Bafsa ba a Botšiša

Nka Kaonefatša Dithapelo Tša-ka Bjang?

“Ge o gateleditšwe kudu ke sekolo, mošomo goba bagwera le lapa, ka dinako tše dingwe o lebala gore ke mang yo a lego bohlokwa kudu—Modimo.”—Faviola, 15, United States.

“LE SE kgaotše go rapela.” (1 Bathesalonika 5:17) “Phegelelang thapelong.” (Baroma 12:12) “Tsebišang Modimo dikgopelo tša lena.” (Bafilipi 4:6) Ge e ba o le Mokriste, mohlomongwe o tseba mangwalo ao gabotse. Mohlomongwe e bile o a lemoga gore thapelo ke mohuta o makatšago kudu wa poledišano. Nagana feela—o ka boledišana le Modimo Ramatla-ohle ka nako le ge e le efe bošego goba mosegare! Le gona Beibele e re: “O a re kwa.” *—1 Johane 5:14.

Lega go le bjalo, go swana le mofsa yo a tsopotšwego kua mathomong, o ka hwetša go le thata go rapela. Boemo bjo bjalo bo ka bapišwa le mojako wo o notletšwego. Ge e ba o ikwa ka tsela yeo, o ka dira’ng ka taba ye? Sehlogo se se tla go thuša (1) go lemoga lepheko, (2) go ipeela pakane mabapi le dithapelo tša gago le (3) go notlolla “mojako” e le gore o ka fihlelela pakane ya gago.

A re thomeng ka go lemoga lepheko. Ke sebopego sefe se se kgethegilego mabapi le thapelo seo se lego thata go wena? Ngwala karabo ya gago ka mo tlase.

․․․․․

Mogato o latelago ke gore o ipeele pakane. Ka mo tlase, hlahloba pakane yeo wena o ka ratago go e fihlelela goba o ngwale e nngwe mothalading wo o lego kgaufsi le “E Nngwe.”

□ Nka rata go rapela gantši kudu.

□ Nka rata go se boeletše selo se se swanago ge ke rapela.

□ Nka rata gore dithapelo tša-ka e be tše di tšwago pelong.

□ E Nngwe ․․․․․

Go Notlolla “Mojako”

Thapelo e bjalo ka mojako wo o ka o bulago ka nako le ge e le efe. Lega go le bjalo, bafsa ba bantši ba ka bolela gore ga ba bule mojako wo gantši goba ka bolokologi kamoo ba swanetšego ka gona. Ge e ba go le bjalo go wena, o se ke wa langwa! O šetše o lemogile bothata e bile o ipeetše pakane. Ga bjale go fo nyakega senotlelo gore o  bule mojako. Ela hloko a mangwe a mapheko ao o ka kopanago le ona gotee le ditšhišinyo tša mabapi le kamoo a ka fenywago ka gona.

▪ Go Notletšwe: TLHOKOMOLOGO. “Ka dinako tše dingwe, ka baka la go dula ke swaregile kudu, thapelo e a hlokomologwa.”—Preeti, 20, Brithania.

Senotlelo: “Dulang le phakgametše gore kamoo le sepelago ka gona ga se bjalo ka batho ba ba sa hlalefago eupša ke bjalo ka ba bohlale, le ithekele nako e swanetšego gobane mehla ke e mebe.”—Baefeso 5:15, 16.

Tšhišinyo: Kgetha e sa le pele nako yeo e ka bago mo gobotse go rapela ka yona. O ka ba wa e ngwala pampiring, go fo swana le ge o be o ka ngwala kgopotšo ya gore o kopane le motho yo a itšego. Yoshiko wa nywaga e 18 yo a dulago Japane o re: “Ge ke sa ipeele nako e lebanyago ya go rapela, ke thoma go swarega ka dilo tše dingwe.”

▪ Go Notletšwe: TŠHITIŠO. “Ke palelwa ke go tsepamiša kgopolo e bile ke nagana dilo tše dintši go e na le go nagana ka seo ke se bolelago.”—Pamela, 17, Mexico.

Senotlelo: “Molomo o bolela go tšwa go se se tletšego pelong.”—Mateo 12:34.

Tšhišinyo: Ge e ba o sa dutše o nagana ka dilo tše dingwe ge o dutše o rapela, leka go rapela thapelo e kopana—bonyenyane go ba go fihlela o kaonefatša tsela yeo ka yona o tsepamišago kgopolo. Tšhišinyo e nngwe še: Rapela ka dilo tšeo o tshwenyegago kudu ka tšona. Marina wa nywaga e 14 wa kua Russia o re: “Ge ke be ke tsena nywageng ya mahlalagadi, ke ile ka thoma go naganišiša ka taba ya gore thapelo ge e le gabotse ke go boledišana le Modimo. Se se ile sa ntutueletša go mmotša se se lego ka pelong ya-ka ge ke mo rapela.”

▪ Go Notletšwe: SETLWAEDI. “Ge ke rapela, ke ikhwetša ke boeletša mantšu a swanago gantši-ntši.”—Dupe, 17, Benin.

Senotlelo: “Ke êlêlwa ditirô tša xaxo ka moka; ke akanya tše Wêna O di dirilexo.”—Psalme 77:12.

Tšhišinyo: Ge e ba dithapelo tša gago di bonagala e le tšeo o di tsebago ka hlogo, ngwala letšatši le lengwe le le lengwe ka tšhegofatšo e itšego bophelong bja gago. Ke moka o leboge Jehofa ge a go šegofaditše ka tsela yeo. Tšwela pele o dira se ka lebaka la beke, ka go dira bjalo o tla be o rapetše mo e ka bago ka ditaba tše šupa tše mpsha ka ntle le go boeletša mantšu. Dira se se swanago ka ditiragalo tša letšatši le letšatši. Bruno wa nywaga e 21 wa kua Brazil o re: “Ge ke rapela, ke leka go lebiša tlhokomelo dilong tšeo di diragetšego letšatšing lona leo.” Samantha wa nywaga e 18 wa kua United States, o dira se se swanago. O re: “Ke leka go gopola dilo ka moka tša lehono tšeo di fapanago le tša matšatši a mangwe gomme ke rapele ka tšona. Se se nthuša gore ke se ke ka boeletša mantšu.” *

▪ Go Notletšwe: PELAELO. “Ge ke fetša go rapela ka bothata sekolong, ga bo rarollege. Ge e le gabotse, go tšwelela mathata a oketšegilego. Ke ipotšiša gore, ‘Ke sa rapelela’ng? Ke bona go fo swana ka ge Jehofa a se a ntheetša!’”—Minori, 15, Japane.

Senotlelo: “Gotee le moleko [Jehofa Modimo] o tla ba a bula tsela ya go tšwa e le gore le kgone go o kgotlelela.”—1 Bakorinthe 10:13.

Tšhišinyo: Re ka kgonthišega ka selo se tee gore: Jehofa ke “Mokwi wa dithapêlô.” (Psalme 65:2) Ka gona, ka morago ga go rapela ka bothata, leka go kwešiša boemo ka botlalo. Go e na le go letela karabo yeo o e rapeletšego, leka go bona yeo e ka bago e šetše e arabilwe. Taba ya gore o sa dutše o kgotlelela bjalo ka Mokriste e bontšha gore go ka direga gore Jehofa o arabile thapelo ya gago—e sego ka go tloša bothata eupša ka go go nea matla a go bo kgotlelela.—Bafilipi 4:13.

▪ Go Notletšwe: GO LEWA KE DIHLONG. “Ge ke nagana ka seo bao ke tsenago sekolo le bona ba tlago go se bolela ge ba ka mpona ke rapela pele ke e-ja dijo tša matena, ke lewa ke dihlong.”—Hikaru, 17, Japane.

 Senotlelo: “Selo se sengwe le se sengwe seo re nyakago go se dira se na le . . . nako ya sona e swanetšego.”—Mmoledi 3:1, Beck.

Tšhišinyo: Le ge thapelo ya setu yeo e rapelwago ka bohlale e ka goga tlhokomelo ya babogedi bao ba thabelago seo, ga se wa swanela go dira pontšho ya bompogeng. Ka mohlala, go molaleng gore thapelo e kopana yeo Nehemia yo a botegago a ilego a e rapela pele ga Kgoši Arithasasitha e be e le ya setu gomme ga go na moo re bontšhwago gore kgoši e ile ya lemoga gore Nehemia o be a rapela. (Nehemia 2:1-5) Le wena o ka rapela Jehofa ka setu ka ntle le go ikgogela tlhokomelo.—Bafilipi 4:5.

▪ Go Notletšwe: GO IKWA O SA SWANELEGE. “Jehofa o šetše a tseba mathata a-ka. E bile ge a šetše a mpalela, ke nagana gore le yena a a mo palela! Ka dinako tše dingwe ke fo ikwa ke sa swanelege go bolela le yena.”—Elizabeth, 20, Ireland.

Senotlelo: ‘Lahlela dipelaelo tša gago ka moka go Modimo, gobane o a go hlokomela.’—1 Petro 5:7.

Tšhišinyo: Thutong ya gago ya motho ka noši, dira nyakišišo gomme o naganišiše ka mangwalo a latelago: Luka 12:6, 7; Johane 6:44; Baheberu 4:16; 6:10; 2 Petro 3:9. Ditemana tše di tla go thuša go lemoga gore Jehofa o nyaka go kwa seo o se naganago le gore ga a letela gore o be senatla se itšego sa moya gore a go theetše. Mopsalme Dafida—yo a bego a lebeletšana le dipelaelo le kgateletšego—o bontšhitše kgodišego ya gore “Morêna ó kxaufsi le ba ’pelo di rôbexilexo; ó phološa meôya e kxobetsi.” *—Psalme 34:18.

Taba ya gore Jehofa ka boyena o kwa dithapelo tša gago e bolela selo se itšego mabapi le gore o a go kgahlegela. Nicole wa nywaga e 17 wa kua Italy o re: “Jehofa ga se a nea barongwa modiro wa go theetša dithapelo tša rena. Go molaleng gore ka ge e le yena ka noši yo a theetšago dithapelo tša rena, o swanetše go ba a di tšeela godimo.”

Dihlogo tše di oketšegilego go tšwa lelokelelong la dihlogo tša “Bafsa ba a Botšiša” di ka hwetšwa mokerong wa Inthanete wa www.watchtower.org/ype

[Mengwalo ya tlase]

SEO GO KA NAGANWAGO KA SONA

▪ Ke dilo dife tšeo Jehofa a di lebelelago di le bohlokwa tšeo o ka di rapelelago?

▪ O ka rapela Jehofa mabapi le ditaba dife tša ba bangwe?

[Box/​Pictures on page 20]

SEO DITHAKA TŠA GAGO DI SE BOLELAGO

“Thapelo e bjalo ka puku yeo o ngwalelago diphiri tša gago go yona, tšeo di tsebjago ke wena feela le Jehofa.”—Olayinka, Nigeria.

“Akanya o e-na le mogwera wa paala gomme o mo neile dimpho tše dintši. Ke moka ka letšatši le lengwe mogwera yoo a kgaotše go go bolediša. E swanetše go ba e le tsela yeo Jehofa a ikwago ka yona ge re kgaotša go mo rapela.”—Chinta, Australia.

“Ka mehla ke be ke nagana gore go bolela maikwelo a-ka go fošagetše. Tokelo ya thapelo e nthušitše go lemoga gore go lokile go thaba le go nyama le go hlakahlakana le go botša Jehofa maikwelo ao. Ga bjale ke kgona go laola maikwelo a-ka ka tsela e botse le e atlegago.”—Amber, United States.

[Seswantšho go letlakala 19]

Ge e ba mojako wa thapelo o bonagala o notletšwe, diriša dinotlelo tše di neilwego ka Lentšung la Modimo e lego Beibele