နိုအဲလ်လေးဟာ ပုံဆွဲဝါသနာပါတဲ့ ချစ်စရာ ကလေးတစ်ယောက်ပါ။ နွေရာသီညနေခင်းတစ်ခုမှာ ကလေးဟာ ကစားနေရင်း အိမ်အနောက်က ရေကူးကန်ထဲကို ပြုတ်ကျသွားတယ်။ အသက်လေးနှစ်မပြည့်ခင် နှစ်ပတ်အလိုမှာ ရေနစ်သေဆုံးသွားရှာတယ်။

၂၀၁၂၊ ဒီဇင်ဘာ ၁၄ ရက်၊ အမေရိကန်နိုင်ငံ ကော်နယ်တီးကပ်စ်မြို့ကကျောင်းမှာ လူတစ်ဦးဟာ သေနတ်နဲ့ရမ်းကားပစ်ခတ်လို့ ၂၆ ဦး သေဆုံးသွားတယ်။ အဲဒီထဲမှာ အသက် ၆ နှစ်နဲ့ ၇ နှစ်အရွယ်ရှိတဲ့ ရှားလက်၊ ဒန်နီရယ်၊ အိုလစ်ဗီးယား၊ ဂျိုးဇက်ဖင်း အပါအဝင် ကလေး အယောက် ၂၀ ပါသွားတယ်။ အောက်မေ့ရာပွဲလုပ်တဲ့အချိန်မှာ သမ္မတအိုဘားမားက သေဆုံးသွားတဲ့ ကလေးတွေရဲ့နာမည်တွေကို ဖော်ပြပြီး ဝမ်းနည်းကြေကွဲနေတဲ့ ပရိသတ်ကို “ဒီလိုအဖြစ်ဆိုးမျိုး နောက်ဘယ်တော့မှ မဖြစ်အောင်လုပ်ရမယ်” လို့ ပြောခဲ့တယ်။

အသက်တစ်ဆယ့်ရှစ်နှစ်အရွယ် ဘာနိုက ၁၉၉၆ ခုနှစ်မှာ အီရတ်နိုင်ငံကနေ မိသားစုနဲ့အတူ နော်ဝေးနိုင်ငံကို ပြောင်းလာခဲ့သူပါ။ သူငယ်ချင်းတွေက ချစ်စနိုးနဲ့ သူ့ကို နေရောင်ခြည်လေးလို့ ခေါ်ကြတယ်။ ၂၀၁၁၊ ဇူလိုင် ၂၂ ရက်နေ့မှာ ‘ငါနောက်ထပ် ပစ်မသတ်နိုင်ခဲ့လို့ တောင်းပန်ချင်ပါတယ်’ ဆိုပြီး ကြွားဝါပြောဆိုတဲ့ အစွန်းရောက်သမားရဲ့ သေနတ်ပစ်ခံရမှုကြောင့် သေဆုံးသွားတဲ့သူ ၇၇ ယောက်ရှိတယ်။ ဝမ်းနည်းစရာက သေဆုံးသွားတဲ့သူတွေထဲမှာ ဘာနိုလည်းပါသွားရှာတယ်။