Ithute Lentšung la Modimo

Modimo ke Mang?

Sehlogo se se rotoša dipotšišo tšeo o ka bago o ile wa ipotšiša tšona le go go bontšha moo o ka balago dikarabo gona ka Beibeleng ya gago. Dihlatse tša Jehofa di tla thabela go ahlaahla dikarabo tše le wena.

1. Modimo ke mang?

Modimo wa therešo ke Mmopi wa dilo tšohle. Beibele e mmitša “Kgoši ya bosafelego,” e lego seo se bolelago gore ga a na mathomo gomme a ka se be le mafelelo. (Kutollo 15:3) Ka ge Modimo e le Mothopo wa bophelo, re swanetše go rapela yena feela.—Bala Kutollo 4:11.

2. Modimo o bjang?

Ga go na motho yo a kilego a bona Modimo ka gobane ke Moya, e lego seo se bolelago gore ke mohuta wa bophelo wo o phagametšego wa diphedi ka moka tše di bonagalago tšeo di phelago lefaseng. (Johane 1:18; 4:24) Semelo sa Modimo se utollwa dilong tšeo a di bopilego. Ka mohlala, ge re nagana ka mehutahuta ya dienywa le matšoba, re lemoga lerato la Modimo le bohlale bja gagwe. Bogolo bja legohle bo re bontšha matla a Modimo.—Bala Baroma 1:20.

Ka Beibeleng re ka ba ra ithuta go gontši ka semelo sa Modimo. Ka mohlala, e re botša seo Modimo a se ratago le seo a sa se ratego, kamoo a swarago batho le kamoo a arabelago ka gona maemong a fapafapanego.—Bala Psalme 103:7-10.

3. Na Modimo o na le leina?

Jesu o itše: “Tatago rena wa magodimong, leina la gago a le kgethagatšwe.” (Mateo 6:9) Gaešita le ge Modimo a ena le direto tše dintši, o na le leina letee feela. Lelemeng le lengwe le le lengwe, le bitšwa ka mo go fapanego. Gantši ka Sepedi re re “Jehofa.”—Bala Psalme 83:18.

Leina la Modimo le ntšhitšwe ka Dibeibeleng tše dintši gomme sebakeng sa lona gwa ngwalwa direto Morena goba Modimo. Eupša ge Beibele e be e ngwalwa, leina la Modimo le be le tšwelela go yona ka makga a e ka bago a 7 000. Jesu o ile a dira gore leina la Modimo le tsebje ka go le diriša ge a be a hlalosetša batho Lentšu la Modimo. O ile a thuša batho go tseba Modimo.—Bala Johane 17:26.

  4. Na Jehofa o na le taba le rena?

Jehofa o bontšha go re kgahlegela ka go theetša dithapelo tša rena ka boyena. (Psalme 65:2) Na go ata ga tlaišego go bolela gore Modimo ga a na taba le rena? Batho ba bangwe ba bolela gore Modimo o dira gore re tlaišege e le gore a re leke, eupša seo ga se therešo. Beibele e re: “Go dira tše kgopo a go be kgole le Modimo wa therešo.”—Jobo 34:10; bala Jakobo 1:13.

Modimo o neile batho seriti ka go ba nea tokologo ya boikgethelo. Na ga re tšeele godimo tokologo ye ya rena ya go ikgethela go direla Modimo? (Joshua 24:15) Tlaišego e a oketšega ka gobane batho ba bantši ba kgetha go dira bobe bathong ba bangwe. Jehofa o kwa bohloko ge a bona ditiro tše bjalo tša go hloka toka.—Bala Genesi 6:5, 6.

Go se go ye kae, Jehofa o tla diriša Jesu go fediša tlaišego le bao ba e bakago. Go sa letetšwe seo, Jehofa o na le lebaka le le kwagalago la go dumelela tlaišego ka nakwana. Lelokelelong le la dihlogo go tla ba le thuto e hlalosago lebaka leo ka lona Modimo a dumelelago tlaišego.—Bala Jesaya 11:4.

5. Modimo o nyaka gore re dire’ng?

Jehofa o re bopile re ena le bokgoni bja go mo tseba le go mo rata. O nyaka gore re ithute therešo ka yena. (1 Timotheo 2:4) Ge re ithuta Beibele, re ka tseba Modimo bjalo ka Mogwera.—Bala Diema 2:4, 5.

Ka ge Jehofa a re neile bophelo, re swanetše go mo rata kudu go feta le ge e le mang. Re ka bontšha Modimo gore re a mo rata ka go boledišana le yena ka thapelo le ka go dira seo a rego re se dire. (Diema 15:8) Jehofa o re kgopela gore re sware batho ba bangwe ka lerato.—Bala Mareka 12:29, 30; 1 Johane 5:3.

Bakeng sa tsebišo e oketšegilego, bona kgaolo 1 ya puku ye, Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.

[Seswantšho go letlakala 17]

Na go ka ba le lebaka le le kwagalago la go dumelela tlaišego ka nakwana?