Ke Fagahletše go tlo ba Botša Gore, “Re mo ka Moka ga Rena!”

Bjalo ka ge go anega Abigail Austin

Ke be ke na le nywaga e senyane. E be e le letšatši le le kgahlišago ka April 1995, gomme re le sehlopha go tšwa phuthegong ya Dihlatse tša Jehofa ya lefelong la gabo rena re ile ra phetha ka gore re yo fetša letšatši re le nageng ya magaeng Engelane. Re ile ra tloga ka dikoloi re le sehlopha. Nna, mogolo’aka e lego Sarah gotee le mogwera wa lapa lešo e lego Deborah, re be re nametše ka koloing e tee le tate le mma. Gatee-tee koloi e nngwe e ile ya tšwelela e kitima e re lebantše e sepela ka lehlakoreng le le fošagetšego la tsela gomme ya re thula. Go ile gwa phologa nna feela.

KE ILE ka phafoga sepetlele ka morago ga dibeke tše pedi. Legata la-ka le be le pšhatlagane gomme dingaka di ile tša le tsenya ditšhitswana tše mmalwa bakeng sa go le kgomaganya. Lega go le bjalo, ke ile ka fola ka pela. Mafelelong ba leloko ba ile ba mpotša seo se diragetšego, eupša ga se ka ka ka ba kgolwa. Ke be ke dulela go nagana gore batswadi ba-ka le ngwanešo ba be ba kile ba nketela sepetlele ge ke be ke sa robetše gomme ka se ba bone. Ke feela ka morago ga ge ke boetše gae moo ke ilego ka bona gore ga ba sa le gona. Ke ile ka nyama kudu.

Ke’ng seo se nthušitšego go lebeletšana ka katlego le kotsi ye e šoro?

Bohwa Bja-ka bja Moya

Ke be ke le yo monyenyane go bana ba bahlano. Ge kotsi ye e be e direga, Sarah o be a na le nywaga e 22, Shane a na le e 20, Jessica a na le e 17 gomme Luke a na le e 15. Re be re na le batswadi bao ba nago le lerato le ba botho. Tate e lego Steve, o be a hlankela e le mogolo Phuthegong ya Dihlatse tša Jehofa ya West Yorkshire kua Shipley gomme o be a ratwa ke batho ka moka ka gobane ka mehla o be a ipha nako ya go theetša batho ba bangwe le go ba thuša. Mma e lego Carol, le yena o be a ratwa kudu, a hlokomela batšofadi ba phuthegong ya gabo rena bjalo ka ge eka ke morwedi wa bona. O be a rulaganya dipokano tša rena bafsa gomme a re thuša go hwetša bagwera ba kgonthe. Batho ka moka ba be ba amogelegile ka legaeng lešo. Batswadi ba rena ba re rutile go ba botho le go naganela baagišani ba rena.

Mantšiboeng a Laboraro le lengwe le le lengwe re be re ithuta Beibele re le lapa. Ka dinako tše dingwe, re be re bapala dipapadi tša ka Beibeleng gomme re apara go swana le baanegwa bao ba ka Beibeleng. Tate le mma ba re thušitše re sa le ba banyenyane go ithuta kamoo re ka lokišetšago diboka tša rena tša phuthego ka gona le kamoo re ka bolelago le batho ba bangwe ka molaetša wa Beibele magaeng a bona. Gaešita le ge batswadi ba rena ba be ba na le mo gontši mo ba bego ba swanetše go go dira ka ge ba be ba godiša bana ba bahlano, ba be ba fetša nako le rena gomme ba re thuša go ba le tswalano e matla le Jehofa.

Ge Sarah, Shane le Jessica ba feditše sekolo, e ile ya ba babulamadibogo, e lego badiredi ba Bakriste ba nako e tletšego, go etša ge mogwera wa rena Deborah a ile a dira bjalo. Nna le Sarah re be re le monwana le lenala. O be a le bjalo ka mma wa-ka wa bobedi, le gona ge dikolo di be di tswaletšwe re be re fetša nako ya rena re le gotee re thuša batho ba bangwe go ithuta ka Beibele. Ke be ke rata dinako tšeo. Ke be ke kgona go bona kamoo babulamadibogo ka moka ba thabilego ka gona gomme ke be ke thabela go ba le bona. Pakane ya-ka ge ke feditše sekolo e be e le gore ke be mmulamadibogo-gotee le Sarah.

Ka matšatši a maikhutšo, ba lapa lešo le ba bangwe ka phuthegong gantši ba be ba fetša nako ba dira dilo gotee. Ba banyenyane le ba bagolo ba ile ba ba le segwera sa kgaufsi le go ratana kudu. Ke be ke sa lemoge gore bagwera ba ba kgonthe ba be ba tla nthuša le go nkhomotša matšatšing ao a bego a e-tla.

 Ka Morago ga Kotsi

Ge ke tloga sepetlele, ke ile ka boela gae lapeng lešo. Ge Shane le Jessica ba be ba šoma mešongwana ya nakwana e bile ba tšea karolo bodireding bja nako e tletšego, ba be ba šoma ka thata e le gore ba hwetše tšhelete e lekanego ya go re fepa le go re hlokomela ka moka ga rena.

Dihlatse-gotee le rena tše dintši tša phuthegong ya gabo rena le tšona di ile tša re thuša. Di ile tša re direla mo gontši kudu! Di ile tša re nea dijo, tša hlwekiša, tša re yela mabenkeleng gomme tša re hlatswetša le diaparo go ba go fihlela re kgona go itirela dilo ka noši. Re be re di leboga e le ruri. Dimpho le dikarata tše dintši tšeo di bego di re homotša di ile tša tla di e-tšwa go Dihlatse tše dingwe tša kgole le kgaufsi, tša utolla lerato le legolo leo le lego ka mokgatlong wa Jehofa.

Ka morago ga mo e ka bago ngwaga, dikgaetšedi tša-ka le mogolo’aka ba ile ba phetha ka gore ke swanetše go dula le lapa le le tsepamego. Malapa a itšego a botho ka phuthegong a ile a ithaopela go thuša, ka gona lapa lešo le ile la dula fase gomme la ahla-ahla seo mma le tate ba bego ba tla nagana gore se tla nthuša kudu le go nkhola moyeng nakong e tlago. Go ile gwa ba le lapa letee leo le ilego la swanelega kudu. Billy yo e lego mogolo, le mosadi wa gagwe Dawn, e be e dutše e le bagwera ba kgaufsi ka go kgethega ba lapa la gabo rena, gomme ba be ba na le morwedi wa nywaga e mehlano e lego Lois. Ba ile ba nkamogela legaeng la bona gomme ga e sa le go tloga ka yona nako yeo, ba ile ba ntlhokomela bjalo ka ge eka ke morwedi wa bona. Gaešita le ge Lois a ile a swanelwa ke go abelana le nna tlhokomelo ya batswadi ba gagwe, ga se a ka a ba le lehufa, gomme lehono nna le yena re ratana kudu bjalo ka ge eka re bana ba motho ba nama le madi.

Kamoo ke Ilego ka Lebeletšana le Ditla-morago tša Kotsi ka Gona

Mathomong ke ile ka ipotšiša lebaka leo ka lona kotsi ye e šoro e ilego ya diragalela lapa lešo, kudu-kudu ka ge batswadi ba-ka, Sarah le Deborah, ba be ba rata Jehofa le batho kudu. Eupša ke ile ka gopola pego ya Beibele ya Jobo, yoo a ilego a dula a botegela Modimo go sa šetšwe go hwela ke bana. (Jobo 1:19, 22) Ke ile ka ipotša gore: ‘Ee, Sathane ke yena yo a tlišitšego tlaišego le lehu lefaseng, ka gona o tla thaba ge e ba kotsi ye e ka dira gore ke kgaotše go hlankela Modimo.’ (Genesi 3:1-6; Kutollo 12:9) Le gona ke ile ka gopola gore Jehofa ka lerato o re neile kholofelo e kgahlišago ya tsogo. (Johane 5:28, 29) Re tlo bona lapa la gabo rena le Deborah gape, mo nakong ye e tla ba e le lefaseng la paradeise! Ge e le gabotse, lerato la-ka la go rata Jehofa le ile la matlafala kudu.

Ge ke kopana le batho bao le bona ba ilego ba welwa ke dikotsi tše di swanago, ke nyama kudu ge e ba ba se ba kwa ka kholofelo e bohlokwa ya Beibele ya mabapi le tsogo. Seo se ntira gore ke nyake go boledišana le bona ka kholofelo ya rena, ka gobane ke kgodišegile gore ke feela ka Jehofa le mokgatlo wa gagwe moo re phologilego mehla ye ya lefsifsi go etša ge go le bjalo ka rena, re a tseba gore kholofelo e gona.

Mohlomongwe phihlelo ya rena e thušitše ka tsela e nngwe gape, ya dira gore batswadi ba bangwe ba ipotšiše gore: ‘Na re rutile bana ba rena ka mo go lekanego ka Jehofa, moo e lego gore ge selo se itšego se ka re diragalela ba tla tšwela pele ba hlankela Jehofa rena re se gona?’

Ke ile ka leka go phela bophelo bja-ka bjalo ka ge eka mma le tate ba sa phela. Ke a tseba gore ba be ba tla nyaka gore ke šome ka thata go thuša batho bangwe, go etša ge ba dirile. Ke bile mmulamadibogo ga e sa le ke fetša sekolo, gomme ga bjale Lois o hlankela gotee le nna e le mmulamadibogo. Dikgaetšedi tša-ka le mogolo’aka ba tsene lenyalong gomme ba hlankela Jehofa ka lethabo diphuthegong tša gabo bona.

Ruri ke lebeletše pele lefaseng le lefsa la Modimo le tsogong ya bahu! Ka nako yeo, go tla be go se sa na bohloko le lehu. (Kutollo 21:3, 4) Go tseba gore re tlo ba gotee gape go nthuša gore ke tšwele pele ke dira seo ke se dirago go sa šetšwe mathata. Ke fagahletše go tlo gokarela mma, tate, Sarah le Deborah ka lerato gomme ke ba botše gore: “Re mo ka moka ga rena!”

[Seswantšho go letlakala 18]

Abigail lehono (wa bobedi go tloga ka go le letshadi) le lapa leo le mo godišitšego