1-3. Ke’ng seo se bolelwago ke go hlankela Jehofa ka “pelo e feletšego”? Nea mohlala.

KA GE re sa phethagala, re dira diphošo. Ka gona re leboga gore Jehofa ga a re sware “go ya ka tšeo di lebanego dibe tša rena,” ge feela re itshola gomme ka tumelo re kgopela gore a re lebalele dibe tša rena motheong wa sehlabelo sa topollo sa Jesu. (Ps. 103:10) Lega go le bjalo, go etša ge Dafida a ile a botša Solomone, e le gore Jehofa a amogele tsela yeo re mo hlankelago ka yona letšatši le letšatši, re swanetše go mo “[hlankela] ka pelo e feletšego.” (1 Dikor. 28:9) Ka ge re sa phethagala, re ka dira seo bjang?

² E le go re thuša go dira bjalo, re swanetše go bapiša bophelo bja Kgoši Asa le bja Kgoši Amatsia. Dikgoši tšeo tša Judea di ile tša dira dilo tše di lokilego mahlong a Jehofa, eupša Asa o ile a dira bjalo ka pelo e feletšego. (2 Dikor. 15:16, 17; 25:1, 2; Die. 17:3) Dikgoši tšeo ka bobedi di be di sa phethagala gomme di ile tša dira diphošo. Lega go le bjalo, Asa ga se a ka a aroga ditseleng tša Modimo ka gobane o be a ekwa Jehofa ka pelo “e feletšego.” (1 Dikor. 28:9) Eupša Amatsia yena o be a sa kwe Jehofa ka pelo e feletšego. Ka morago ga gore a fenye manaba a Modimo, o ile a boa le  medimo ya ona ya maaka gomme a thoma go e rapela.—2 Dikor. 25:11-16.

³ Go hlankela Modimo ka “pelo e feletšego” go bolela go mo kwa ka mehla. Ka Beibeleng, gantši lentšu “pelo” le šupa go seo motho a lego sona ka gare. Le akaretša dikganyogo tša motho, dikgopolo tša gagwe, mekgwa ya gagwe, bokgoni, dilo tšeo a di ratago le dipakane. Ka gona, motho yo a hlankelago Jehofa ka pelo e feletšego ga se moikaketši, e bile ga a hlankele Jehofa ka go ithola kgwara. Ga a hlankele Jehofa go no phetha molao. Go thwe’ng ka rena? Ge re tšwela pele re ekwa Modimo ka mehla, gaešita le ge re sa phethagala, re tla ba re mo hlankela ka pelo e feletšego.—2 Dikor. 19:9.

4. Re tlo ithuta ka’ng sehlogong se?

⁴ E le gore re kwešiše seo se bolelwago ke go hlankela Modimo ka pelo e feletšego, anke re ithuteng ka bophelo bja Asa le bja dikgoši tše dingwe tša Juda tšeo di ilego tša hlankela Modimo le go mo kwa ka pelo e feletšego, e lego Jehoshafate, Hesekia le Josia. Ka moka ga bona ba ile ba dira diphošo, eupša Jehofa ga se a ka a ba lahla. Ke ka baka la’ng Jehofa a be a ba lebelela ba mo hlankela ka pelo e feletšego, gona re ka ba ekiša bjang?

5. Asa o ile a dira’ng ge a thoma go buša?

⁵ Asa e bile kgoši ya boraro ya Juda ka morago ga gore mmušo wa meloko e lesome wa Isiraele o arogane. Ge a thoma go buša, o ile a fediša medimo ya maaka le banna bao e bego e le bagweba-ka-mmele ba tempeleng. O ile a tloša gaešita le Maaka makgolo’agwe gore e se sa ba “mohumagadi, ka gobane o be a dirile modingwana wa go šišimiša.” (1 Dikg. 15:11-13) Go feta moo, Asa o ile a kgothaletša batho ba gagwe gore ba “tsome Jehofa . . . le gore ba phethe molao le ditaelo tša gagwe.” Ee, o ile a thuša batho gore ba boele ba rapele Jehofa.—2 Dikor. 14:4.

6. Asa o ile a dira’ng ge Baethiopia ba be ba tlo lwa le naga ya Juda?

⁶ Jehofa o ile a dira gore nageng ya Juda go be le khutšo mengwageng ya mathomo e lesome ya pušo ya Asa. Ke moka Tsera wa Moethiopia o ile a tla go tlo lwa le naga ya Juda a na le mašole a 1 000 000 le dikoloi tša ntwa tše 300. (2 Dikor. 14:1, 6, 9, 10) Asa o ile a dira’ng ge a be a lebeletšane le kotsi ye? O ile a ithekga ka Jehofa ka mo go feletšego. (Bala 2 Dikoronika 14:11.) Jehofa o ile a araba thapelo ya Asa e tšwago pelong ka go mo thuša go fenya ntwa yeo le go bolaya mašole a Baethiopia. (2 Dikor. 14:12, 13) Gaešita le ge dikgoši tšeo Jehofa a bego a di kgetha di be di sa mmotegele, o be a di thuša go fenya manaba a tšona ka baka la leina la gagwe. (1 Dikg. 20:13, 26-30) Lega go le bjalo, Asa o be a ithekgile ka Modimo, gomme Modimo a araba thapelo ya gagwe. Ke therešo gore ka morago Asa o ile a dira dilo tša bošilo. Ka mohlala, o ile a kgopela kgoši ya Siria gore e mo thuše go lwa le manaba a gagwe, go e na le go kgopela thušo go Jehofa. (1 Dikg. 15:16-22) Le ge Asa a ile a dira dilo tšeo tša bošilo, Modimo o ile a mo lebelela e le yo a mo hlanketšego ka pelo “e feletšego bophelong bja gagwe ka moka.” Re ka ekiša bjang dilo tše dibotse tšeo Asa a ilego a di dira?—1 Dikg. 15:14.

7, 8. O ka ekiša Asa bjang ge o dutše o hlankela Jehofa?

⁷ Yo mongwe le yo mongwe wa rena o swanetše go itlhahloba go bona ge e ba a ekwa Modimo ka pelo e feletšego. Ipotšiše gore: ‘Na ke dira sohle seo nka se kgonago go thabiša Jehofa, go emela borapedi bja therešo le go šireletša batho ba gagwe dilong tše mpe?’ Nagana ka sebete seo Asa a ilego a se bontšha ge a be a tloša Maaka makgolo’agwe sedulong sa  bogoši, yoo e bego e le “mohumagadi” nageng yeo ya Juda! Mohlomongwe ga go na motho yo o tsebago a dira dilo tše mpe go swana le Maaka, eupša go ka ba le maemo ao go ona o ka ekišago sebete sa Asa. Ka mohlala, a re re setho sa lapa la geno goba mogwera wa gago o dirile sebe, a se itshole, gomme a kgaolwa. Na o tla kgaotša go gwerana le yena di tloga fase? Pelo ya gago e tlo go tutueletša go dira’ng?

⁸ Go swana le Asa, le wena o ka bontšha gore o kwa Jehofa ka pelo e feletšego ka go ithekga ka Yena ka mo go feletšego ge o lebane le diteko le ge e le dife, gaešita le tšeo di bonagalago di sa fele. Bao o tsenago le bona sekolo ba ka go kwera ka ge o le Hlatse ya Jehofa. Goba mohlomongwe bašomigotee le wena ba ka go kwera ge o kgopela go se be gona mošomong e le gore o dire dilo tša Modimo, goba ge o sa ke o šoma diiri tše di oketšegilego. Maemong a bjalo, rapela Modimo, go swana le Asa. Bontšha sebete gomme o ithekge ka Jehofa. O se ke wa tšhaba go emela se se lokilego. Gopola gore Modimo o ile a matlafatša Asa le go mo thuša, le wena o tla go thuša.

9. Re ka bontšha bjang gore re kwa Jehofa ka pelo e feletšego ge re le tšhemong?

⁹ Bahlanka ba Modimo ga ba thabišwe feela ke gore bona ba borapeding bja therešo. Asa o ile a thuša batho ba bangwe go hlankela Jehofa. Ka mo go swanago, le rena re thuša batho ba bangwe gore ba “tsome Jehofa.” Ruri Jehofa o a thaba ge a bona gore re botša baagišani ba rena le batho ba bangwe ka yena, le gore re dira seo ka gobane re mo rata kudu le gore re rata batho ba bangwe!

10, 11. O ka ekiša bjang mohlala wa Jehoshafate?

¹⁰ Morwa wa Asa e lego Jehoshafate “o sepetše tseleng ya Asa tatagwe.” (2 Dikor. 20:31, 32) O dirile seo bjang? Go swana le tatagwe, Jehoshafate o ile a kgothaletša setšhaba gore se tsome Jehofa. O dirile seo ka go rulaganya modiro o mogolo wa go ruta setšhaba sa gagwe dilo tšeo di ngwadilwego ka “[pukung] ya molao wa Jehofa.” (2 Dikor. 17:7-10) O ile a ba a ya le metseng ya mmušong wa ka leboa wa Isiraele, dithabeng tša Efuraime, “gore a se bušetše go Jehofa.” (2 Dikor. 19:4) Ruri kgoši Jehoshafate o ile a “[tsoma] Jehofa ka pelo ya gagwe ka moka!”—2 Dikor. 22:9.

¹¹ Ka moka ga rena re ka tšea karolo modirong o mogolo wa go ruta woo Jehofa a re neilego wona lehono. Na o ruta batho ba bangwe Lentšu la Modimo kgwedi e nngwe le e nngwe, le go ba thuša gore ba amogele therešo? Ge o ka ikgafa gomme wa kgopela Jehofa gore a go thuše, o ka kgona go thoma thuto ya Beibele. Na o rapelela seo? Na o tla dira boikgafo bjoo, gomme wa šoma tšhemo gaešita le ka nako yeo ba bangwe ba e lebelelago e le ya go khutša? Go etša ge Jehoshafate a ile a ya metseng ya Efuraime go yo thuša batho gore ba boele go Jehofa, le rena re ka thuša bao ba fodilego moyeng. Go oketša moo, bagolo ba etela batho ba ba kgaotšwego bao ba lego tšhemong ya phuthego ya gabo bona, bao ba ka bago ba tlogetše dibe tša bona.

12, 13. (a) Ge Jehoshafate a be a le bothateng bjo bogolo, o ile a dira’ng? (b) Go swana le Jehoshafate, ke ka baka la’ng re swanetše go amogela gore dilo tše dingwe di a re palela?

¹² Go swana le tatagwe e lego Asa, Jehoshafate o ile a dula a ekwa Modimo gaešita le ge a be a tlo hlaselwa ke lešaba le legolo la manaba. (Bala 2 Dikoronika 20:2-4.) Jehoshafate o ile a boifa kudu! Lega go le bjalo, o ile a “ikemišetša go tsoma Jehofa.” Ka boikokobetšo o ile a botša Jehofa ka thapelo gore setšhaba sa gagwe se be se se “na matla pele ga lešaba [leo]  le legolo,” le gore yena le setšhaba sa gagwe ba be ba sa tsebe gore ba dire eng. O ile a ithekga ka Jehofa ka mo go feletšego, a re: “Mahlo a rena a lebeletše wena.”—2 Dikor. 20:12.

¹³ Go swana le Jehoshafate, ka dinako tše dingwe re ka felelwa ke maano, gaešita le go ikwa re boifa. (2 Bakor. 4:8, 9) Eupša gopola gore ge Jehoshafate a be a rapela phatlalatša, o ile a amogela gore yena le setšhaba sa gagwe ba feletšwe ke maano. (2 Dikor. 20:5) Bao ba etelelago pele ka malapeng ba ka ekiša Jehoshafate ka go kgopela Jehofa gore a ba hlahle le go ba nea matla a go kgotlelela mathata. Ge o rapela Jehofa o na le lapa la gago, mmotše mathata a gago lapa la gago le theeditše. Lapa la gago le tla bona gore o ithekgile ka Jehofa. Modimo o ile a thuša Jehoshafate, le wena o tla go thuša.

14, 15. Hesekia o ile a bontšha bjang gore o be a ithekgile ka Jehofa ka mo go feletšego?

¹⁴ Ka go se swane le Jehoshafate, Hesekia o ile a lwela go ba kgoši e botse yeo e ‘kgomaretšego Jehofa,’ ka go se ekiše tatagwe yoo a bego a rapela medimo ya diswantšho. Hesekia o ile “a tloša mafelo a phagamego, a pšhatlaganya dikokwane tše kgethwa, a rema kota e kgethwa a ba a pšhatlaganya noga ya koporo yeo Moshe a bego a e dirile,” yeo ka nako yeo Baisiraele ba bego ba e rapela. O be a ekwa Jehofa ka mo go feletšego, ka gobane o ile a tšwela pele a “lota ditaelo tša Jehofa tšeo a bego a di laetše Moshe.”—2 Dikg. 18:1-6.

¹⁵ Gaešita le ge Asiria, yeo e bego e buša lefase ka nako yeo, e ile ya fenya metse ya Juda gomme e nyaka go hlasela Jerusalema, Hesekia o ile a ithekga ka Jehofa ka mo go feletšego. Kgoši ya Asiria e lego Sanheribe o ile a kwera Jehofa gomme a tšhošetša Hesekia gore a ineele go yena. Lega go le bjalo, Hesekia o ile a bontšha thapelong ya gagwe gore o botile Jehofa ka mo go feletšego gore o tla ba phološa. (Bala Jesaya 37:15-20.) Jehofa o ile a araba thapelo ya Hesekia ka go romela morongwa wa gagwe gore a bolaye mašole a Baasiria a 185 000.—Jes. 37:36, 37.

16, 17. O ka ekiša Hesekia bjang ge o dutše o hlankela Jehofa?

¹⁶ Ka morago, Hesekia o ile a babja wa go hwa. O ile a lopa Jehofa gore a gopole dilo tše dibotse tšeo a di dirilego. (Bala 2 Dikgoši 20:1-3.) Mangwalo a re botša gabotse gore ga re phele mehleng yeo re ka letelago gore Modimo a re fodiše ka mohlolo goba gore a re okeletše matšatši a bophelo. Lega go le bjalo, go swana le Hesekia, yo mongwe le yo mongwe wa rena a ka botša Jehofa thapelong ya gagwe a re: “Ke [sepetše] ka go botega pele ga gago le ka pelo ka moka.” Na o a dumela gore Jehofa a ka go thuša gaešita le ge o babja?—Ps. 41:3.

¹⁷ Ge o naganišiša ka mohlala wa Hesekia, o ka bona dilo tšeo di go šitišago go ba le tswalano e botse le Jehofa goba tšeo di go arošago borapeding bja therešo. Ge e ba go le bjalo, kgaogana le tšona. Ga re nyake go ekiša batho ba lefase bao ba dirišago mekgwa ya poledišano ya Inthaneteng go swara batho ba bangwe okare ke medingwana. Ke therešo gore Bakriste ba bangwe ba ka thabela go boledišana le ditho tša malapa a bona le bagwera ba diriša mekgwa yeo. Eupša batho ba bantši lefaseng ba diriša mekgwa yeo ka mo go feteletšego, ba nyaka go tseba selo se sengwe le se sengwe ka batho bao le go ba tseba ba sa ba tsebego. Goba ba senya nako e ntši ba lebeletše dinepe tša batho bao goba ba bala ka bona. Kotsi ke gore Mokriste a ka feleletša a senya nako a dira dilo tše di se nago mohola. Mokriste a ka ba a ikgantšha ka palo ya batho bao ba dulago ba bona dinepe tša gagwe le melaetša mekgweng ya poledišano ya Inthaneteng, e bile a ka ba a  kwatišwa ke gore ba bangwe ga ba sa nyaka go tseba ka yena. Ge nkabe moapostola Paulo goba Akhwila le Perisila ba be ba phela mehleng ye, na o nagana ba be ba tla swarega ka go bea dinepe tša bona Inthaneteng, goba ka go nyaka go tseba ka batho bao e sego Dihlatse? Beibele e re botša gore Paulo o be a “[swaregile] kudu ka lentšu.” Le gona, Akhwila le Perisila ba be ba diriša nako ya bona go hlalosetša batho ba bangwe “tsela ya Modimo ka mo go nepagetšego kudu.” (Dit. 18:4, 5, 26) Ka gona ipotšiše gore: ‘Na ke phema go lebelela batho ba bangwe okare ke medingwana goba go senya nako ke dira dilo tša go se re selo?’—Bala Baefeso 5:15, 16.

18, 19. O nyaka go ekiša Josia ka ditsela dife?

¹⁸ Kgoši Josia, e lego setlogolwana sa Hesekia, le yena o ile a dula a dira ‘ka pelo ya gagwe ka moka’ seo Jehofa a se ratago. (2 Dikor. 34:31) Ge e be e sa le mošemane, “o ile a thoma go tsoma Modimo wa Dafida,” gomme ge a na le mengwaga e 20, a thoma go fediša borapedi bja maaka nageng ya Juda. (Bala 2 Dikoronika 34:1-3.) Josia o be a dira ka pelo ka moka dilo tšeo di bego di thabiša Modimo, go feta dikgoši tše dintši tša Juda. Go oketša moo, ka morago ga gore moperisita yo a phagamego a hwetše puku ya Molao wa Moshe yeo go ka diregago gore e ngwadilwe ke Moshe ka letsogo, e ile ya balelwa Josia gomme a dira dilo tšeo di ngwadilwego ka go yona. O ile a kgothaletša batho ba gagwe gore ba hlankele Jehofa. Ka go re’alo, batho “ga se ba ka ba tlogela go latela Jehofa” mehleng ka moka ya ge Josia a sa phela.—2 Dikor. 34:27, 33.

¹⁹ Go swana le Josia, bafsa ba swanetše go thoma go tsoma Jehofa e sa le ba banyenyane. Go ka direga gore Kgoši Manase yo a bego a itshotše dibeng tša gagwe o ile a ruta Josia ka kgaugelo ya Modimo. Lena bafsa, gweranang le batho ba godilego bao ba botegago malapeng a gabo lena le ka phuthegong gomme le ithute kamoo Jehofa a ilego a ba thuša ka gona. Le gona gopolang gore Mangwalo ke wona a ilego a thuša Josia gore a dire dilo tšeo di thabišago Jehofa. Ge le ka bala Lentšu la Modimo, le tla kgona go dira dilo tšeo di tla le thabišago kudu, la tiiša segwera sa lena le Modimo gaešita le go tutueletšega go thuša ba bangwe gore ba tsome Modimo. (Bala 2 Dikoronika 34:18, 19.) Le gona go ithuta Beibele go ka le thuša gore le bone moo le ka kaonefatšago tirelong ya lena go Modimo. Ekišang Josia, gomme le direng bjalo ka pelo ka moka.

20, 21. (a)  Ke’ng seo dikgoši tše nne tšeo re boletšego ka tšona di swanago ka sona? (b) Re tlo bolela ka’ng sehlogong se se latelago?

²⁰ Ka ge re ithutile ka dikgoši tše nne tša Juda tšeo di ilego tša hlankela Jehofa ka pelo e feletšego, na go na le seo o ithutilego sona? Dikgoši tšeo di be di dira thato ya Modimo ka mafolofolo e bile di mo kwa ka pelo ka moka. Di ile tša dula di dira thato ya Modimo. Di ile tša dira bjalo gaešita le ge di be di lebane le mathata a magolo le manaba a boifišago. Sa bohlokwa le go feta ke gore di be di hlankela Jehofa ka pelo e tšhweu.

²¹ Bjalo ka ge re tla bona sehlogong se se latelago, dikgoši tše nne tšeo re boletšego ka tšona di ile tša dira diphošo. Lega go le bjalo, ge Mohlahlobi wa dipelo a be a di lebeledišiša, o ile a bona gore di be di mo hlankela ka pelo e feletšego. Le rena ga se ra phethagala. Ge Jehofa a dutše a re hlahloba, na o bona re mo hlankela ka pelo e feletšego? Anke re boleleng ka taba yeo sehlogong se se latelago.