1. ¿Tlenon techmakas Jehová?

 TLEN tikchiaj ika tlayekapan melak kualtsin: Jehová yotechijli ika uelis nochipa tinemiskej. Sekimej itekipanojkauan kichiaj nemiskej iluikak kampa xok keman mikiskej (1 Cor. 15:50, 53). San ika, más miyekej kichiaj nochipa nemiskej ipan tlaltikpaktli kampa ika inyojlo nemiskej niman xok kualoskej (Apoc. 21:3, 4). Maski tla tiaskej iluikak noso tokauaskej ipan tlaltikpaktli, tinochimej tiktlasojkaitaj tlen tikchiaj ika tlayekapan.

2. ¿Tleka tikmatstokej ika tlen tikchiaj yemelak panos, niman tleka ijkon tikijtouaj?

² ¿Tlenon teasikamachiltisneki Biblia ijkuak tlajtoua itech tlamachialistli? Kineki teasikamachiltis ika yemelak nochiuas tlen kualtsin. Tejuamej uelis kuajli tikmatstoskej ika yemelak nochipa tinemiskej pampa Jehová yejua akin ijkon techijlia (Rom. 15:13). Niman tikmatstokej ika Jehová nochipa kichiua tlen kijtoua (Núm. 23:19). Niman noijki kuajli tikmatstokej ika Jehová kineki niman uelis kichiuas nochi tlen yokijto. Tlen tikchiaj xsan tiknejnemiliaj noso ijkon tikijtouaj pampa tikuelitaskiaj ijkon tinemiskej, ka, tlen tikchiaj yemelak panos pampa onka tlen techititia ika yemelak nochiuas tlen tikchiaj.

3. ¿Tlenon tikitaskej ipan yejuin tlamachtijli? (Salmo 71:5).

³ ToTajtsin iluikakchane melak techtlasojtla niman kineki itech matitlaneltokakan (xpoua Salmo 71:5). Tla nochipa tikilnamiktokej tlen Jehová yokijto techmakas, uelis titlaxikoskej niman tiyolpakiskej ijkuak tikixnamikiskej tlen ouijtika. Ipan yejuin tlamachtijli tikitaskej kenon tla nochipa tikilnamikij tlen tikchiaj ika tlayekapan, melak techpaleuis. Kachtopa tikitaskej tleka tikijtouaj ika tlen tikchiaj ika tlayekapan yeskia kentla se ancla niman kentla se casco. Niman sakin tikitaskej tlenon uelis tikchiuaskej  niman ijkon nochipa tikilnamiktoskej tlen tikchiaj ika tlayekapan.

4. ¿Tleka tlen tikchiaj ika tlayekapan yeskia kentla se ancla? (Hebreos 6:19).

⁴ Ijkuak apóstol Pablo okomintlajkuilouili hebreos, okimijli ika totlamachialis yeskia kentla se ancla (xpoua Hebreos 6:19). Pablo miyekpa yaya ipan barco, ika yejon, kimatstoya ika anclas kipaleuiayaj barco maka oksekan mauiya. Sejpa, ijkuak yaya ipan se barco, opeuj chikauak ajakakiyaui. Ijkuakon okitak kenon akin kuikayaj barco okomintlajkalkej anclas ipan mar niman ijkon barco xonteliuis kampa onkatkaj temej (Hech. 27:29, 39-41). Ijkon ken se ancla kipaleuiya se barco maka oksekan mauiya ijkuak ajakakiyaui, tlen tikchiaj ika tlayekapan techpaleuiya ijkuak tikpiyaj se tlauejli niman ijkon maka oksekan matiuiyan, noso maka matijkauakan Jehová. Tlen tikchiaj ika tlayekapan techpaleuiya maka sajnoye matajmanakan ijkuak tikixnamikiskej se tlauejli pampa techilnamiktia ika xnochipa ijkon tinemiskej. Matikilnamikikan ika Jesús okijto ika techtlaueltokaskej (Juan 15:20). Kuakon, tla tejuamej nochipa tikilnamikij tlen kualtsin techmakas Jehová, techpaleuis nochipa kuajli matiktekichiuilikan.

5. ¿Kenon tlen Jesús kichiaya ika tlayekapan okipaleui matlaxiko ijkuak ikimiktiskiaj?

⁵ Matikitakan kenon tlen Jesús kichiaya ika tlayekapan okipaleui mamelajkanemi itech Jehová maski kimatstoya ika melak kitlajyouiltiskiaj ijkuak kimiktiskiaj. Ipan iluitl Pentecostés itech xiuitl 33, apóstol Pedro okiteneuj se teotlajtojli tlen onka ipan Salmos kampa kijtoua kenon Jesús yolseujtoskia niman tlaneltokaskia itech iTajtsin ijkuak kimiktiskiaj: “Ninoseuis ikan tlamachalistli, pampa xtikauilis noalma nokauas ne miktlan, nion xtikauilis itlalnakayo moyolchipajkatekitkau para ma ijtlakaui. [...] Niman tinechyoltemitis ikan paktli chika ninemi mixpan” (Hech. 2:25-28; Sal. 16:8-11). Jesús kimatstoya ika kimiktiskiaj, san ika, noijki kimatstoya ika iTajtsin kiyolitiskia niman ika melak yolpakiskia pampa oksejpa yaskia iluikak iuan iTajtsin (Heb. 12:2, 3).

6. ¿Tlenon okipaleui tokniuj Leonard makixiko tlen okixnamik?

⁶ Miyekej tokniuan yokinpaleui tlen tikchiaj ika tlayekapan makixikokan tlen melak ouijtika. Matikitakan tlen ipan onochiuj Leonard Chinn, se tokniuj akin omelajkanen niman chantiya Inglaterra. Ijkuak panotoya Kachtopa Guerra ipan nochi tlaltikpaktli okitsajkej pampa xokinek oyaj guerra. Ome metstli xokikauilijkej yakaj makita niman sakin chikauak okitekitiltijkej. Sakin, yejua okijkuilo: “Tlen nopan onochiuj onechpaleui manikasikamati ika tla tiknekij titlaxikoskej, noneki tikilnamiktoskej tlen tikchiaj ika tlayekapan. Tejuamej tikmatstokej tlen okichiuj Jesús, tlen okichiujkej apóstoles niman teotlajtokej, niman noijki tikmatstokej tlen Biblia kijtoua ika panos ika tlayekapan. Nochi yejuin techpaleuiya matitlaxikokan niman techilnamiktia ika tlen tikchiaj yemelak panos”. Ken tikitaj, tokniuj Leonard ouel otlaxiko pampa xkeman okilkauj tlen tikchiaj ika tlayekapan, tlen yeskia kentla se ancla. Kuakon, tejuamej noijki uelis melak techpaleuis tlen tikchiaj ika tlayekapan.

7. ¿Tlenon panoua ijkuak tikxikouaj tlen tikixnamikij? (Romanos 5:3-5; Santiago 1:12).

⁷ Ijkuak tikixnamiktokej tlen ouijtika niman tikitaj ika Jehová techpaleuiya, techititia ika tikyolpaktijtokej; niman yejon kichiua más matikneltokakan ika kema techmakas tlen yotechijli (xpoua Romanos 5:3-5; Santiago 1:12). Kanaj ijkuak kemach opeuj tomachtiaj, xmás tikneltokayaj ika nochiuas tlen tikchiaj ika tlayekapan. San ika, aman más kuajli tikmatstokej ika kema nochiuas nochi tlen Jehová yokijto. Satanás xkuelitaskia matitlaxikokan ijkuak itlaj tikixnamikij, san ika, matikilnamikikan ika tla Jehová techpaleuiya, kema uelis titlaxikoskej.

8. ¿Tleka tlen tikchiaj ika tlayekapan yeskia kentla se casco? (1 Tesalonicenses 5:8).

⁸ Biblia noijki techijlia ika totlamachialis yeskia kentla se casco (xpoua 1 Tesalonicenses 5:8). Yeuejkaui, se soldado nonekiya kimanas icasco niman ijkon xkikokoskej ipan itsontekon. Aman tejuamej noijki tinemij ipan se guerra kampa Satanás techixnamiki, yejua kineki matiknemilikan tlen xkuajli niman kineki kijtlakos totlamachilis. Ika yejon, melak noneki matotlajpiyakan. Ijkon ken se casco kitlajpiya itsontekon se soldado, tlen tikchiaj ika tlayekapan kitlajpiya totlamachilis niman ijkon uelis timelajkanemiskej itech Jehová.

9. ¿Tlenon panoua ijkuak tlaltikpakchanejkej xtlaneltokaj itech tlen toTajtsin kichiuas ika tlayekapan?

⁹ Tla san tiknemilijtokej kenon toyolpaktiskej, uelis tikilkauaskej tlen tikchiaj ika tlayekapan. San ika, tla nochipa tikilnamikij tlen Jehová techmakas, techpaleuis kuajli matiktlapejpenikan tlen tikchiuaskej. Matitlanemilikan itech tlen inpan onochiuj sekimej tokniuan akin chantiyaj Corinto. Yejuamej xok kineltokayaj ika Jehová kinyolitis akin yomijkej (1 Cor. 15:12). Pablo okijto ika akin xkineltokayaj ika toTajtsin teyolitis, san kinemilijtoyaj kenon noyolpaktiskej (1 Cor. 15:32). Aman noijki nemij miyekej akin san kinekij noyolpaktiskej pampa xtlaneltokaj itech tlen toTajtsin kichiuas ika tlayekapan. San ika, tejuamej xijkon tikchiuaj, tejuamej kema tikneltokaj tlen toTajtsin kichiuas ika tlayekapan. Tlen tikchiaj ika tlayekapan yeskia kentla se casco tlen kitlajpiya totlamachilis niman techpaleuiya maka sa no tejuamej matoyolpaktikan pampa yejon ueliskia kichiuas maka sa matouikakan iuan Jehová (1 Cor. 15:33, 34).

10. ¿Kenon noijki techpaleuiya tlen tikchiaj ika tlayekapan?

¹⁰ Tocasco, noso tlen tikchiaj ika tlayekapan, noijki techpaleuiya maka matiknemilikan ika xkeman uelis tikyolpaktiskej Jehová. Kanaj yakaj uelis kinemilis: “Nejua xkeman uelis nikselis nemilistli tlen xkeman tlamis pampa melak nitlajtlakole. Xkeman uelis nikyolpaktis Jehová ijkon ken yejua kineki”. Matikilnamikikan ika Elifaz, se akin okiyolkoko Job, okijli yejuin: “Xnemi nion se tlakatl yejuan chipauak”. Niman sakin okijto: “Dios xkitlalia iyojlo nion intech iángeles, niman nion on cielo kita xchipauak” (Job 15:14, 15). Tlen okijto Elifaz xmelauak. Matikilnamikikan ika Satanás yejua akin kineki ijkon matitlanemilikan. Yejua kimatstok ika tla peua ijkon titlanemiliaj, xok tikneltokaskej ika Jehová techmakas nemilistli tlen xkeman tlamis. Kuakon, maka ijkon matitlanemilikan, yej matiknemilikan tlen kualtsin techmakas Jehová. Maka matikilkauakan ika Jehová kinektok techpaleuis para matikpiyakan nemilistli tlen xkeman tlamis (1 Tim. 2:3, 4).

11. ¿Tleka tikmatstokej ika kema nochiuas tlen tikchiaj?

¹¹ Kemantika ueliskia xok tikneltokaskej tlen toTajtsin kichiuas ika tlayekapan. Kanaj tikuelitaskiaj ika toTajtsin nimantsin makichiua tlen yokijto, ika yejon, tosiaujkauaj. San ika, matikilnamikikan ika toTajtsin nochipa nemi niman yejua xkita tonajli ijkon ken tejuamej (2 Ped. 3:8, 9). Yejua kema kichiuas tlen yokijto, san ika, kanaj xkichiuas ijkuak tejuamej tikuelitaskiaj. Kuakon, ¿tlenon techpaleuis maka matosiaujkauakan niman nochipa matikneltokakan ika kema nochiuas tlen tikchiaj? (Sant. 5:7, 8).

12. Ken kijtoua Hebreos 11:1, 6, ¿kenon uelis tikneltokaskej ika nochiuas tlen tikchiaj?

¹² ¿Tlenon noneki tikchiuaskej tla tiknekij nochipa tikneltokaskej ika kema nochiuas tlen tikchiaj? Noneki nochipa tinemiskej iuan Jehová pampa san yejua uelis kichiuas tlen yotechijli. Noijki, Biblia kijtoua ika tla tikneltokaj ika Jehová nemi niman ika yejua kinteochiua “on yejuan  melauak kitejtemouaj”, uelis tikneltokaskej ika nochiuas tlen tikchiaj (xpoua Hebreos 11:1, 6). Tla tejuamej ika nochi toyojlo tikneltokaj ika Jehová yemelak nemi, más tikneltokaskej ika kichiuas nochi tlen yokijto. Matikitakan kenon uelis más iuan touikaskej niman ijkon nochipa tikilnamiktoskej tlen tikchiaj ika tlayekapan.

13. ¿Kenon uelis touikaskej iuan toTajtsin?

¹³ Matiknotsakan Jehová niman matikamapouakan iTlajtol. Tejuamej uelis touikaskej iuan Jehová maski xueli tikitaj. Ijkuak tikchiuiliaj teoyotl, uelis tikmatstoskej ika yejua techkaki (Jer. 29:11, 12). Niman tejuamej tijkakij Jehová ijkuak tikamapouaj iTlajtol niman itech titlanemiliaj. Ijkuak tikitaj ipan Biblia kenon Jehová okintlajpix itekipanojkauan akin itech omelajkanenkej, techpaleuiya nochipa matikilnamiktokan ika tlen tikchiaj ika tlayekapan yemelak nochiuas. Nochi tlen onka ipan iTlajtol toTajtsin “onijkuiloj para techmachtia. Onijkuiloj para on ijyouilistli niman teyoltlalilistli ma techmaka tlamachalistli” (Rom. 15:4).

14. ¿Kenon techpaleuis tla titlanemiliaj itech kenon yeuejkaui Jehová okichiuj tlen okijto?

¹⁴ Matitlanemilikan itech kenon Jehová yokichiuj tlen okijto. San matontlanemilikan itech Abrahán niman Sara. Jehová okimijli ika kinmakaskia se inkoneuj maski yejuamej iuejueyimej katkaj niman xok ueliskiaj kinpiyaskiaj inkoneuan (Gén. 18:10). ¿Tlenon okichiuj Abrahán ijkuak okijlikej ika kipiyaskia se ikoneuj? Biblia kijtoua: “Okineltokak ika Dios okitlalij tajtli ipan miyek países” (Rom. 4:18). Maski Abrahán xkimatiya kenon Jehová kichiuaskia tlen yokijlika, yejua itech otlaneltokak. Niman ijkuak okipixkej inkoneuj, yejua niman isiuatsin melak oyolpajkej (Rom. 4:19-21). Ijkuak tikamapouaj ipan Biblia kenon Jehová okichiuj tlen yejua okijto, techpaleuiya más matikneltokakan ika yejua kichiuas tlen yotechijli, maski kemantika ueliskia tiknemiliskej ika xuelis nochiuas.

15. ¿Tleka noneki titlanemiliskej itech tlen Jehová yokichiuj topampa?

 ¹⁵ Matitlanemilikan itech kenon Jehová yotechpaleui. ¿Kemantika yotitlanemilijka itech kenon Jehová yomitspaleui ijkon ken yokijto ipan Biblia? San seki matikonteneuakan. Jesús okijto ika iTaj techmakaskia tlen ika topanoltiskej (Mat. 6:32, 33). Noijki okijto ika Jehová techmakaskia iespíritu santo tla tiktlajtlaniliaj (Luc. 11:13). ¿Xmelak ika Jehová yotechmakak nochi yejuin? Kema. Noijki, Jehová yokijtojka ika techtlapopoluiskia, techyolseuiskia niman techmakaskia tlen ika tikchikauaskiaj totlaneltok, niman kanaj yotikitak ika Jehová yokichiuj yejuin mopampa (Mat. 6:14; 24:45; 2 Cor. 1:3). Tla titlanemiliaj itech nochi tlen Jehová yokichiuj topampa, techpaleuis nochipa matikilnamiktokan ika yemelak nochiuas tlen tikchiaj ika tlayekapan.

16. ¿Tleka tlen tikchiaj ika tlayekapan se itetlayokolil Jehová?

¹⁶ Tlen tikchiaj ika tlayekapan se itetlayokolil Jehová. Tikmatstokej ika tlen tikchiaj ika tlayekapan yemelak nochiuas, niman sa tiknektokej mayejko yejon tonajli ijkuak nochipa tinemiskej. Tlen tikchiaj ika tlayekapan yeskia kentla se ancla pampa techpaleuiya matitlaxikokan ijkuak tikixnamikij tlen ouijtika, ijkuak techtlaueltokaj noso ijkuak tikixnamikij itlaj tlen ueliskia techmiktis. Noijki yeskia kentla se casco pampa kitlajpiya totlamachilis niman techpaleuiya maka matiknemilikan tlen xkuajli niman matiknemilikan tlen kuajli. Ijkuak tikitaj ipan Biblia tlen tikchiaj ika tlayekapan, techpaleuiya más matiknisiuikan Jehová niman techititia ika yejua melak techtlasojtla. Niman tla xkeman tikilkauaj tlen tikchiaj ika tlayekapan, melak techpaleuis.

17. ¿Tleka techyolpaktia tlen tikchiaj ika tlayekapan?

¹⁷ Ijkuak apóstol Pablo okomintlajkuilouili tokniuan romanos, ijkin okimijli: “Xpakanemikan ipampa nemotlamachalis” (Rom. 12:12). Pablo melak yolpakiya pampa kimatstoya ika tla melajkanemiya itech Jehová, kiseliskia nemilistli tlen xkeman tlamis ne iluikak. Tejuamej noijki uelis tiyolpakiskej pampa melak kualtsin tlen tikchiaj ika tlayekapan niman tikmatstokej ika Jehová kichiuas nochi tlen yotechijli. Niman ken okijto se salmista: “Sanoyej paki [...] on yejuan kitlalia nochi itlamachalis itech iTEKO Dios. [...] Yejua nochipa kichiua on tlen kijtoua” (Sal. 146:5, 6).