यहोवा तपाईँले उहाँलाई राम्ररी चिनेको चाहनुहुन्छ। किन? किनभने तपाईँले उहाँका गुणहरू, उहाँको तौरतरिका र उहाँको उद्देश्‍यबारे सिक्दै जाँदा उहाँको साथी बन्‍ने इच्छा पनि बढ्‌दै गएको उहाँ चाहनुहुन्छ। के तपाईँ साँच्चै परमेश्‍वरको साथी बन्‍न सक्नुहुन्छ? (भजन २५:१४ पढ्‌नुहोस्‌।) तपाईँ कसरी उहाँको साथी बन्‍न सक्नुहुन्छ? बाइबलले यी प्रश्‍नहरूको जवाफ दिनुका साथै अरूसितको मित्रताभन्दा यहोवासितको मित्रता किन विशेष हो भनेर बताउँछ।

१. यहोवा तपाईँलाई के गर्न आग्रह गर्नुहुन्छ?

“परमेश्‍वरसित नजिक होओ र उहाँ तिमीहरूसित नजिक हुनुहुनेछ।” (याकुब ४:८) यसको अर्थ के हो? यहोवा तपाईँलाई उहाँको साथी बन्‍न आग्रह गर्दै हुनुहुन्छ। कसै-कसैलाई परमेश्‍वरको साथी बन्‍न सकिँदैन जस्तो लाग्छ किनभने तिनीहरूले उहाँलाई देखेका छैनन्‌। तर यहोवासित नजिक हुन हामीले उहाँको व्यक्‍तित्वबारे थाह पाउनुपर्ने सबै कुरा उहाँले आफ्नो वचन बाइबलमा बताउनुभएको छ। हुनत हामीले यहोवालाई कहिल्यै देखेका छैनौँ तर उहाँले हाम्रो लागि बाइबलमा दिनुभएको सन्देश पढ्‌दा उहाँसितको मित्रता बलियो हुँदै जान्छ।

२. यहोवा किन तपाईँको सबैभन्दा मिल्ने साथी बन्‍न सक्नुहुन्छ?

यहोवाले जत्तिको माया तपाईँलाई अरू कसैले गर्दैन। उहाँ तपाईँ खुसी भएको अनि मदत चाहिएको जुनसुकै बेला उहाँलाई पुकारेको चाहनुहुन्छ। तपाईँ ‘आफ्नो सारा फिक्री उहाँमाथि बिसाउन सक्नुहुन्छ। किनकि उहाँले तपाईँको ख्याल राख्नुहुन्छ।’ (१ पत्रुस ५:७) यहोवा आफ्ना साथीहरूलाई साथ दिन, सान्त्वना दिन र तिनीहरूको कुरा सुन्‍न सधैँ तयार हुनुहुन्छ।—भजन ९४:१८, १९ पढ्‌नुहोस्‌।

३. यहोवा आफ्ना साथीहरूले के गरेको चाहनुहुन्छ?

यहोवा सबैलाई प्रेम गर्नुहुन्छ “तर सोझो मानिसलाई उहाँ आफ्नो मित्र बनाउनुहुन्छ।” (हितोपदेश ३:३२) यहोवा आफ्ना साथीहरूले उहाँको नजरमा जे असल छ, त्यो गर्न र जे खराब छ, त्यसबाट टाढै रहन कोसिस गरेको चाहनुहुन्छ। कसै-कसैलाई यहोवाले भन्‍नुभएको सबै असल काम गर्न र उहाँले गलत ठहराउनुभएको सबै कामबाट अलग रहन सकिँदैन जस्तो लाग्ला। तर यहोवा ठूलो मनको हुनुहुन्छ। उहाँलाई साँच्चै प्रेम गर्ने र उहाँलाई खुसी बनाउन सक्दो प्रयास गर्ने सबैलाई उहाँ स्विकार्नुहुन्छ।—भजन १४७:११; प्रेषित १०:३४, ३५.

 अझ खोतल्नुहोस्‌

४. अब्राहाम यहोवाका साथी थिए

बाइबलमा भएको अब्राहामको (अब्राम पनि भनिन्छ) विवरणले हामीलाई परमेश्‍वरको साथी बन्‍नु भनेको के हो भनेर बुझ्न मदत गर्छ। उत्पत्ति १२:१-४ मा अब्राहामबारे पढ्‌नुहोस्‌। त्यसपछि यी प्रश्‍नहरू छलफल गर्नुहोस्‌:

• यहोवाले अब्राहामलाई के गर्न भन्‍नुभयो?

• यहोवाले तिनीसित कस्तो प्रतिज्ञा गर्नुभयो?

• तिनले यहोवाबाट आज्ञा पाएपछि के गरे?

५. यहोवाले आफ्ना साथीहरूबाट चाहनुहुने कुराहरू

हामी अक्सर आफ्ना साथीहरूले केही गरेको आशा गर्छौँ।

• साथीहरूले तपाईँसित कस्तो व्यवहार गरेको चाहनुहुन्छ?

पहिलो युहन्‍ना ५:३ पढ्‌नुहोस्‌ अनि यो प्रश्‍न छलफल गर्नुहोस्‌:

• यहोवा आफ्ना साथीहरूले के गरेको चाहनुहुन्छ?

यहोवाको आज्ञा पालन गर्न हामीले आफ्नो आचरण राम्रो बनाउनुपर्ने वा नराम्रा गुणहरू हटाउनुपर्ने हुन सक्छ। यसैया ४८:१७, १८ पढ्‌नुहोस्‌ अनि यो प्रश्‍न छलफल गर्नुहोस्‌:

• यहोवा किन आफ्ना साथीहरूले जीवनमा परिवर्तनहरू गरेको चाहनुहुन्छ?

 ६. यहोवाले आफ्ना साथीहरूको लागि गर्नुहुने कुराहरू

 सारांश

यहोवा तपाईँको साथी बन्‍न चाहनुहुन्छ अनि तपाईँलाई उहाँसित नजिक हुन मदत गर्नुहुन्छ।

तपाईँले के सिक्नुभयो?

• यहोवा आफ्ना साथीहरूलाई कसरी मदत गर्नुहुन्छ?

• यहोवा किन आफ्ना साथीहरूले जीवनमा परिवर्तनहरू गरेको चाहनुहुन्छ?

• के तपाईँको विचारमा यहोवाको साथी बन्‍न असाध्यै गाह्रो छ? तपाईँलाई किन त्यस्तो लाग्छ?