Psalme 72:1-20
Koša yeo e bolelago ka Solomone.
72 Hle Modimo, dira gore kgoši e ahlole go ya ka tsela yeo wena o e nyakago,Gomme o tsebiše morwa wa kgoši ka go loka ga gago.
2 Anke a lwele batho ba gago ka go loka,Gomme a sware batho ba gago ba maemo a tlase ka toka.
3 Anke dithaba di išetše batho khutšo,Gomme meboto e ba išetše go loka.
4 Anke a lwele batho ba maemo a tlase setšhabeng.Anke a phološe barwa ba badiidi,Gomme anke a fediše moradia.
5 Ba tla go boifa ge feela letšatši le sa le gona,Le ge ngwedi o sa le gona,Go tloga molokong o mongwe go ya go o mongwe.
6 Dilo tšeo kgoši e tlago go di dira di tla swana le pula yeo e nelago bjang bjoo bo segilwego,Go swana le marothi a pula ao a nelago lefase.
7 Nakong ya ge a sa buša, baloki ba tla atlega,Gomme khutšo e tla ba gona go fihlela ngwedi o se sa le gona.
8 O tla buša go tloga lewatleng le lengwe go ya go le lengwe,Le go tloga Nokeng* go fihla moo lefase le felelago gona.
9 Bao ba dulago leganateng ba tla khunama pele ga gagwe,Gomme kgoši e tla fenya manaba a yona.*
10 Dikgoši tša Tarashishi le tša dihlakahlakeng
Gotee le dikgoši tša Sheba le tša Seba, di tla mo tlišetša dimpho.
11 Dikgoši ka moka di tla mo khunamela.Gomme ditšhaba ka moka tša mo hlankela.
12 Ka gobane o tla phološa modiidi yo a mo kgopelago gore a mo thuše,Le motho wa maemo a tlase gotee le motho yo mongwe le yo mongwe yo a hlokago motho yo a mo thušago.
13 O tla kwela motho wa maemo a tlase le modiidi bohloko,Gomme a phološa maphelo a badiidi.
14 O tla ba phološa go batho bao ba ba tlaišago le bao ba ba swerego ga sehlogoGomme bophelo* bja bona bo tla ba bohlokwa go yena.
15 Anke a phele nako e telele gomme a newe gauta ya kua Sheba.
Anke batho ba dule ba mo rapelelaGomme a šegofatšwe letšatši ka moka.
16 Go tla ba le dijo tše dintšhi mo lefaseng.Di tlo tlala go fihla le dintlheng tša dithaba.
Dijo tša mašemong a kgoši e tlo ba tše dintšhi go swana le tša Libanoni,Gomme metseng, batho e tlo ba ba bantšhi go swana le dimela tša lefaseng.
17 Anke leina la gagwe le gopolwe go ya go ile,Gomme anke a atlege ge feela letšatši le sa le gona.
Anke batho ba šegofatšwe ka baka la gagwe.Anke ditšhaba ka moka di bolele gore o thabile.
18 Anke go retwe Jehofa Modimo, Modimo wa Isiraele,Yena a nnoši yo a dirago dilo tše di makatšago.
19 A go retwe leina la gagwe le legolo go ya go ileLe gona, anke letago la gagwe le tlale lefase ka moka.
Amene, Amene.
20 Dithapelo tša Dafida morwa wa Jese di felela mo.
Mengwalo ya tlase
^ Ke gore, ya Eforate.
^ Phetolelo ya lentšu ka lentšu e re, “manaba a kgoši a tla latswa lerole.”
^ Phetolelo ya lentšu ka lentšu e re, “madi.”
