Ekišang Tumelo ya Bona

O Ile a Lwantšhana le Poifo le Pelaelo

PETRO o be a lapišitšwe ke lehuduo gomme a phafogile bošego ka moka. Na seetšana se sa bonagalego gabotse seo a bego a se bona thokong ya bohlabela e be e le pontšho ya gore masa a batametše? Digoba tša gagwe tša mokokotlo le magetla di be di lapišitšwe ke go hudua lesela-watle diiri tše dintši. Diphefo tše matla di ile tša dira gore Lewatle la Galilea le galefe. Maphoto a be a betha hlogo ya sekepe sa go rea dihlapi, gomme a mo gaša ka meetse a tonyago. O ile a tšwela pele a hudua lesela-watle.

Morago kua lebopong, Petro le bagwera ba gagwe ba be ba tlogetše Jesu a nnoši. Letšatšing leo, ba be ba bone Jesu a fepa lešaba la ba dikete leo le bego le swerwe ke tlala ka dinkgwa le dihlapi tše sego kae feela. Batho ba ile ba arabela ka go nyaka go dira Jesu kgoši, eupša o be a sa nyake go tšea karolo dipolitiking. Le gona o be a ikemišeditše go kgothaletša balatedi ba gagwe gore ba se ke ba phegelela dipakane tše bjalo. A tšhabela mašaba, o ile a gapeletša barutiwa ba gagwe gore ba namele lesela-watle gomme ba ye lebopong ka mošola ge yena a be a e-ya go rapela thabeng a nnoši.—Mareka 6:35-45; Johane 6:14, 15.

Ngwedi, wo o bego o le kgaufsi le go ba wa letopa-nta, o be šetše o le sebaka-bakeng ge barutiwa ba be ba namela lesela-watle; ga bjale o be o dikela ganyenyane-ganyenyane ka thokong ya bodikela. Lega go le bjalo, ba ile ba kgona go sepela feela dikhilomithara tše mmalwa. Go tšutla ga phefo le go duma ga maphoto, go ile gwa dira gore go boledišana go be thata. Mohlomongwe, Petro o be a ikhomoletše a naganišiša.

Ruri o be a e-na le dilo tše dintši tšeo a ka naganago ka tšona! O be a e-na le nywaga ya ka godimo ga e mebedi yeo e tletšego ditiragalo a latela Jesu wa Natsaretha. O be a ithutile go gontši, eupša go be go sa na le dilo tše dintši tšeo a bego a sa tlo ithuta tšona. Go ikemišetša ga gagwe go dira bjalo—go katana le mapheko a bjalo ka pelaelo le poifo—go mo dira mohlala o mobotse woo re swanetšego go o latela. A re boneng gore bjang.

“Re Hweditše Mesia”!

Petro o be a ka se tsoge a lebetše letšatši leo a ilego a gahlana le Jesu wa Natsaretha ka lona. Ngwanabo, Andrea, o ile a thoma ka go mo tlišetša ditaba tše di kgahlišago, a re: “Re hweditše Mesia.” Ka mantšu ao, bophelo bja Petro bo ile bja thoma go fetoga. Bo be bo ka se sa hlwa bo le ka mokgwa woo bo lego ka gona.—Johane 1:41.

Petro o be a dula Kaperenaume, motse wo o lego lebopong la letsha la meetse a se nago letswai leo le bitšwago Lewatle la Galilea. Yena le Andrea e be e le badirišani le Jakobo le Johane, barwa ba Tsebedeo, kgwebong ya go rea dihlapi. Petro o be a sa dule le mosadi wa gagwe feela, eupša gape o be a dula le mogwegadi wa gagwe gotee le ngwanabo e lego Andrea. Bakeng sa go hlokomela lapa leo ka go rea dihlapi ka ntle le pelaelo go be go nyaka go šoma ka thata, matla gotee le bokgoni bja go rarolla mathata. Re ka akanya ka mašego a mantši a go šoma ka thata—banna bao ba goga malokwa a lego magareng ga masela-watle a mabedi gomme ba goga dihlapi ka moka tšeo ba di swerego ka letsheng. Re ka akanya le ka matšatši ao ba bego ba a fetša ba šoma ka thata, ge dihlapi di be di bewa ka magoro gomme di rekišwa, malokwa a lokišwa e bile a hlwekišwa.

Beibele e re botša gore Andrea e be e le morutiwa wa Johane Mokolobetši. Ga go pelaelo gore Petro o ile a kwa dipego tša ngwanabo mabapi le molaetša wa Johane e le tše kgahlišago ka mo go tseneletšego. Ka letšatši le lengwe, Andrea o ile a bona Johane a šupa Jesu wa Natsaretha gomme a re: “Bonang, Kwana ya Modimo!” Gatee-tee  Andrea o ile a ba molatedi wa Jesu gomme ka mafolofolo a botša Petro ditaba tše tše di kgahlišago: Mesia o fihlile! (Johane 1:35-40) Ka morago ga borabele bja kua Edene mo e ka bago nywaga e 4 000 pele ga moo, Jehofa Modimo o be a holofeditše gore go be go tla tla motho yo bohlokwa yo a bego a tla nea batho kholofelo ya kgonthe. (Genesi 3:15) Andrea o be a šetše a gahlane le Mophološi yo, Mesia ka boyena! Petro le yena o ile a kitimela go yo mo gahlanetša.

Go fihla letšatšing leo, Petro o be a tsebja e le Simone goba Simeoni. Eupša Jesu o ile a mo lebelela gomme a re: “‘O Simone morwa wa Johane; o tla bitšwa Kefase’ (yeo e fetolelwago e le Petro).” (Johane 1:42) “Kefase” ke leina le le tlwaelegilego leo le rago gore “letlapa,” goba “lefsika.” Go molaleng gore mantšu a Jesu e be e le a boporofeta. O ile a bona e sa le pele gore Petro o be a tla ba bjalo ka lefsika—tutuetšo e tiilego, e maatla le e botegago go balatedi ba Kriste. Na Petro o be a itebelela ka tsela yeo? Ga go bonagale bjalo. Gaešita le batho ba bangwe bao ba balago dipego tša Ebangedi lehono ga ba bone eka Petro o be a e-na le dika tšeo di swanago le lefsika. Ba bangwe ba šišinya gore o be a bonagala a se a tsepama e bile e le yo a dika-dikago.

Ke therešo gore Petro o be a e-na le mafokodi a gagwe. Jesu o be a tseba mafokodi a Petro. Eupša Jesu, go swana le Tatagwe, Jehofa, ka mehla o be a lebelela dika tše dibotse bathong. Jesu o be a bone gore Petro o be a ka ba le dika tše dibotse, gomme O be a nyaka go mo thuša go aga dika tšeo tše dibotse. Jehofa le Morwa wa gagwe ba lebelela dika tše dibotse le go rena lehono. Go ka ba thata go dumela gore go na le dika tše dintši tše dibotse tšeo ba ka di hwetšago go rena. Lega go le bjalo, re swanetše go bota tsela yeo ba re lebelelago ka yona gomme re itlhatsele re ikemišeditše go tlwaetšwa le go bopša go etša Petro.—1 Johane 3:19, 20.

“Tlogela go Boifa”

Mohlomongwe Petro o ile a sepela le Jesu karolong ya leeto la gagwe la boboledi le le bego le thomile. Ka go rialo a ka ba a ile a bona Jesu a dira mohlolo wa gagwe wa pele, wa go fetola meetse go ba beine monyanyeng wa lenyalo kua Kana. Se bohlokwa le go feta, o ile a kwa molaetša wa Jesu o kgahlišago le o tletšego kholofelo wa mabapi le Mmušo wa Modimo. Lega go le bjalo, o ile a mo tlogela gomme a boela kgwebong ya gagwe ya go rea dihlapi. Lega go le bjalo, dikgwedi tše itšego ka morago, Petro o ile a kopana le Jesu gape—gomme lebakeng le Jesu o kgopela Petro gore a mo latele ka nako e tletšego e le tsela ya bophelo.

Petro o be a sa tšwa go kgotlelela mošomo o sa kgahlišego wa bošego. Nako le nako ge barei ba dihlapi ba be ba ntšha malokwa a bona ka meetseng, ba be ba hwetša a se na selo. Go molaleng gore Petro o dirišitše phihlelo le bokgoni bja gagwe ka moka go hwetša dihlapi, a leka mafelo a fapa-fapanego a letsha go nyaka moo dihlapi di hwetšagalago gona. Ga go pelaelo gore go be go e-na le dinako tšeo yena, go swana le barei ba bantši ba dihlapi, a bego a duma ge a ka kgona go lebelela ka meetseng ao a bilogilego gomme a bona dihlapi tše dintši goba go duma gore di ka tsena malokweng a gagwe. Ke therešo gore dikgopolo tše bjalo di be di ka dira gore a gakanege le go feta. Ye e be e se tsela ya Petro ya boithabišo; batho ba be ba ithekgile ka yena gore a sware dihlapi. Mafelelong, o ile a boela lebopong a se a swara selo. Lega go le bjalo, o be a swanetše go hlwekiša malokwa. Ka gona, o be a swaregile kudu ka go hlwekiša malokwa ge Jesu a be a mmatamela.

Lešaba le be le dikologile Jesu, le theeditše ka phišego seo a bego a se bolela. Ka ge a be a dikologilwe ke lešaba, Jesu o ile a namela lesela-watle la Petro gomme a mo kgopela gore a šutiše lesela-watle go se nene go tloga lešing. Ka lentšu la gagwe leo le kwagalago gabotse meetseng, Jesu o ile a ruta lešaba. Petro o ile a theetša ka kelohloko go  fo swana le bao ba bego ba le lebopong. Ga se a ka a lapa go kwa ge Jesu a godiša sehlogo se segolo sa boboledi bja gagwe—Mmušo wa Modimo. E be e tla ba tokelo e kgolo gakaakang go thuša Kriste go phatlalatša molaetša wo wa kholofelo nageng ka moka! Eupša na o be a ka kgona go dira bjalo? Ba be ba tla iphediša ka’ng? Mohlomongwe Petro o ile a nagana gape ka bošego bjoo a bo feditšego a leka go rea dihlapi.—Luka 5:1-3.

Ge Jesu a fetša go bolela, o ile a botša Petro gore: “E-yang moo go išago tlase, gomme le theošeng malokwa a lena gore le sware.” Petro o be a e-na le dipelaelo. O itše: “Morutiši, re itapišitše bošego ka moka gomme ra se hwetše selo, eupša ke tla theoša malokwa go ya ka taelo ya gago.” Go molaleng gore selo sa mafelelo seo Petro a bego a sa nyake go se dira e be e le go theoša malokwa ao gape—kudu-kudu ga bjale ka ge dihlapi di be di sa hwetšagale! Lega go le bjalo, o ile a kwa, mohlomongwe a bontšha badirišani ba gagwe ka lesela-watleng la bobedi gore le bona ba dire bjalo.—Luka 5:4, 5.

Petro o ile a kwa boima bjoo a bego a se a bo letela ge a thoma go goga malokwa. A tlabegile, o ile a goga a tiišitše, gomme go se go ye kae, o be a kgona go bona dihlapi tše dintši tšeo di bego di nyeuma! A tlaletšwe, o ile a bitša banna bao ba bego ba le lesela-watleng la bobedi gore ba tle ba mo thuše. Ge ba be ba dira bjalo, kapejana go ile gwa ba molaleng gore lesela-watle le tee le be le ka se kgone go rwala dihlapi tšeo ka moka. Di ile tša tlatša masela-watle ao a mabedi, le gona di be di sa dutše e le tše dintši kudu—masela-watle a ile a thoma go nwelela ka baka la boima. Petro o ile a tlabega o šoro. O be a ile a bona Kriste a diriša matla a gagwe pejana, eupša seo se bego se direga lebakeng le se be se mo kgoma kudu! Monna šo yoo a kgonago le go dira gore dihlapi di tsene ka gare ga malokwa! Petro o ile a welwa ke poifo. O ile a wela fase matolong Jesu a re: “Tloga go nna Morena, gobane ke motho wa sebe.” O be a ka swanelega bjang go gwerana le Yoo a kgonago go diriša matla a Modimo ka ditsela tše bjalo?—Luka 5:6-9.

Jesu ka botho o itše: “Tlogela go boifa. Go tloga bjale go ya pele o tla be o swara batho ba phela.” (Luka 5:10, 11) Ye e be e se nako ya pelaelo goba poifo. Dipelaelo tša Petro tša mabapi le ditaba tše bjalo tša ka mehla tše swanago le go rea dihlapi di be di se na motheo; dipoifo tša gagwe tša mabapi le diphošo tša gagwe le go ikwa a sa swanelege di be di se na motheo. Jesu o be a e-na le modiro o mogolo woo a swanetšego go o dira, bodiredi bjoo bo bego bo tla kgoma bokamoso bja batho. O be a hlankela Modimo yo a nago le “tebalêlô e nntši.” (Jesaya 55:7) Jehofa o be a tla hlokomela dinyakwa tša bona tša nama le tša moya.—Mateo 6:33.

Petro o ile a arabela ka go akgofa, go swana le Jakobo le Johane. “Ba bušetša masela-watle lešing, ba tlogela tšohle gomme ba mo latela.” (Luka  5:11) Petro o ile a bontšha tumelo go Jesu gotee le go Yo a mo romilego. O be a dirile phetho e kaone-kaone. Bakriste bao lehono ba fenyago dipelaelo le poifo tša bona bakeng sa go hlankela Modimo le bona ba bontšha tumelo. Potego e bjalo go Jehofa le ka mohla ga e lebiše go šele.—Psalme 22:4, 5.

“Ke ka Baka La’ng o Fentšwe ke Pelaelo?”

Nywaga e ka bago e mebedi ka morago ga go gahlana le Jesu, Petro o ile hudua lesela-watle bošegong bjo bo tšutlago phefo Lewatleng la Galilea leo go boletšwego ka lona mathomong. Ke therešo gore re ka se tsebe seo a bego a se nagana. Go be go e-na le dilo tše dintši tšeo a bego a ka nagana ka tšona. Jesu o be a fodišitše mogwegadi wa Petro. O be a šetše a neetše Thuto ya Thabeng. Nako le nako, ge a ruta le ge a dira mediro e matla, o ile a bontšha gore ke yena Mesia Yo a Kgethilwego ke Jehofa. Ge dikgwedi di feta, diphošo tša Petro tše bjalo ka tshekamelo ya gagwe ya go ineela poifong le pelaelong di be di fokotšegile go fihla bokgoleng bjo itšego. Jesu o be a šetše a kgethile Petro gore a be yo mongwe wa baapostola ba 12! Lega go le bjalo, Petro o be a se a hlwa a fenya poifo le pelaelo, bjalo ka ge a be a tla bona seo kgaufsinyana.

Lebakeng la tlhapetšo ya bone ya bošego, goba nakong ya magareng ga 3:00 mesong le go hlaba ga letšatši, gatee-tee Petro o ile a kgaotša go hudua lesela-watle gomme a dula ka go otlologa. Moo—ka kua ga maphoto—go be go e-na le selo se se sepelago! Na e be e le meetse a maphoto a bontšhago seetša sa ngwedi? Aowa, se be se sa šišinyege e bile se otlologile. E be e le motho! Ee, e be e le motho gomme o be a sepela godimo ga meetse a lewatle! Ge motho yo a batamela, go be go bonagala eka o tlo sepela kgaufsi le bona. Ka letšhogo, barutiwa ba be ba nagana gore ke seriti. Motho yoo o ile a bolela, a re: “Tiang matla, ke nna; le se boife.” E be e le Jesu!—Mateo 14:25-28.

Petro o ile a araba ka gore: “Morena, ge e ba e le wena, ntaele gore ke tle go wena ke sepela godimo ga meetse.” Maikwelo a gagwe a mathomo e be e le a bontšhago sebete. A kgahlilwe ke mohlolo wo wa moswana-noši, Petro o ile a nyaka go tiiša tumelo ya gagwe le go feta. O be a nyaka go akaretšwa go seo se diregago. Ka botho, Jesu o ile a mmitša. Petro o ile a fologa lesela-watle gomme a sepela godimo ga meetse ao a nago le maphoto a lewatle. Akanya kamoo Petro a ilego a ikwa ka gona ge a hwetša gore moo a bego a gata gona go be go tiile gomme a kgona go ema godimo ga meetse. O swanetše go ba a ile a makala ge a e-ya go Jesu. Lega go le bjalo, kapejana o ile a ba le maikwelo a mangwe.—Mateo 14:29.

Petro o be a swanetše go dula a lebišitše tlhokomelo ya gagwe go Jesu. E be e le Jesu, a diriša matla a Jehofa, yo a bego a dira gore Petro a be ka godimo ga maphoto. Le gona Jesu o be a dira se ka  baka la tumelo yeo Petro a bego a e-na le yona. Eupša Petro o ile a šitišega. Re bala gore: “Ge a lebelela ledimo, a tšhoga.” Petro o ile a bona maphoto ao a betha lesela-watle, a gašanya meetse le mahulo, gomme o ile a tšhoga. Mohlomongwe o ile a akanya a nwelela ka letsheng leo gomme a kgangwa ke meetse. Ge poifo e dutše e gola ka pelong ya gagwe, tumelo ya gagwe e ile ya fokotšega. Monna yo yoo a ilego a reelwa leina la Lefsika ka baka la kgonagalo ya gore a ka ba yo a sa šišinyegego o ile a thoma go nwelela bjalo ka lefsika ka baka la tumelo ya gagwe e fokolago. Petro o be a e-na le bokgoni bja go rutha, eupša ga bjale ga se a ka a ithekga ka bokgoni bjoo. O ile a goeletša a re: “Morena, mphološe!” Jesu o ile a mo swara ka letsogo gomme mo ntšha ka moo meetseng. Ke moka, ge a sa dutše a le godimo ga meetse, o ile a gatelela thuto ye e bohlokwa go Petro: “Wena wa tumelo e nyenyane, ke ka baka la’ng o fentšwe ke pelaelo?”—Mateo 14:30, 31.

‘Go fenywa ke pelaelo’—a ke mantšu a swanelegago gakaakang! Pelaelo e ka ba le tutuetšo e matla le e senyago. Ge e ba re ineela go yona, e ka senya tumelo ya rena ganyenyane-ganyenyane. Re swanetše go katanela go lwantšhana le yona! Bjang? Ka go lebiša tlhokomelo mo go swanetšego. Ge e ba re lebiša tlhokomelo go seo re se boifago, seo se re nyamišago le seo se re šitišago go lebiša tlhokomelo go Jehofa le Morwa gagwe, dipelaelo tša rena di tla oketšega. Ge e ba re lebiša tlhokomelo ya rena go Jehofa le Morwa wa gagwe, go seo ba re diretšego sona, seo ba re direlago gotee le go seo ba tlago go se direla bao ba ba ratago, re ka se be le dipelaelo tšeo di tla senyago tumelo ya rena.

Ge Petro a be a latela Jesu ba lebile lesela-watleng, o ile a bona ledimo le okobala. Lewatle la Galilea le ile la homola. Petro o ile a tlatša barutiwa ba bangwe ge ba bolela gore, “Ruri o Morwa wa Modimo.” (Mateo 14:33) Ge go esa, pelo ya Petro e be e tletše ka tebogo. O ile a lahla poifo le dipelaelo. Ke therešo gore o be a swanetše go dira diphetogo tše dintši pele a ka ba Mokriste yo a swanago le lefsika yoo Jesu a bilego le ponelo-pele ka yena. Eupša o be a ikemišeditše go dula a leka go tšwela pele le go gola. Na o na le boikemišetšo bjo bjalo? Ka ntle le pelaelo o tla hwetša gore tumelo ya Petro e swanelwa ke go ekišwa.

[Seswantšho go letlakala 22, 23]

Jesu o ile a bona dika tše dibotse go morei yo yoo a ikokobeditšego wa dihlapi

[Seswantšho go letlakala 23]

“Morena, . . . ke motho wa sebe”

[Seswantšho go letlakala 24, 25]

“Ge a lebelela ledimo, a tšhoga”