Sylviana yo e lego mmulamadibogo yo a nago le mengwaga e 27 o re: “Ge ke be ke ekwa bagwera ba ka ba anega ka tsela yeo go hlankela lefelong leo go nyakegago babulamadibogo ba bantši go thabišago ka gona, le nna ke ile ka duma go kwa bose bjoo ba bo kwago. Eupša ke be ke inyatša.”

Na le wena o kile wa ikwa go swana le Sylviana? Na le wena o duma go hlankela tšhemong yeo go nyakegago bagoeledi ba bantši ba Mmušo, eupša o ikwa o inyatša? Ge e ba go le bjalo, o se ke wa nyama! Jehofa o thušitše bana babo rena le dikgaetšedi ba bantši gore ba kgone go ya tlhokagalong, le ge go be go na le dilo tšeo di bego di ba thibela go dira bjalo. A re eteleng Madagascar, e lego sehlakahlaka sa bone ka bogolo mo lefaseng, gomme re kwe kamoo Jehofa a ilego a thuša ba bangwe ba bana babo rena gore ba hlankele mafelong ao go nyakegago bagoeledi ba bantši.

Mengwageng e lesome e fetilego bagoeledi ba fetago ba 70 bao ba lego mafolofolo le babulamadibogo bao ba tšwago dinageng tše 11, * ba hudugetše tšhemong yeo e tšweletšago dienywa ya Afrika, moo batho ba bantši ba ratago Beibele. Le gona, bagoeledi ba bantši sehlakahlakeng se se segolo sa Madagascar, ba hudugela mafelong a mangwe gore ba yo bolela molaetša wa Beibele. A re kweng ka ba bangwe ba bona.

Banyalani bao ba nago le mengwaga ya ka godimo ga e 30 e lego Louis le Perrine, ba hudugetše Madagascar ba etšwa Fora. Ke kgale ba nagana ka taba ya go hudugela tlhokagalong eupša Perrine a dikadika. Perrine o re: “Ke be ke tšhošwa ke go ya moo ke sa go tsebego. Ke be ke tshwenywa ke gore ke tlo ba kgole le lapa lešo, phuthego, ntlo ya rena le gore nka se sa bona mafelo ao ke bego ke a tlwaetše le dilo tšeo ke bego ke tlwaetše go di dira. Bothata bja ka bjo bogolo bjo ke bego ke swanetše go bo lokiša e be e le go tshwenyega.” Ka 2012, Perrine o ile a bontšha sebete gomme yena le Louis ba huduga. Perrine o ikwa bjang ka phetho yeo ba e dirilego? O re: “Ge ke gopola dilo tše ka moka, tumelo ya ka e a tia ka gobane ke kgonne go bona gore Jehofa o be a na le rena.” Louis o tlaleletša seo ka gore: “Segopotšong sa mathomo re le Madagascar, barutwana ba rena ba Beibele ba lesome ba ile ba tla Segopotšong!”

Ke’ng seo se thušitšego banyalani ba go dula ba kgotleletše tirelong ya bona le ge ba ile ba welwa ke mathata?  Ba ile ba lopa Jehofa ka thapelo gore a ba nee matla a gore ba kgotlelele. (Bafil. 4:13) Louis o re: “Ruri Jehofa o arabile dithapelo tša rena a ba a re nea ‘khutšo ya gagwe.’ Ka baka leo, re ile ra kgona go nagana kutšwanyana ka ditšhegofatšo tšeo re di hwetšago tirelong ya rena. Le gona, bagwera ba rena ba mo re tšwago gona ba be ba re romela mangwalo le di e-mail ba re kgothatša ka gore re se ke ra fela matla.”​—Bafil. 4:6, 7; 2 Bakor. 4:7.

Ruri Jehofa o ile a šegofatša Louis le Perrine ka ge ba ile ba bontšha kgotlelelo. Louis o re: “Ka October 2014, re ile ra ya Sekolong sa Beibele sa Banyalani ba Bakriste * seo se bego se swaretšwe Fora. Ruri nka se tsogile ke lebetše mpho ye ya sekolo se yeo Jehofa a re neilego yona.” Ge banyalani bao ba se na go aloga, ba ile ba thaba kudu ge ba hwetša kabelo e mpsha ya gore ba ye go hlankela kua Madagascar.

Ka 2010, ge banyalani bao ba tšwago Fora e lego Didier le Nadine, ba be ba fetile mengwaga e 50, ba ile ba hudugela Madagascar. Didier o re: “Re thomile go bula madibogo re sa le bafsa, ke moka ra ba le bana ba bararo. Ka morago ga gore ba gole, re ile ra thoma go nagana ka go ya tlhokagalong.” Nadine yena o re: “Taba ya gore re be re tlo arogana le bana ba rena e ile ya dira gore ke dikadike, eupša bana ba rena ba ile ba re botša gore: ‘Ge e ba le ka ya tlhokagalong, re tlo ikgantšha ka lena!’ Mantšu ao a bona a ile a re kgothatša. Le ge re dula kgole le bana ba rena, seo se re thabišago ke gore re kgona go bolela le bona ka mehla.”

Go be go se bonolo gore Didier le Nadine, ba ithute leleme la Semalagasy. Nadine o bolela a myemyela, o re: “Ga re sa le bafsa.” Didier le Nadine ba kgonne bjang go ithuta leleme le lefsa? Ba ile ba thoma ka go kopanela phuthegong yeo go bolelwago Sefora. Eupša ka morago ga go bona gore ba ka kgona go ithuta leleme leo le bolelwago lefelong leo, ba ile ba thoma go kopanela le phuthego yeo e bolelago leleme la Semalagasy. Nadine o re: “Batho ba bantši bao re bego re kopana le bona tšhemong ba be rata go ithuta Beibele. Gantši ba be ba re leboga ge re ba etetše. Mathomong ke be ke nagana gore ke a lora. Ke rata go bula madibogo tšhemong ya mo. Ge ke tsoga feela, ke ikwa ke thabile gomme ke ipotša gore, ‘ke ya tšhemong!’”

Didier o a myemyela ge a gopola nako ya ge a be a ithuta Semalagasy. O re: “Ka letšatši le lengwe ke be ke swere seboka sa phuthego eupša ke sa kwešiše le karabo e tee yeo bana babo rena le dikgaetšedi ba bego ba e nea. Ke be ke no re, ‘Re a leboga.’ Ka morago ga gore ke leboge kgaetšedi yo mongwe yo a bego a arabile, batho bao ba bego ba dutše ka morago ga gagwe ba ile ba šikinya dihlogo go bontšha gore kgaetšedi yoo o be a se a araba tšona. Kapejana ke ile ka šupa ngwanabo rena yo mongwe, yoo ke holofelago gore o ile a araba tšona.”

Kopanong ya 2005, Thierry le mosadi wa gagwe, Nadia, ba ile ba bogela terama ya “Pursue Goals That Honor God.” Terama yeo ya Beibele yeo e bolelago ka Timotheo e ile ya ba kgoma dipelo gomme ya napa e  dira gore ba nyake go ya tlhokagalong. Thierry o re: “Mafelelong a terama yeo, ge re be re betha matsogo, ke ile ka sebela mosadi wa ka gomme ka mmotšiša gore: ‘Rena re ya kae?’ Mosadi wa ka o ile a re le yena o be a ipotšiša potšišo yeo.” Go tloga ka nako yeo ba ile ba šomela gore ba fihlelele pakane yeo. Nadia o re: “Re ile ra thoma go fokotša dilo tše re bego re na le tšona ganyenyane-ganyenyane, go fihlela re šala ka dilo tšeo di ilego tša felela ka disutukeising tše nne!”

Ba ile ba fihla Madagascar ka 2006 gomme ba thabela kabelo ya bona di tloga fase. Nadia o re: “Tsela yeo batho ba mo ba arabelago ka yona e dira gore re thabe.”

Lega go le bjalo, ka morago ga mengwaga e tshela, banyalani bao ba ile ba welwa ke bothata. Mmago Nadia, e lego, Marie-Madeleine, yo a bego a dula Fora, o ile a wa, a gobala hlogong a ba a robega le letsogo. Ka morago ga gore banyalani ba ba boledišane le ngaka ya mmago Nadia, ba ile ba kgopela mmago Nadia gore a tle a dule le bona Madagascar. Le ge a be a na le mengwaga e 80 ka nako yeo, ga se a ka a ba le bothata bja go yo dula le bona. Mmago Nadia o ikwa bjang ka go dula kgole le ga gagwe? O re: “Ka dinako tše dingwe go thata go tlwaela, eupša le ge ke sa kgone go itirela dilo tše dintši, ke ikwa ke na le mohola ka phuthegong. Seo se nthabišago le go feta ke gore, ka ge ke dula le morwedi wa ka le monna wa gagwe, seo se ba thuša gore ba tšwele pele ka modiro wa bona. Le gona sa go kgahliša ke gore batho ba tšhemong ye ba dira tšwelopele e botse.”

Riana ke ngwanabo rena yo a nago le mengwaga e 22. O goletše tikologong ya Alaotra Mangoro yeo e nago le mobu o nonnego ye e lego ka bohlabela bja Madagascar. O ile a phasa gabotse sekolong gomme a nyaka go tšwetša dithuto tša gagwe pele. Eupša ka morago ga gore a ithute Beibele, o ile a fetoša monagano. O re: “Ke ile ka leka ka matla gore ke fetše sekolo sa sekontari ka pela gomme ka tshepiša Jehofa gore, ‘ge nka phasa, ke tlo bula madibogo.’” Ka morago ga gore Riana a phase, o ile a phetha tshepišo ya gagwe. O ile a ya go dula le ngwanabo rena yo mongwe wa mmulamadibogo, a nyaka mošomo wa nakwana gomme a thoma go bula madibogo. O re, “Phetho ye e phala diphetho ka moka tšeo ke ilego ka di dira.”

Lega go le bjalo, ba meloko ya gabo Riana ga se ba ka ba kwešiša phetho yeo a e tšerego. O re: “Tate, rangwane le koko ba ile ba nkgothaletša gore ke tšwetše pele dithuto tša ka. Eupša ke be ke sa nyake go tlogela bobulamadibogo.” Go se go ye kae, Riana o ile a nyaka go yo hlankela moo go nago le tlhokagalo. Ke’ng seo se dirilego gore a nyake go ya moo? O re: “Mahodu a ile a thuba moo re bego re dula gona gomme a nkutswetša dilo tše dintši. Go utswetšwa moo, go ile gwa ntira gore ke nagane ka mantšu a Jesu ao a rego re ipolokele ‘matlotlo legodimong.’ Ke ile ka šoma ka thata gore ke hwetše mahumo a moya.” (Mat. 6:19, 20) O ile a hudugela karolong ya ka borwa ya naga yeo, e lego karolo yeo e omilego kudu. Yeo e bego e le kgole le moo a bego a dula gona ka dikhilomithara tše 1 300. Seleteng seo go dula batho ba go bolela Setandroy. Ke ka baka la’ng a ile a ya moo?

Kgwedi pele Riana a ka utswetšwa, o be a thomile go ithuta Beibele le banna ba babedi ba go bolela Setandroy. O be a šetše ithutile mantšu a itšego a Setandroy, gomme a nagana ka batho ba bantši bao ba bolelago leleme le, bao ba bego ba se ba tšwa ba ekwa molaetša wa Mmušo wa Modimo. O re, “Ke ile ka rapela Jehofa gomme ka mo kgopela gore a nthuše gore ke hudugele seleteng seo go bolelwago Setandroy.”

Riana o ile a hudugela moo gomme gateetee a lebeletšana le bothata. O be a sa hwetše mošomo. Monna yo mongwe o ile a mmotšiša gore: “Ke ka baka la’ng o tlile mo? Batho ba mo ba ya go nyaka mešomo mo wena o tšwago gona!” Ka morago ga dibeke tše pedi, Riana o ile a tšea tšhelete ya gagwe ya mafelelo gomme a ya kopanong ya selete, a dutše a ipotšiša gore o be a tlo boa bjang. Letšatšing la mafelelo la kopano, ngwanabo rena yo mongwe o ile a tsenya selo se sengwe ka baking ya Riana. E be e le tšhelete e lekanago gore Riana a kgone go patela leeto la go boela morago le go yo thoma kgwebo e nyenyane ya go rekiša yogurt. Riana o re: “Ge ke be ke tloga ke hloka thušo, ke ile ka bona letsogo la Jehofa. Ke be ke tla kgona go tšwela pele ke thuša bao ba bego ba se ba tšwa ba hwetša sebaka sa go ithuta ka Jehofa!” Le gona ka phuthegong go be go na le mošomo o montši. Riana o re: “Ke be ke abelwa go nea polelo ya phatlalatša gabedi ka kgwedi, ke tshediša beke e tee. Jehofa o be a ntlwaetša a diriša  mokgatlo wa gagwe.” Lehono, Riana o sa dutše a ruta batho bao ba bolelago Setandroy ka Jehofa.

Jehofa o re tshepiša gore o tlo šegofatša yo mongwe le yo mongwe yo a nyakago go mo hlankela. (Jes. 65:16) Jehofa o a re šegofatša ge re šoma ka thata gore re fenye mathata ao a ka re thibelago go oketša tirelo ya rena. Nagana ka Sylviana, yo re boletšego ka yena mathomong a sehlogo se. Gopola gore o be a inyatša, a nagana gore a ka se tsoge a kgonne go ya tlhokagalong. Ke ka baka la’ng a be a nagana bjalo? O re: “Leoto la ka la le letona le feta la le letshadi ka disenthimithara tše 9. Ka baka leo, ge ke sepela ke a hlotša, e bile ke lapa ka pela.”

Lega go le bjalo, ka 2014, Sylviana o ile a sepela le Sylvie Ann, e lego kgaetšedi wa mmulamadibogo yo a kopanelago le yena phuthegong e tee, gomme ba hudugela motsaneng wo o lego dikhilomithara tše 85 go tloga ga gabo bona. Go sa šetšwe bothata bja gagwe, toro ya Sylviana e ile ya phethagala gomme Jehofa a mo šegofatša kudu! O re: “Ka morago ga ngwaga o tee feela ke le kabelong ya ka e mpsha, Doratine, e lego mma yo ke bego ke bala le yena, o ile a kolobetšwa kopanong ya tikologo.”

Go etša ge re bone ka bana babo rena le dikgaetšedi bao ba hlankelago tlhokagalong, ge re leka ka matla gore re fenye mathata ao a ka re thibelago go oketša tirelo ya rena go Jehofa, re tlo bona ka mahlo a rena gore mantšu a Jehofa ao a a boditšego bahlanka ba gagwe ke a therešo. O itše: “Ke tla go matlafatša. Ruri ke tla go thuša.” (Jes. 41:10) Mafelelong, tswalano ya rena le Jehofa e tlo tia. Go oketša moo, ge re ikgafa ka go rata, e ka ba e le lefelong leo re dulago go lona goba nageng e šele, seo se tla re lokišeletša go dira mediro ya Modimo yeo re swanetšego go tlo e dira lefaseng le lefsa. Go etša ge Didier, yo re boletšego ka yena pejana a boletše, “go hlankela tlhokagalong go re tlwaeletša mošomo wa nakong e tlago!” Eka bašomi ba bangwe ba bantši bao ba ratago go ya tlhokagalong, ba ka dira seo kapejana!