပ္ပာယ်ရတယ်။ အဲဒီလိုနာမည်ပေးရတဲ့ အကြောင်းရင်းကို ယေဟောဝါ ရှင်းပြတယ်– “သူ့ကို ငါကောင်းချီးပေးမယ်။ သူက မင်းအတွက် သားတစ်ယောက် မွေးပေးမယ်။ ငါကောင်းချီးပေးမှာမို့လို့ သူ့ဆီကနေ လူမျိုးတွေ၊ ဘုရင်တွေ ဆင်းသက်လာမယ်။”—ကမ္ဘာဦး ၁၇:၅၊ ၁၅၊ ၁၆။
အာဗြဟံရဲ့မျိုးနွယ်ကြောင့် လူမျိုးအားလုံး ကောင်းချီးခံစားမယ်ဆိုတဲ့ ယေဟောဝါရဲ့ကတိဟာ စာရာရဲ့သားကတစ်ဆင့် ပြည့်စုံလာမယ်။ ဘုရားသခင်က အဲဒီသားကို “ရယ်မောသူ” လို့အဓိပ္ပာယ်ရတဲ့ အိဇက်ဆိုပြီး နာမည်ပေးတယ်။ စာရာကို သားတစ်ယောက်ပေးမယ်ဆိုတဲ့ ယေဟောဝါရဲ့ ရည်ရွယ်ချက်ကို သိရတဲ့အခါ အာဗြဟံ ‘ပျပ်ဝပ်ရင်း ရယ်မိတယ်။’ (ကမ္ဘာဦး ၁၇:၁၇) သူ အံ့သြဝမ်းသာ ဖြစ်ခဲ့ရတယ်။ (ရောမ ၄:၁၉၊ ၂၀) စာရာကော။
သိပ်မကြာခင်မှာပဲ သူစိမ်းသုံးယောက် အာဗြဟံရဲ့တဲကို လာတယ်။ နေပူပြင်းတဲ့အချိန်ဖြစ်ပေမဲ့ သက်ကြီးရွယ်အိုမောင်နှံဟာ ဧည့်သည်တွေကို ကဗျာကယာ ကြိုဆိုတယ်။ အာဗြဟံက စာရာကို “ဂျုံနုသုံးဆီယာကို နယ်ပြီး မုန့်လုံးတွေ လုပ်ပါဦး။ မြန်မြန်လေး” လို့ပြောတယ်။ အဲဒီအချိန်တုန်းက ဧည့်ဝတ်ပြုဖို့ဆိုတာ ကရိကထ များတယ်။ အာဗြဟံဟာ ရှိသမျှအလုပ် စာရာကို မလုပ်ခိုင်းဘူး။ သူကိုယ်တိုင် နွားပေါက်တစ်ကောင်ကို သတ်ပြီး ကျွေးမွေးဖို့ အမြန် ပြင်ဆင်တယ်။ (ကမ္ဘာဦး ၁၈:၁-၈) အဲဒီ “လူ” တွေဟာ ယေဟောဝါရဲ့ ကောင်းကင်တမန်တွေ ဖြစ်နေတယ်။ အဲဒီအဖြစ်အပျက်ကို သတိရလို့ တမန်တော်ပေါလုက “ဧည့်ဝတ်ကျေပွန်ဖို့ မမေ့ပါနဲ့။ ဧည့်ဝတ်ပြုခဲ့သူတချို့က ကောင်းကင်တမန်တွေမှန်း မသိဘဲ ဧည့်ဝတ်ပြုခဲ့ကြတယ်” လို့ ရေးတာဖြစ်နိုင်တယ်။ (ဟီဘရူး ၁၃:၂) ဧည့်ဝတ်ပြုရာမှာ အာဗြဟံနဲ့ စာရာရဲ့ စံနမူနာကောင်းကို သင် အတုယူနိုင်မလား။
ကောင်းကင်တမန်တစ်ပါးက စာရာ သားမွေးမယ်ဆိုတဲ့ ဘုရားရဲ့ကတိအကြောင်း အာဗြဟံကို ထပ်ပြောချိန်မှာ စာရာ တဲထဲက နားထောင်နေတယ်။ ဒီအသက်အရွယ်ကျမှ ကလေးရမယ်ဆိုတာ ဘယ်လိုမှ မဖြစ်နိုင်ဘူး။ ဒါကြောင့် “ငါအသက်ကြီးပြီပဲ။ ငါ့သခင်လည်း အိုနေပြီ။ တကယ်ပဲ အဲဒီလိုပျော်နိုင်ပါဦးမလား” လို့ စိတ်ထဲမှာပြောရင်း ရယ်မိတော့တယ်။ ဒါနဲ့ ကောင်းကင်တမန်က “ယေဟောဝါ မတတ်နိုင်တာ ရှိလို့လား” လို့မေးပြီး စာရာကို တည့်မတ်ပေးတယ်။ စာရာလည်း လန့်သွားပြီး “ကျွန်မ မရယ်ပါဘူး” လို့ ငြင်းတဲ့အခါ ကောင်းကင်တမန်က “ခင်ဗျား ရယ်ပါတယ်” လို့ ပြန်ပြောတယ်။—ကမ္ဘာဦး ၁၈:၉-၁၅။
စာရာ အဲဒီလိုရယ်တာ ယုံကြည်ခြင်း မရှိလို့လား။ မဟုတ်ပါဘူး။ “စာရာက အရွယ်လွန်ချိန်မှာတောင် မျိုးနွယ်ကို ကိုယ်ဝန်ဆောင်နိုင်တာလည်း ယုံကြည်ခြင်းကြောင့်ပဲ။ ကတိပေးတဲ့အရှင်ဟာ သစ္စာရှိမှန်း သူယုံတာကိုး” လို့ ကျမ်းစာပြောတယ်။ (ဟီဘရူး ၁၁:၁၁) ယေဟောဝါအကြောင်း စာရာ သိတယ်။ ကတိပေးထားတဲ့အတိုင်း ပြည့်စုံစေနိုင်မှန်းလည်း ယုံတယ်။ အဲဒီလိုယုံကြည်ခြင်းမျိုး ကျွန်တော်တို့ယောက်တိုင်း ရှိဖို့လိုတယ်။ ကျမ်းစာမှာပါတဲ့ ဘုရားသခင်အကြောင်း ကျွန်တော်တို့ ကောင်းကောင်းသိထားရမယ်။ ဒါဆိုရင် စာရာမှာ ယုံကြည်ခြင်း တကယ်ရှိခဲ့မှန်း သိလာမယ်။ ယေဟောဝါဟာ သစ္စာရှိပြီး ကတိတိုင်းကို ပြည့်စုံစေနိုင်တယ်။ တစ်ခါတလေ၊ ကိုယ်တော်ရဲ့လုပ်ဆောင်ပုံဟာ ကျွန်တော်တို့အတွက် အံ့သြစရာကောင်းလွန်းလို့ ရယ်ရတဲ့အထိတောင် ဖြစ်နိုင်တယ်။
“စာရာပြောတာကို နားထောင်လိုက်”
နောက်ဆုံးတော့ စာရာဟာ အသက် ၉၀ အရွယ်မှာ သူ တစ်သက်လုံး တောင့်တခဲ့တဲ့အချိန် ရောက်လာတယ်။ အသက် ၁၀၀ ရှိပြီဖြစ်တဲ့ အာဗြဟံအတွက် သားတစ်ယောက် မွေးပေးတယ်။ အာဗြဟံဟာ ဘုရားမှာထားတဲ့အတိုင်း သားကို အိဇက် ဒါမှမဟုတ် “ရယ်မောသူ” လို့ နာမည်ပေးလိုက်တယ်။ ပင်ပန်းနွမ်းနယ်တဲ့ကြားက ပြုံးနေတဲ့စာရာကို မြင်ယောင်ကြည့်နိုင်တယ်။ “ငါ့ကို ဘုရားသခင် ရယ်မောစေပြီ။ ဒီသတင်းကြားတဲ့သူတိုင်း ငါနဲ့အတူ ရယ်မောကြလိမ့်မယ်” လို့ သူပြောတယ်။ (ကမ္ဘာဦး ၂၁:၆) ယေဟောဝါဆီက ဒီအံ့ဖွယ်လက်ဆောင်ကြောင့် သူ အသက်ရှင်နေသရွေ့ စိတ်ချမ်းသာနေမှာ သေချာတယ်။ ဒါပေမဲ့ ကြီးမားတဲ့တာဝန်တွေလည်း လိုက်ပါလာတယ်။
ကမ္ဘာဦး ၂၁:၈-၁၀။ ဂလာတိ ၄:၂၂၊ ၂၃၊ ၂၉။
အိဇက် အသက်ငါးနှစ်၊ နို့ဖြတ်တဲ့နေ့မှာ အာဗြံဟံတို့မိသားစု စားသောက်ပွဲကြီး လုပ်တယ်။ အဲဒီမှာ အဆင်မပြေတာတစ်ခု ပေါ်လာတယ်။ စိတ်အနှောင့်အယှက်ဖြစ်စေတဲ့ အပြုအမူတစ်ခုကို စာရာ “သတိပြုမိ” တဲ့အကြောင်း ဖတ်ရတယ်။ ဟာဂရရဲ့သား ၁၉ နှစ်အရွယ် အိရှမေလက အိဇက်ကို လှောင်ပြောင်နေတယ်။ အိရှမေလရဲ့အပြုအမူဟာ စနောက်ရုံလောက်ပဲ မဟုတ်ဘူး။ ညှဉ်းဆဲနေတာဖြစ်တယ်လို့ တမန်တော်ပေါလု နောက်ပိုင်းမှာ ရေးခဲ့တယ်။ အဲဒီလို အနိုင်ကျင့်တာဟာ သားရဲ့ရှေ့ရေးအတွက် အန္တရာယ်ရှိမှန်း စာရာ သိနေတယ်။ အိဇက်ဟာ မိမိရဲ့သားဖြစ်ရုံတင်မကဘူး၊ ယေဟောဝါရဲ့ ရည်ရွယ်ချက်မှာ အရေးပါသူဖြစ်မှန်း စာရာ သိထားတယ်။ ဒါကြောင့် သတ္တိမွေးပြီး အာဗြဟံကို တဲ့တိုးပဲ ပြောလိုက်တယ်။ ဟာဂရနဲ့ အိရှမေလကို မောင်းထုတ်ခိုင်းတယ်။—အာဗြဟံ ဘယ်လိုတုံ့ပြန်သလဲ။ “သားနဲ့ပတ်သက်ပြီး စာရာပြောတဲ့စကားကြောင့် အာဗြဟံ တော်တော်စိတ်မကောင်း ဖြစ်သွားတယ်” လို့ ကျမ်းစာပြောတယ်။ ဖခင်တစ်ယောက်အနေနဲ့ သား အိရှမေလကို ချစ်တဲ့စိတ်ပဲ ရှိနေတယ်။ ယေဟောဝါကတော့ ဒီကိစ္စကို ကောင်းကောင်းသိမြင်တဲ့အတွက် ကြားဝင်လုပ်ဆောင်ခဲ့တယ်။ ‘ဒါနဲ့ ဘုရားသခင်က “ကျွန်မိန်းမနဲ့ သူ့ကလေးအကြောင်း စာရာပြောတဲ့စကားကြောင့် စိတ်မကောင်းမဖြစ်နဲ့။ မင်းရဲ့မျိုးနွယ်လို့ အခေါ်ခံရမယ့်သူဟာ အိဇက်ကနေ ဆင်းသက်လာမှာဖြစ်လို့ စာရာပြောတာကို နားထောင်လိုက်” လို့ အာဗြဟံကို ပြောတယ်’ ဆိုပြီး ကျမ်းစာဖော်ပြတယ်။ ဟာဂရနဲ့ သူ့သားကို ထောက်မပေးမယ့်အကြောင်း အာဗြဟံကို ယေဟောဝါ အာမခံတယ်။ အာဗြဟံလည်း ဘုရားပြောတဲ့အတိုင်း လိုက်နာတယ်။—ကမ္ဘာဦး ၂၁:၁၁-၁၄။
စာရာဟာ အာဗြဟံနဲ့တွဲဖက်ညီတဲ့ ဇနီးကောင်းပါပဲ။ တစ်ချိန်လုံး ယောက်ျားအကြိုက်လိုက်ပြီး ပြောနေတဲ့ဇနီးမျိုး မဟုတ်ဘူး။ မိသားစုအကျိုး၊ မိသားစုရှေ့ရေးနဲ့ပတ်သက်လာရင် ယောက်ျားကို ပွင့်ပွင့်လင်းလင်း ပြောတယ်။ ဒီလိုပွင့်လင်းတာကို လေးစားမှုမရှိဘူးလို့ မယူမှတ်သင့်ဘူး။ အိမ်ထောင်သည်ဖြစ်တဲ့ တမန်တော်ပေတရုက စာရာဟာ ယောက်ျားကို အလွန်ရိုသေလေးစားတဲ့ ဇနီးကောင်းဖြစ်တယ်လို့ ပြောခဲ့တယ်။ (၁ ကောရိန္သု ၉:၅။ ၁ ပေတရု ၃:၅၊ ၆) တကယ်တော့ အဲဒီကိစ္စမှာ စာရာ ရေငုံနှုတ်ပိတ်နေလိုက်တာကမှ အာဗြဟံကို မလေးစားရာရောက်တာ။ အာဗြဟံရော မိသားစုတစ်ခုလုံးပါ ဆုံးၡုံးနစ်နာမှုကြီး ကြုံရမှာဖြစ်လို့ပဲ။ စာရာဟာ ပြောစရာရှိတာကို တလေးတစားပြောတယ်။
ဇနီးသည်တွေအတွက် စာရာဟာ သိပ်ကောင်းတဲ့ စံနမူနာရှင်ပါပဲ။ ကိုယ့်ခင်ပွန်းကို ပွင့်ပွင့်လင်းလင်း၊ လေးလေးစားစား ပြောတတ်ဖို့ စာရာဆီက သင်ယူကြတယ်။ ဇနီးသည်တချို့က စာရာရဲ့အဖြစ်မှာလို ယေဟောဝါ ကြားဝင်လုပ်ဆောင်ပေးတာကို မျှော်လင့်တဲ့အခါမျိုး ရှိနိုင်တယ်။ ဘယ်လိုပဲဖြစ်ပါစေ၊ စာရာရဲ့ ထူးခြားတဲ့ ယုံကြည်ခြင်း၊ ချစ်ခြင်း၊ စိတ်ရှည်ခြင်းကနေ သင်ယူနိုင်ပါတယ်။
ယေဟောဝါက စာရာကို “မင်းသမီး” လို့ နာမည်ပေးခဲ့ပေမဲ့ မင်းသမီးတစ်ပါးလို ဆက်ဆံခံရဖို့ သူ မမျှော်လင့်ဘူး
ယေဟောဝါက ချစ်စရာကောင်းတဲ့ ဒီအမျိုးသမီးကို “မင်းသမီး” လို့ နာမည်ပေးခဲ့ပေမဲ့ မင်းသမီးတစ်ပါးလို ဆက်ဆံခံရဖို့ သူ မမျှော်လင့်ဘူး။ အသက် ၁၂၇ နှစ်မှာ စာရာ ဆုံးသွားတဲ့အခါ အာဗြဟံဟာ “စာရာကြောင့် ဝမ်းနည်းပူဆွေးပြီး ငိုကြွေး” တာ အဆန်းမဟုတ်ပါဘူး။ * (ကမ္ဘာဦး ၂၃:၁၊ ၂) သူချစ်ရတဲ့ “မင်းသမီး” ကို လွမ်းဆွတ်တမ်းတနေမှာပဲ။ ယေဟောဝါဘုရားကလည်း သစ္စာရှိတဲ့ ဒီအမျိုးသမီးကို အမှတ်ရနေမှာ သေချာတယ်။ သာယာလှပတဲ့ ကမ္ဘာမြေပေါ် အသက်ပြန်ရှင်လာအောင် လုပ်ပေးဖို့ ကိုယ်တော် ရည်ရွယ်ထားတယ်။ စာရာနဲ့ စာရာရဲ့ယုံကြည်ခြင်းကို အတုယူသူတွေအတွက် ထာဝစဉ်အသက်ရှင်မယ့် ပျော်ရွှင်စရာ အလားအလာ ရှိနေပါတယ်။—ယောဟန် ၅:၂၈၊ ၂၉။
^ စာပိုဒ်၊ 3 ဘုရားသခင် သူတို့ကို နာမည်မပြောင်းပေးခင်တုန်းက အာဗြံနဲ့ စာရဲလို့ ခေါ်တယ်။ ဒါပေမဲ့ သူတို့ရဲ့ လူသိများတဲ့နာမည်ကိုပဲ သုံးပါမယ်။
^ စာပိုဒ်၊ 10 အဲဒီအချိန်တုန်းက မယားအများယူတာ၊ မယားငယ်ယူတာကို ယေဟောဝါ ခွင့်ပြုခဲ့တယ်။ နောက်ပိုင်းမှာတော့ ဧဒင်မှာချမှတ်ခဲ့တဲ့ တစ်လင်တစ်မယားစနစ်ကို ပြန်အကောင်အထည်ဖော်ဖို့ ယေရှုခရစ်ကို အခွင့်အာဏာပေးခဲ့တယ်။—ကမ္ဘာဦး ၂:၂၄။ မဿဲ ၁၉:၃-၉။
^ စာပိုဒ်၊ 25 အမျိုးသမီးတွေထဲမှာ စာရာတစ်ဦးတည်းပဲ အသက်ဘယ်လောက်မှာ သေဆုံးကြောင်း ကျမ်းစာ ဖော်ပြတယ်။