SHO aantu yi indjipala, uulunde nuukolokoshi owa taandele neendelelo kombanda yevi. Henok ngoka a li oye awike omupolofeti pethimbo ndyoka, okwa li a londodha aantu kutya Kalunga ota ka hanagula po aakolokoshi esiku limwe. Ihe nando ongaaka, uuwinayi owa li wi indjipala nowa li nokuli wa nayipala. Aayengeli yamwe oya li ya tukulile Jehova oshipotha mokuthiga po omahala gawo megulu e tayi izaleke omalutu gopantu kombanda yevi noyi ikuthile aakiintu ya ninge aakulukadhi yawo. Sho ya yi momilalao kaadhi shi dhopaunshitwe naakiintu mboka, oya vala aalefule mboka ya li wo hayi ithanwa Aanefilim. Aalefule mboka oya li ya humitha komeho elongitho lyoonkondo netilohi lyombinzi kombanda yevi. Kalunga okwa li a yemata noonkondo sho a mono eshito lye lyokombanda yevi tali yonwa.

Konima yeso lyaHenok, opwa li natango omulumentu gumwe omuyuuki gwedhina Noowa. Noowa nuukwanegumbo we oya li ya kambadhala okulonga shoka shu uka koshipala shaKalunga. Sho Kalunga a tokola okuhanagula po aakolokoshi yopethimbo ndyoka, okwa li a gamene Noowa nosho wo iinamwenyo. Onkee ano, Kalunga okwa li e mu lombwele a tunge onguluwato, sha hala okutya, ombautu onenenene. Monguluwato moka omo mwa li tamu ka hupithilwa Noowa nuukwanegumbo we pamwe niinamwenyo oyindji yomaludhi gi ili nogi ili ngele eyelu lye ya. Noowa okwa li a vulika kuKalunga. Momukokomoko gwoomvula 40 nenge 50 ndhoka Noowa a kala ta tungu onguluwato ndjoka, okwa kala wo ‘omuuvithi gwuuyuuki.’ (2 Petrus 2:5) Okwa li a londodha aantu kombinga yEyelu ndyoka lya li tali ke ya, ihe inaya pulakena kuye. Ethimbo olya thikana opo Noowa nuukwanegumbo we nosho wo iinamwenyo ya ye monguluwato. Konima sho ya yi mo, Kalunga okwe edhile omweelo gwonguluwato. Omvula oya tameke okuloka.

Omvula onene oya loko omasiku 40 omutenya nuusiku sigo omeya ga siikile evi alihe. Aakolokoshi ayehe oya hanagulwa po. Konima yoomwedhi dhontumba sho omeya ge ende taga pwine onguluwato oya hakele kondundu. Noowa nuukwanegumbo we oya li ya kala monguluwato moka uule womvula ayihe. Noowa okwa li a ningi omafikiloyambo opo a pandule Jehova. Kalunga okwa li u ulike kutya okwe ga taamba ko mokushilipaleka Noowa nuukwanegumbo we kutya ita ka hanagula po we nando aantu kombanda yevi neyelu. Jehova okwa li e eta uutamvula wu kale endhindhiliko li wetike ndyoka tali kala nokudhimbulukitha aantu shi na ko nasha neuvaneko lye tali hekeleke.

Konima yEyelu, Kalunga okwa li wo a pe aantu iipango yontumba iipe. Okwa li e ya pe epitikilo ya lye onyama yiinamwenyo. Ihe nando ongaaka, okwa li e yi indike okulya ombinzi. Okwa li wo a lombwele oluvalo lwaNoowa lwi ihanene nevi alihe, ihe yamwe yomuyo inaya vulika kwaashoka. Aantu oya li ya hangana kohi yomupangeli gwedhina Nimrod e taya tameke okutunga oshungo onene moshilando Babel, shoka konima yethimbo sha li shi ithanwa Babilonia. Oya li ya ningi ngaaka, molwaashoka kaya li ya hala okuvulika kelombwelo lyaKalunga li na ko nasha nokwiihanena nevi alihe. Kalunga okwa li a yi iilonga aatangalali mboka moshipala opo kaaya tsikile nokutunga mokuvundakanitha elaka lyawo e te ya ningitha ya popye omalaka gi ili nogi ili. Molwaashoka kaya li taya vulu okuuvathana, oya li ya thigi po iilonga mbyoka e ta ya halakana nevi alihe.

—Uuyelele moshitopolwa shika owa kankamena kuGenesis ontopolwa 6 sigo 11; Judas 14, 15.