KONIMA yeso lyaSimsoni, Samuel oye a li omupolofeti nomutokolihapu muIsraeli. Aaisraeli oya kala noku mu lombwela kutya oya hala okukala ya fa iigwana iikwawo nokukala ye na omukwaniilwa gwopantu gwoku ya pangela. Nonando eindilo ndika olya li lya yemateke Jehova, Jehova okwa lombwele Samuel a ninge shoka taya pula. Kalunga okwa li a hogolola omulumentu omwiifupipiki gwedhina Saul oye a ninge omukwaniilwa. Ihe nonando ongaaka, konima yethimbo, Omukwaniilwa Saul okwa ningi omunuuntsa noiha vulika. Jehova okwa li e mu kutha uuthemba wokukala omukwaniilwa e ta lombwele Samuel a langeke po omukwaniilwa gulwe, omulumentu omugundjuka gwedhina David. Ihe opwa li pu na okupita oomvula dhontumba opo David a tameke okupangela e li omukwaniilwa.

Manga tashi vulika David a li e na oomvula omulongo nasha, okwa li a ka talela po aamwahe mboka ya li aakwiita metangakwiita lyaSaul. Etangakwiita alihe olya li lya tila omukwiita gumwe gwomaatondi yalyo, omutongolume gwedhina Goliat, ngoka a kala noku ya sheka pamwe naKalunga kawo. Shika osha li shu uvitha nayi David nokwa tokola a ka kondjithe omutongolume ngoka. Omugundjuka David ngoka a li owala e na oshuumbitho shomamanya nomamanya, okwa yi a ka tsakaneke omukondjithi gwe ngono a li e na uule wu vulithe poometa omugoyi. Sho Goliat a li ta sheke David, David okwa yamukula kutya ye okwa homata e vule omutongolume nguka, molwaashoka okwa li ta ka kondja medhina lyaJehova Kalunga! David okwa dhipaga Goliat nemanya limwe alike nokwa tete ko omutse gwomutongolume ngoka negonga lye mwene. Molwaashoka etanga lyAafilisti olya li lya tila, olya fadhuka po.

Petameko, Saul okwa li a kuminwa uulaadhi womugundjuka nguka David nokwe mu tula metangakwiita lye. Ihe Saul okwa li a sila David ondumbo noonkondo omolwokupondola kwe. David okwa li e na okuya ontuku omolwomwenyo gwe e ta kala ontauki uule woomvula. Ihe nonando ongawo, David okwa kala omudhiginini komukwaniilwa ngoka a li ta kambadhala oku mu dhipaga, molwaashono oku shi shi kutya omukwaniilwa Saul okwa langekwa po kuJehova Kalunga. Hugunina, Saul okwa sile molugodhi. Konima yeso lyaSaul, David okwa ningi omukwaniilwa ngaashi Jehova a li e shi uvaneke.

Omukwaniilwa David okwa li a halelela okutungila Jehova otempeli. Ihe nonando ongaaka, Jehova okwa lombwele David kutya gumwe gwomoluvalo lwe oye te ke shi ninga. Omwanamati gwaDavid, Salomo oye a ka tunga otempeli. Nonando ongawo, Kalunga okwa li a laleke nuuyamba David mokuninga ehangano naye. Okwe mu uvanekele kutya ezimo lye otali ka kala ezimo lyaakwaniilwa lya yooloka ko komakwawo. Mezimo ndyoka omo mwa li tamu ka za Omuhupithi nenge Oluvalo ndono lwa li lwu uvanekwa moshikunino shaEden. Omuhupithi nguka okwa li ta ka kala Mesiasa, shoka tashi ti “Omugwayekwa” a langekwa po kuKalunga. Jehova okwa li u uvaneke kutya Mesiasa ota ka kala Omupangeli gwepangelo nenge gwUukwaniilwa mboka tawu ka kala ko sigo aluhe.

Molwaashoka David okwa li a pandula noonkondo, okwa gongele iitungitho oyindji niiyela yondilo yokutungitha otempeli. Okwa li wo a nyola omapisalomi ogendji ga nwethwa mo. Pehulilo lyokukalamwenyo kwe, David okwa li a popi a ti: “Ombepo yaKalunga otayi popi mungame, etumwalaka lye oli li komilungu dhandje.”—2 Samuel 23:2.

—Uuyelele moshitopolwa shika owa kankamena kuSamuel gwo-1 nokuSamuel omuti-2; Ondjalulo yo-1; Jesaja 9:7; Mateus 21:9; Lukas 1:32; Johannes 7:42.