Ga ba sa Boifa Bofelo

MAFELELONG a bo-1970, Gary le Karen ba be ba kgodišegile gore bofelo bo kgaufsi. Ka gona, ba ile ba huduga toropong ba ya go dula motse-magaeng gomme ba dira phetho ya go kgotsofalela seo ba nago le sona ka mo go feletšego. Ba be ba nyaka go phologa.

Bakeng sa go hwetša bokgoni bja mešomo bjoo ba bego ba tla bo diriša, ba ile ba reka dipuku, ba ya diklaseng le diseminaring gomme ba bolela le batho ba bantši ka mo go kgonegago. Ba ile ba dira serapa gomme ba bjala mehlare e menyenyane e 50 ya dienywa. Ba ile ba reka peu e ntši le didirišwa tše dintši. Ba ile ba ithuta go bjala le go boloka dijo. Mogwera o ile a ba ruta go hlaba diphoofolo le go beka nama ya tšona. Karen o ile a ithuta ka mehlare le medu ya nageng e le gore ge ba ka felelwa ke dijo ba tle ba e-je. Gary o ile a ithuta go dira dibešwa ka lehea, a aga setofo sa tšhipi sa go bešwa ka dikgong, a ba a aga ngwako wo monyenyane.

Karen o re: “Ka baka la maemo a sa kgahlišego a lefase a nakong yeo, ke ile ka bona eka tlhabologo e tla fedišwa go se go ye kae.” Gary o hlalosa ka gore: “Go swana le bafsa ba bangwe, ke be ke swaregile ka go leka go lokiša kgethollo ya semorafo, Ntwa ya Vietnam, gotee le bomenetša. Eupša go se go ye kae ke ile ka nolega moko. Ke ile ka bona eka batho ba be ba tlo fedišana ge dilo di ka tšwela pele ka mokgwa wo.”

Gary o re: “Bošegong bjo bongwe, ke ile ka ba le nako  e oketšegilego, ka gona ka tšea Beibele gomme ka bala go tloga go Mateo go fihla go Kutollo. Ke ile ka e bala gape mašegong a mane a latetšego. Mesong ya bohlano, ke ile ka botša Karen ka re: ‘Re phela mehleng ya bofelo. Modimo o tlo gata mogato wa go fediša lefase kgaufsinyane. Re swanetše go hwetša bao ba tlago go phologa.’” Gary le Karen ba ile ba thoma go ya madumeding a fapa-fapanego, ba nyakana le batho bao ba itokišeletšago bofelo.

Go se go ye kae, yo mongwe wa Dihlatse tša Jehofa o ile a ba etela gomme a thoma go ithuta Beibele le bona. Karen o gopola ka gore: “Ke be ke thabile kudu ka gobane ke be ke hlalosetšwa Mangwalo. Therešo mabapi le bofelo ke seo ke bego ke se nyaka gomme ke e hweditše mafelelong. Go be go e-na le kholofelo ya kgonthe ya bokamoso. Eupša se se kgahlišago le go feta ke gore, ke ile ka thoma go gwerana le Tate wa legodimong, yena Mmopi le Modimo wa legohle.”

Gary o re: “Bophelo bja-ka bo ile bja ba le morero wa kgonthe. Gatee-tee ge ke se na go thoma go ithuta Beibele, ga se ka ka ka kgaotša. Ke ile ka bala boporofeta bja Beibele, ka hlahloba bohlatse bja gore bo a phethagala gomme ka kgodišega gore Modimo o tla gata mogato go se go ye kae. Ke ile ka nagana ka gore, ‘Batho ga se ba swanela go itokišeletša phedišo, eupša ba swanetše go itokišeletša bophelo bjoo Modimo a nyakago go re fa bjona.’” Gary le Karen ba ile ba ba le pono e nepagetšego ka bokamoso. Go e na le go tshwenyega ka bofelo bja lefase, ba ile ba kgodišega gore Modimo o tla fediša mathata ao a tlaišago batho gomme a tsošološa lefase gore e be paradeise.

Gary le Karen ba dira’ng gona bjale, nywageng e ka bago e 25 ka morago? Karen o re: “Ke tšwela pele ke aga lerato leo ke ratago Jehofa ka lona le tumelo ya-ka go yena, gomme ke leka go thuša ba bangwe gore ba dire bjalo. Nna le Gary re a thekgana ge re dutše re matlafatša lapa la rena le go ba batee borapeding bja Modimo. Re leka go dula re e-na le thulaganyo e bile re katanela go boloka bophelo bja rena bo le bonolo e le gore re ka lebiša tlhokomelo go ba bangwe le dinyakwa tša bona.”

Gary o oketša ka gore: “Ka mehla ke rapelela gore Mmušo wa Modimo o tle gomme o tlišetše batho ba dimilione kimologo. Nako le nako ge ke botša ba bangwe ditaba tše dibotse tša Mmušo wa Modimo, ke rapelela gore ke kgone go fa bonyenyane motho o tee kholofelo ya Beibele. Ka nywaga ya ka godimo ga e 25, Jehofa ka botho o ile a araba thapelo yeo. Nna le Karen re dumela gore go se go ye kae Jehofa o tla tliša diphetogo tše dikgolo mo lefaseng, eupša ga re sa boifa bofelo.”—Mateo 6:9, 10; 2 Petro 3:11, 12.

[Seswantšho go letlakala 9]

Gary le Karen gona bjale ba thabela go thuša ba bangwe go ba le kholofelo e tšwago molaetšeng wa Beibele