GE MOTHO a go lebelela ka go myemyela, o arabela bjang? Ga go pelaelo gore le wena o a myemyela. Mohlomongwe le wena o ikwa o thabile. Go myemyela mo go tšwago pelong—go sa šetšwe gore ke ga bagwera goba ga batho bao o sa ba tsebego—go a fetela, e bile go dira gore motho a ikwe gabotse. Mosadi yo a bitšwago Magdalena o itše: “Georg, e lego monna wa ka yo a hlokofetšego, o be a rata go myemyela. Ge re be re lebelelana, ke be ke ikwa ke iketlile e bile ke šireletšegile.”

Go myemyela mo go tšwago pelong go bontšha gore motho o na le maikwelo a mabotse a bjalo ka go thaba le go hlalala. Sehlogo se se lego ka makasineng wa Inthaneteng wa Observer wa Association for Psychological Science se bolela gore ke therešo gore “go bonagala re belegwa re kgona go myemyela.” Sehlogo seo se boletše gore gaešita le masea a kgona go “kwešiša ponagalo ya sefahlego gabotse kudu.” Gape sehlogo seo se itše: “Ga se feela gore batho ba kwešiša molaetša o mobotse wa ge motho a myemyela, eupša ba bile ba diriša kwešišo yeo go laola boitshwaro bja bona.”

Banyakišiši ba Yunibesithing ya Harvard ba ile ba dira nyakišišo ka tsela yeo batšofadi bao ba lwalago ba arabelago ka yona ge ba bona ponagalo ya sefahlego ya bahlokomedi ba bona ba tša maphelo. Banyakišiši bao ba boletše gore ge ponagalo ya sefahlego ya bahlokomedi “e be e bonagala e bontšha borutho, go ba le taba, go tshwenyega gotee le go ba kwela bohloko,” balwetši ba ile ba ikwa ba kgotsofetše gomme ba kaonefala mmeleng le maikwelong. Go be go direga se se fapanego ge  ponagalo ya sefahlego ya bahlokomedi e be e bonagala e se na bogwera, gomme balwetši ba ikwa ba sa lokologe go ba le bona.

Ge o myemyela, le wena o ka ba o ikhola. Dinyakišišo di bontšha gore mehola ya go myemyela e akaretša go ikholofela ka mo go oketšegilego, go thaba le go ikwa o sa gateletšega. Go senya sefahlego go ka ba le mafelelo a sa kgahlišego ge go bapišwa le go myemyela.

Magdalena, yo go boletšwego ka yena pejana, e be e le Hlatse ya Jehofa nakong ya Ntwa ya Bobedi ya Lefase. Yena le ba bangwe ba lapa labo ba ile ba romelwa kampeng ya tshwenyo ya Ravensbrück kua Jeremane ka ge ba be ba ganne go amogela dikgopolo tša Manazi. O itše: “Ka dinako tše dingwe bahlapetši ba be ba re thibela go boledišana le bagolegwa ba bangwe. Eupša ba be ba sa kgone go laola ponagalo ya rena ya sefahlego. Ke be ke kgothatšwa ke ge ke bona mma le ngwanešo ba myemyela moo le nna ke bego ke ikwa ke na le matla a go kgotlelela.”

Mohlomongwe o ikwa o palelwa ke go myemyela ka baka la dipelaelo tša bophelo. Lega go le bjalo, gopola gore tsela yeo o ikwago ka yona e bakwa ke tsela yeo o naganago ka yona. (Diema 15:15; Bafilipi 4:8, 9) Ka gona, le ge go ka ba go le thata, ke ka baka la’ng ge go kgonega o sa leke go nagana ka dilo tše dibotse le tše di thabišago? * Batho ba bantši ba thušitšwe ke go bala Beibele le go rapela gore ba dire sona seo. (Mateo 5:3; Bafilipi 4:6, 7) Ge e le gabotse, mantšu “thaba” le “hlalala” gotee le mantšu a mantši ao a nago le modu o swanago le wa ona, a tšwelela ka makga a makgolo ka Beibeleng! Ke ka baka la’ng o sa bale letlakala letee goba a mabedi a Beibele ka letšatši? Go tseba mang gore mohlomongwe le wena o ka ikhwetša o myemyela gantši?

Le gona, o se ke wa letela gore ba bangwe e be bona ba myemyelago pele. Myemyela; dira gore motho yo mongwe a thabe. Lebelela go myemyela ga gago ka tsela yeo go lego ka yona, e le mpho e tšwago go Modimo yeo e matlafatšago wena le batho bao ba go bonago o myemyela.