APRIL 1, 2019
RUSSIA

Wa Mboni za Yehova Winanso Amupeza Wolakwa ku Russia

YAMBANI

Pa 1 April, 2019, khoti la ku Russia lomwe linagamula kuti M’bale Dennis Christensen akhale m’ndende zaka 6, linapezanso a Sergey Skrynnikov a zaka 56 kuti ndi wolakwa chifukwa chochita zinthu mogwirizana ndi zimene amakhulupirira monga wa Mboni za Yehova. Khotilo linanena kuti a Skrynnikov alipire chindapusa cha ndalama zambiri zokwana madola 5,348. A Skrynnikov sanagamulidwe kuti akakhale m’ndende, ngakhale kuti maloya a mbali yomwe inakawasumira mlandu amafuna kuti akhale m’ndende zaka zitatu.

M’bale Skrynnikov ndi mkazi wake Nina, ali ndi mwana mmodzi wamkazi. Iwo amathandiza banja la mwana wawoyu limodzi zidzukulu zawo 5. Kuwonjezera pamenepo, banja la a Skrynnikov lilinso ndi udindo wosamalira makolo a Nina omwe ndi okalamba.

Pamene mlandu wake unkazengedwa m’khoti, M’bale Skrynnikov anafotokoza mwaulemu komanso momveka bwino zokhudza zimene amakhulupirira. Mwa zina, m’baleyu anati: “Munthu yemwe alibe chikhulupiriro mwa Mulungu atakumana ndi zimene ndakumana nazo inezi, akhoza kutaya mtima. . . . Koma monga wa Mboni za Yehova, sindikutaya mtima chifukwa ndili ndi chikhulupiriro. Ngati Mulungu angalole kuti ndikakhale m’ndende kwa zaka zitatu, sindikuyenera kuona zaka zimenezi ngati chilango, koma ngati mwayi wapadera woti ndikatumikire kumalo atsopano. Ndiye sindikudandaula. . . . Mulungu ndi mmodzi ndipo akhoza kutithandiza kaya tili m’ndende kapena ayi. Choncho, sikuti iye amatitaya. Iye amakhala nafe kulikonse komwe tingakhale bola ngati tili okhulupirika kwa iye.”

Zimatilimbikitsa tikaona chikhulupiriro cholimba chomwe abale athu, monga M’bale Skrynnikov, ali nacho. Tikaganizira mayesero aakulu omwe akukumana nawo, zimatikumbutsa mawu omwe Paulo ananena m’pemphero akuti: “Mulungu amene amapereka chiyembekezo akudzazeni ndi chimwemwe chonse ndi mtendere wonse chifukwa cha kukhulupirika kwanu, kuti mukhale ndi chiyembekezo chachikulu mwa mphamvu ya mzimu woyera.”—Aroma 15:13.

Zimene M’bale Skrynnikov Analankhula Pambuyo Pomva Chigamulo

Zamasuliridwa Kuchokera ku Chirasha

Choyamba, ndikufuna kuyamikira a Gleb Borisovich Noskov omwe amaweruza mlandu wanga chifukwa mlanduwu usanazengedwe, sanalamule kuti ndikhale m’ndende poyembekezera kuzenga mlanduwu. Zimenezi zinandipatsa mwayi wokhalabe ndi banja langa. Ndikufunanso kuthokoza anthu onse ogwira ntchito m’khoti chifukwa cha ntchito yawo.

Ndikuyamikira mwapadera woimira boma pamilandu, mayi Nadezhda Gennadiyevna Naumova chifukwa sanachite zinthu mondipanikiza komanso zinayenda bwino pamene ndinkafunsidwa mafunso.

Ndikufunanso kuyamikira maloya anga, mayi Irina Aleksandrovna Krasnikova komanso bambo Anton Nikolayevich Bogdanov, chifukwa cha ntchito yaikulu yomwe agwira. Ndinene pano kuti ndinali wodabwa kwambiri atakwanitsa kubweretsa katswiri wochokera ku Chelyabinsk.

Ndikuthokoza anzanga nonse okondedwa, chifukwa nthawi zonse munkabwera kudzandilimbikitsa mlandu wanga ukamazengedwa, ngakhale kuti munkadziwa kuti simuloledwa kulowa m’khoti.

Ndikuthokoza mayi anga chifukwa ngakhale kuti thanzi lawo silili bwino, ankabwera kukhoti kudzandilimbikitsa.

Ndikuthokoza mkazi wanga wokondedwa, amene wakhala akundithandiza pamtendere komanso pa nthawi zovuta kwambiri kwa zaka 37 zapitazi.

Komanso ndikuyamikira kwambiri Mulungu wanga wokondedwa, Yehova, yemwe wandipatsa mtendere komanso chimwemwe. Mwina zingakuvuteni kukhulupirira, koma mumtima mwanga sikuti ndine wokhumudwa chifukwa cha zimene zandichitikirazi, koma ndili ndi chisangalalo komanso mtendere.

Lemba la 2 Akorinto 4:8, 9 ndi ulosi wa m’Baibulo womwe ukukwaniritsidwa pa ine. Lembali limati: “Timapanikizidwa mwamtundu uliwonse, koma osati kupsinjidwa moti n’kulephera kusuntha. Timathedwa nzeru, koma osati mochita kusoweratu pothawira. Timazunzidwa, koma osati mochita kusowa kolowera. Timagwetsedwa pansi, koma sitiwonongedwa.”

Zimenezi zikusonyeza kuti ngakhale kuti atumiki a Mulungu adzapanikizidwa komanso kuzunzidwa, adzapitirizabe kugwira ntchito yomwe Ambuye Yesu anawapatsa ndipo anthu ambiri adzapitiriza kumva uthenga wabwino. Mawu amenewa akunena za anthu onse amene amatsatira Khristu.

Lemba la Mateyu 28:19, 20 limatiuza kuti, “Choncho pitani mukaphunzitse anthu a mitundu yonse kuti akhale ophunzira anga. Muziwabatiza m’dzina la Atate, ndi la Mwana, ndi la mzimu woyera, ndi kuwaphunzitsa kusunga zinthu zonse zimene ndinakulamulirani. Ndipo dziwani kuti ine ndili pamodzi ndi inu masiku onse mpaka m’nyengo ya mapeto a nthawi ino.”

Mzimu wa Yehova ukupitirizabe kutsogolera Akhristu ndipo umawapatsa mphamvu yoposa yachibadwa. Zimenezi zimawathandiza kuti azigwira ntchito yomwe Mulungu anawapatsa ngakhale kuti akuzunzidwa. Timakhulupirira kwambiri zimenezi tikaganizira zomwe zinachitika m’mbuyomu. M’zaka za m’ma 1930, zinkaoneka ngati a Mboni za Yehova sangathe kulalikira uthenga wa Ufumu wa Mulungu m’mayiko onse a mu Soviet Union. Koma chifukwa choti ntchito yolalikirayi imatsogoleredwa ndi Khristu, chakumayambiriro kwa zaka za m’ma 1950, iye anachititsa kuti boma la Soviet litumize mabanja ambirimbiri a Mboni za Yehova kumadera akutali a dziko la Siberia. Boma ndi limene linalipirira a Mboniwo ndalama zoti ayendere kukafika kumaderawo. Panopa padutsa zaka zoposa 60 kuchokera nthawi imeneyo, koma kodi n’chiyani chomwe chachitika? Akuluakulu a boma ku Siberia anadabwa kwambiri atazindikira kuti a Mboni alalikira pena paliponse. Katswiri wina yemwe amadziwa mbiri ya Mboni za Yehova m’nthawi ya ulamuliro wa Soviet Union anati: “Kulimbana ndi a Mboni za Yehova kuli ngati kuuzira maluwa otchedwa dandelion, omwe njere zake zimauluka mosavuta ndi mphepo. Ukawauzira mwamphamvu kwambiri m’pamenenso njere zake zimamwazikana kwambiri.”

Umu ndi mmene zinthu zililinso panopa ndi a Mboni za Yehova. Kodi ndi ndani amene timakumana nawo tikamalalikira kunyumba ndi nyumba? Timakumana ndi azimayi okwatiwa omwe sali pa ntchito komanso anthu omwe anapuma pa ntchito. N’zovuta kuti anthu omwe amapita ku ntchito tiwapeze pakhomo. Nthawi zinanso zimakhala zovuta kapenanso zosatheka kulalikira kunyumba zomwe zili ndi chitetezo champhamvu, m’ndende, m’makhoti, komanso m’ndende zomwe akaidi amagwirira ntchito za kalavulagaga. Koma ntchito yolalikira ikutsogoleredwa ndi Khristu ndipo iye [Yehova] waika zimenezi m’maganizo ndi mumtima mwa a Unduna wa Zachilungamo kuti achite chifuniro chake. Zotsatira zake n’zoti, a Unduna wa Zachilungamo, komiti yofufuza milandu ya dziko la Russia, komanso magulu ena oona zamalamulo, akhala akuthandiza a Mboni za Yehova kuti athe kulalikira uthenga wabwino kwa anthu ambiri. Motani? Chifukwa cha zochita zawo, anthu m’dziko lonse la Russia akulankhula zokhudza Yehova Mulungu yemwe ndi Wolamulira wa Chilengedwe Chonse. Kuyambira ku Kaliningrad mpaka ku Sakhalin, komanso ku zilumba za ku Kuril, ku Arkhangel’sk mpaka ku Crimea, ndi ku Yalta, anthu akunena zokhudza Yehova kunyumba, ku ntchito, m’ndende, m’makhoti, komanso m’ndende zomwe akaidi amagwira ntchito za kalavulagaga. A Mboni za Yehovafe sitinalotepo kuti tingathe kulalikira kwa anthu ambiri m’malo ambiri chonchi. Koma tsopano tili ndi mwayi wolalikira m’malo omwe kale sitikanatha kulalikirako komanso kugwiritsa ntchito njira zatsopano zolalikirira. Ndi chinthu chosangalatsa kwambiri kuti a Mboni za Yehova akutha kulalikira m’malo atsopano. Ndipo zimenezi zikutheka chifukwa cha ofesi ya woimira boma pamilandu.

Tiyeni tiganizire zimene zikhoza kuchitika m’tsogolo. Ngati boma litapitiriza kuika a Mboni za Yehova m’ndende kwa zaka 10 zikubwerazi kapena kuposerapo, ndiye kuti m’ndende iliyonse mudzakhala a Mboni pafupifupi 200. Tangoganizani kuti m’ndende imodzi muli mipingo 4 ya Mboni za Yehova. Oyang’anira ndende adzayamba kupempha a Unduna wa Zachilungamo kuti amasule a Mboni za Yehova. Kodi mukuganiza kuti n’chiyani chimene a Mboni ambiri azidzapempherera? Iwo azidzapemphera kuti: “Ambuye, musachititse woyang’anira ndende kuti andimvere chisoni, musachititse kuti anditulutse. Ndili ndi ophunzira Baibulo ambiri komanso anthu achidwi oti ndiwalalikire m’ndende muno.”

Munthu yemwe alibe chikhulupiriro mwa Mulungu atakumana ndi zimene ndakumana nazo inezi, akhoza kutaya mtima. Akhoza kunena kuti: “Sindinaphe kapena kubera aliyense. Sindinakangane ndi wina aliyense. Ndipo pali malipoti ambiri omwe ndi umboni wotsimikizira zimenezi. Komabe, maloya a mbali yomwe inandisumira mlandu akufuna kuti ndikhale m’ndende zaka zitatu.” Ngati munthu ulibe chikhulupiriro, ukhoza kutaya mtima chifukwa cha mmene zinthu zilili panopa. Koma monga wa Mboni za Yehova, ineyo ndili ndi chikhulupiriro. Ngati Mulungu angalole kuti ndikakhale m’ndende kwa zaka zitatu, sindikuyenera kuona zaka zimenezi ngati chilango, koma ngati mwayi wapadera woti ndikatumikire kumalo atsopano. Ndiye sindikudandaula. M’malomwake, ndikuona umenewu kuti ndi mwayi waukulu, mwayi woti nditumikire Mulungu kumalo omwe panopa kulibe a Mboni za Yehova. Panopa anthu m’malo amenewa ndi okonzeka kumvetsera uthengawu chifukwa amva kale zambiri zokhudza Mboni za Yehova kuchokera kwa ofalitsa nkhani. Tsopano nthawi yolalikira yakwana.

Mulungu ndi mmodzi ndipo akhoza kutithandiza kaya tili m’ndende kapena ayi. Choncho, sikuti iye amatitaya. Iye amakhala nafe kulikonse komwe tingakhale bola ngati tili okhulupirika kwa iye. Ndikukhulupirira kuti Mulungu akudziwa mmene thanzi langa komanso ubwenzi wanga ndi iye zilili, ndipo ngati akuona kuti n’zoyenera, alola kuti woweruza milandu andipatse chilango choti ndikakhale m’ndende, monga mmene mayi Naumova mukufunira. Ndikuyembekezera mwachidwi tsiku la 1 April. Lemba la Aheberi 13:6 limanditsimikizira kuti: “Yehova ndiye mthandizi wanga. Sindidzaopa. Munthu angandichite chiyani?” Yehova Mulungu andithandiza. Ndiye ndingaopenso ndani?

Sergey Skrynnikov