Ko e vala tala nei kua fakatutala ke he tau hūhū kua liga hūhū e koe mo e fakakite e matakavi ka totou e koe e tau tali he Tohi Tapu haau. To fiafia e Tau Fakamoli a Iehova ke fakatutala e tau tali nei mo koe.

1. Ko e heigoa e kautu ne mavehe age ki a Iesu?

Ne mavehe he Atua ko e hakega he Patuiki ko Tavita ka nofo tukulagi he nofoaiki Haana. Ko e hakega ia ne talahau tuai ko Iesu, ti kua pule a ia mogonei i luga he lagi ko e Patuiki he Kautu he Atua.​—Totou Salamo 89:4; Luka 1:32, 33.

He mogo ne tama tote a Tavita, ne fifili he Atua a ia ke patuiki ke he tau tagata ha Iehova ko Isaraela. Magaaho ne mate a Tavita, ko Solomona ne fifili he Atua ke nofo he “nofoaiki a Iehova.” (1 Nofoaga he Tau Patuiki 28:4, 5; 29:23) He mole e mate ha Solomona, loga e patuiki ne pule i Ierusalema, ka e tokologa ne nakai mahani fakamooli. Fakahiku ai, ne fakaatā e Iehova e tau kautau Papelonia ke moumou a Ierusalema mo e utakehe e patuiki ne pule i ai. Ne tupu e mena ia he tau 607 F.V.N. Tali mai he magaaho ia, ne nakai fai patuiki mai he hologa ha Tavita ne pule mai he maaga ko Ierusalema.​—Totou Esekielu 21:27.

2. Fiha e leva ne nakai fai hukui e Kautu he Atua tuga ia Tavita mo Ierusalema?

Fai magaaho he mole e moumouaga ha Ierusalema, ne tala age a Iehova ke he perofeta haana ko Tanielu to fifili he Atua e patuiki ke pule mai he lagi. To kamata a fe e pule haana?​—Totou Tanielu 7:13, 14.

Ne fakamaama e Tanielu e fakakiteaga ke he Atua ne poaki ke hio ki lalo e akau lahi, tuga ni ne poaki he Atua e kautu i Ierusalema ke utakehe mo e moumou. Ka ko e tau vaka he akau to toka hifo he kelekele ti ka mole atu “fitu e tau” to liu ai ke tupu. Kua fakakite mai he Tohi Tapu ko e tolu mo e hafa e “tau” ko e 1,260 e aho, ti ko e “fitu e tau” kua tatai mo e 2,520 e aho. (Fakakiteaga 12:6, 14) He perofetaaga he Tohi Tapu, kua fa hukui he tau aho e tau tau. (Numera 14:34) Ti kua nakai gahuahua ai e Kautu he Atua ke he 2,520 e tau.​—Totou Tanielu 4:10-17.

  3. Magaaho fe ne eke a Iesu mo Patuiki?

Ne fakatū he Atua a Iesu ko e Patuiki i luga he lagi he 1914, he hoko tonu ke he 2,520 e tau he mole e moumou a Ierusalema. Ko e gahua fakamua ha Iesu ko e Patuiki, ko e vega ia Satani mo e haana tau temoni mai he lagi. (Fakakiteaga 12:7-10) Nakai kitia he tau tagata e mena ia ne tupu, ka e kitia e tau fua mai ai ha ko e matematekelea he tau tagata. (Fakakiteaga 12:12) Ko e tau mena ne tutupu tali mai he 1914 ne fakamooli ai kua eke a Iesu mo Patuiki he tau ia.​—Totou Mataio 24:14; Luka 21: 10, 11, 31.

4. Ko e heigoa e kakano he tuaga patuiki ha Iesu ma haau?

Ko e fakamooliaga he tau perofetaaga ke he tuaga patuiki ha Iesu kua fakakite na maeke a koe ke falanaki ke he Kupu he Atua. Nakai leva, to fakaaoga e Iesu e malolō fakapatuiki haana ke utakehe e tau matematekelea oti he tagata.​—Totou Salamo 72:8, 12, 13; Tanielu 2:44.

Ma e falu vala tala foki, kikite e lau 215-218 he tohi nei, Ko e Heigoa ne Fakaako moli he Tohi Tapu?, ne taute fakailoa he Tau Fakamoli a Iehova

[Fakafonua he lau 26, 27]

(Ma e puhala katoa ne tohi aki, kikite e tohi)

Oketopa

607 F.V.N. ← 2,520 e tau → 1914 V.N.

1000 F.V.N. | 1 F.V.N. | 1 V.N. | 1000 V.N. | 2000 V.N.

← 606.25 e tau →← 1,913.75 e tau →

Moumou e kautu ha Ierusalema

Fakaaoga e kalukuleta haau: 606.25 + 1,913.75 = 2,520

Fakatū he Atua a Iesu ko e Patuiki ke pule ke he tau motu