Ko e vala tala nei kua fakatutala ke he tau hūhū kua liga hūhū e koe mo e fakakite e matakavi ka totou e koe e tau tali he Tohi Tapu haau. To fiafia e Tau Fakamoli a Iehova ke fakatutala e tau tali nei mo koe.

1. Ko hai e tau agelu?

Ko e tau agelu ko e tau mena momoui fakaagaaga ha he lagi. Kua mua atu e moui ha lautolu ke he moui he tagata. Ko e Atua mooli, ko ia foki ko e agaaga, ne tufuga e ia e tau agelu ato tufuga e lalolagi. (Iopu 38:4, 7; Mataio 18:10) Totou miliona e tau agelu fakamooli ne agaagai ia Iehova.—Totou Salamo 103:20, 21; Tanielu 7:9, 10.

2. Lagomatai kia he tau agelu e tau tagata?

Ne lagomatai he tau agelu e tagata tututonu ko Lota. Nofo a ia he maaga ne fifili he Atua ke moumou ha kua kelea e tau tagata. Ua e agelu ne hataki a Lota mo e magafaoa haana ke fehola. Ne manatu e falu tagata ko e tala fekī e hatakiaga ti fakaheu ai. Ka kua hao a Lota mo e fanau fifine haana ha kua omaoma a lautolu ke he hatakiaga ne fakafano mai he Atua puhala he tau agelu.—Totou Kenese 19:1, 13-17, 26.

I loto he Tohi Tapu, kua lagomatai he tau agelu e tau tagata he vahā nei he takitaki e gahua ha lautolu kua fakamatala fakamooli e tala mitaki he Kautu he Atua. (Mataio 24:14) Kua putoia he tala mitaki e hatakiaga. Tuga e hatakiaga ne age ki a Lota, nakai ko e tala fekī anei. Ne moua mai ai he Atua puhala he tau agelu.—Totou Fakakiteaga 1:1; 14:6, 7.

Maeke e Atua ke fakaaoga e tau agelu ke fakamalolō a tautolu ka fehagai a tautolu mo e tau kamatamata. Ne fakaaoga e ia e agelu ke fakamalolō a Iesu.—Totou Luka 22:41-43.

Nakai leva to fakaaoga he Atua e tau agelu ke he taha puhala foki—ke utakehe e tau tagata mahani kelea ne fakatupu e matematekelea. To tamai ai e fakatotokaaga fiafia ke he tau tagata.—Totou 2 Tesalonia 1:6-8.

 3. Lauia fēfē a tautolu he tau temoni?

Tuga ni e tokologa he tau tagata he lalolagi ne mahani kelea he nakai omaoma ke he Atua, kua pihia foki i luga he lagi ne tokologa e tau agelu ne totoko ke he Atua. (2 Peteru 2:4) Ko e tau agelu nakai omaoma ne fakahigoa ko e tau temoni. Ko e temoni ne mua hake ia lautolu ko Satani ko e Tiapolo. Ko Satani mo e tau temoni haana kua fakahehē e tau tagata.—Totou Fakakiteaga 12:9.

Ne fakaaoga e Satani e tau puhala pisinisi kolokolovao, tau fakatufono he tagata, mo e tau lotu fakavai ke fakahehē e tau tagata mo e fuluhi kehe a lautolu mai he Atua. Ko e mena ia, ko Satani ne fakatupu e nakai fakafili tonu, favale, mo e matematekelea kua lauia e tau tagata.—Totou 1 Ioane 5:19.

4. Fakahehē fēfē he tau temoni e tau tagata?

Tokologa e tagata ne fakavaia e Satani he fakaako ko e tau tagata ne mamate ko e tau agaaga ne maeke ke matutaki mo lautolu. Ka kua pehē e Tohi Tapu ko e tau tagata ne mamate kua nakai maeke ke taute ha mena. (Fakamatalaaga 9:5) Ka e fa fakavaia he tau temoni e tau tagata he fifitaki e leo he tau fakahele ne mamate. (Isaia 8:19) Kua fakahehē he tau temoni e falu, puhala he tau tagata matutaki mo e tau agaaga, tau tagata ha i ai e agaaga talahau tuai, tau taulātua mo lautolu ne kitekite ke he tau aolagi. Kua hataki he Kupu he Atua a tautolu ke kalo kehe he tau gahua oti ia. Ti lata ia tautolu ke tiaki e tau koloa ha tautolu ne matutaki ke he tau temoni mo e aga taulātua.—Totou Teutaronome 18:10, 11; Gahua 19:19.

Ka fakaalofa a tautolu ki a Iehova, nakai lata ke matakutaku he tau temoni. He fakaako e tautolu e Kupu he Atua ti taute e tau mena ne talahau ai, kua totoko e tautolu e Tiapolo mo e fakatata ke he Atua. Na mua atu e malolō ha Iehova ke he tau temoni. Maeke e tau agelu fakamooli haana ke fakamalolō a tautolu he tau mogo kua lata.—Totou Salamo 34:7; Iakopo 4:7, 8.

Ma e falu vala tala foki, kikite e veveheaga 10 he tohi nei, Ko e Heigoa ne Fakaako Moli he Tohi Tapu?, ne taute fakailoa he Tau Fakamoli a Iehova.