Jesu o boletše gore “batho ba ba phetšego gabotse ga ba nyake ngaka, eupša ba babjago ba a e nyaka.” (Mateo 9:12) Ka gona o be a šišinya gore Mangwalo ga a gane ge motho a tsoma thušo ya tša kalafo go bao ba šomago ka kalafo. Ke ka baka leo Dihlatse tša Jehofa ka lethabo di amogelago dihlare le tlhokomelo ya tša kalafo. Di nyaka go boloka bophelo bjo bobotse le go tšwela pele di phela. Ge e le gabotse, go swana le Mokriste wa lekgolong la pele la nywaga Luka, tše dingwe tša Dihlatse tša Jehofa ke dingaka.—Bakolose 4:14.

Lega go le bjalo, Dihlatse tša Jehofa ga di amogele mehuta ya kalafo yeo e thulanago le melao ya motheo ya Beibele. Ka mohlala, ga di amogele tšhelo ya madi ka ge Beibele e ganetša go tšhela madi bakeng sa gore motho a tšwele pele a phela. (Genesi 9:4; Lefitiko 17:1-14; Ditiro 15:28, 29) Lentšu la Modimo le ganetšana le dikalafo goba mekgwa ya go alafa yeo e akaretšago go “diriša maleatlana,” goba go dirišana le meoya.—Jesaya 1:13; Bagalatia 5:19-21.

Ditsebi tše dintši tša tlhokomelo ya tša maphelo di alafa batho ka dihlare tšeo di sa thulanego le ditekanyetšo tša Beibele. Dikalafo tše bjalo tšeo bontši bja Dihlatse bo kgethago go di amogela, gantši ke tše kaone go feta tšeo di hlokomologago seo Modimo a se nyakago.

Go ba gona, ge go tliwa tabeng ya tša kalafo go na le dikgopolo tše dintši. Seo se ka holago motho yo mongwe se ka no se thuše yo mongwe. Ka baka leo, batho bao ba tsomago thušo e itšego ya tša kalafo go ditsebi ba ka duma go hwetša kgopolo ya ba mmalwa pele ba e newa.—Diema 14:15.

Ga se Hlatse e nngwe le e nngwe yeo e tla kgethago kalafo e swanago. Lentšu la Modimo le dumelela go fapana ga diphetho tšeo di theilwego letswalong ge molao wa Beibele o sa tshelwe. (Baroma 14:2-4) Ka gona, motho yo mongwe le yo mongwe o swanetše go hlahloba tšhišinyo yeo a e neilwego ya tša kalafo le go kgonthišetša gore ga e thulane le letswalo la gagwe leo le theilwego Beibeleng.—Bagalatia 6:5; Baheberu 5:14.

Hlatse e nngwe le e nngwe e tla lebelela mokgwa wa go fihlelela phetho yeo e e dirago bjalo ka ge eka ke mootledi yo a batamelago magahlanong a ditsela tša leemaema. Ge e ba a ka fo tloga moo ka lebelo a latela dikoloi tše dingwe, a ka baka kotsi e kgolo. Mootledi yo bohlale o tla fokotša lebelo gomme a lekola moela wa dikoloi pele a ka tšwela pele. Ka mo go swanago, Dihlatse ga di kitimele go dira phetho ya tša kalafo goba go latela phetho ya ba bantši ntle le go botšiša dipotšišo. Go e na le moo, di lekodišiša dikgetho tšeo di nago le tšona le go hlahloba melao ya motheo ya Beibele pele di dira phetho.

Dihlatse tša Jehofa di leboga batho bao ba dirago mošomo o mogolo le boineelo bja bao ba di hlokomelago ka tša kalafo. Le gona di thabela go imollwa malwetšing ke batho bao ba di alafago.