“BAASI neebaasa kugyenda, kwonka Omuchaina ogu agume aha!” Ebi n’ebigambo ebi Alexandra yaahuriire ashutami omu baasi, barikuza kuraba aha booda y’amahanga abiri ga South America. Akashohora kureeba ekyabaho, reero yaashanga omutsigazi Omuchaina arikugamba Oruspania orutahikire arikuteeraho kushoboororera omurinzi oburemeezi bwe. Ahabw’okugira ngu Alexandra akaba ari omu kibiina ky’Abajurizi ba Yehova ekyabaire nikikoresa Oruchaina, akeehayo kuhwera omu kuvunuura.

Omutsigazi ogwo akagira ngu akaba naikirizibwa kutuura omu ihanga eryo, kwonka ngu bakaba bamwibireho ebipapura bye n’esente. Omu kubanza omuserukare taraikiriize ebi baamugambiire kandi akateekateeka ngu Alexandra akaba ari omwe aha barikushuubura abantu. Bwanyima, akaikiriza ebi omushaija yaamugambiire, kwonka omushaija ogwo enshoberwa bakamushashuza ahabw’okutagira ebipapura ebihikire. Ahabw’okugira ngu akaba ataine sente, Alexandra akamuguza doora 20. Omushaija akasiima munonga yaagira ngu naija kumushashura ezirengire aha doora 20. Alexandra akamushoboororera ngu akaba atarikwesherurira ebihembo, kureka ngu naayenda kuhwera ahabw’okumanya ngu nikyo kihikire kukora. Akaha omushaija ogwo ebitabo ebirikushoboorora Baibuli, kandi yaamuhiga kushaba Abajurizi ba Yehova kumwegyesa Baibuli.

Nikishemeza kuhurira oku abantu barikuba efura aha bu batarikumanya, kandi hatariho kubanganisa, obufura buri omu diini zoona n’omu bataine diini. Ku waabaire ori iwe okaba noija kwehayo kuhwera omutsigazi ogwo? Ekibuuzo ekyo nikishemeza ahakuba Yesu akagira ati: “Okugaba kuhaisa omugisha okukira okuheebwa.” (Ebyakozirwe 20:35) N’omu bya sayansi nikishemeza, ahakuba abarikucondooza bashangire ngu waaha abandi noogasirwa munonga. Ka tureebe emiringo erikworeka ngu eki kihikire.

Ebibaireho nibyoreka ngu okuha abandi n’okushemererwa nibigyenda hamwe. Entumwa Paulo akahandiika ati: “Ruhanga akunda efura.” Akaba naagamba aha Bakristaayo abaabaire bahayo beekundiire kuhwera ab’eishe-emwe bagyenzi baabo abari omu buremeezi. (2 Abakorinso 8:4; 9:7) Paulo taragizire ngu bakaha abandi ahabw’okugira ngu bakaba bashemereirwe. Kureka bakaba bashemereirwe ahabw’okugira ngu bakaha abandi.

Buzima, kurugiirira aha kucondooza kumwe, okugaba “nikwimutsya ebicweka by’obwongo eby’okushemererwa, okushashanuka, obwesigye, ekirikureeta okumarwa.” Okucondooza okundi nikworeka ngu “okuha omuntu ondiijo sente nikureeta okushemererwa okukira okuba niwe waazeshohorezaho.”

Oreehuriireho ngu ahabw’embeera zaawe tihaine kihango eki orikubaasa kukora? Amazima gari ngu buri omwe naabaasa kutunga okushemererwa okurikuruga omu kuba “efura.” Twaha abandi twine ekigyendererwa kirungi, tikirikumanyisa okubaha ekintu kihango. Omwe aha Bajurizi ba Yehova akahandiikira abarikushohoza magaziini egi, reero  omu baruha yaatamu sente yaagira ati: “Emyaka egi yoona ntwire ntarikubaasa kuhayo esente nyingi aha Kyombeko ky’Obukama.” Kwonka, akagumizamu ati: “Yehova Ruhanga ampaire bingi kukira ebi mpaireyo. . . . Mwebare kumbaasisa kuhayo ekiconco eki, nikimpumuriza.”

Buzima okuhayo tikurikugarukira aha sente zonka. Hariho emiringo mingi endiijo ey’okuhayo.

Baibuli neegira eti: “Ow’embabazi ayezimuurira ebirungi, kwonka omunyamwaga ayesaasa.” (Enfumu 11:17) Abanyambabazi n’efura, nibaba beeteekateekire kuhayo obwire bwabo, amaani gaabo, kufayo aha bandi, n’ebindi bingi. Ebi byona nibibagasira omu miringo mingi, kandi obufura nk’obwo ni burungi aha magara gaabo.

Okucondooza nikworeka ngu abo abarikwehayo kuhwera abandi tibarikugira obuhuruzi bwingi, obusaasi, n’amaganya. Okutwarira hamwe, nibaba baine amagara marungi. Okukorera abandi eby’obufura nikihwera n’abo abarikuba baine endwara ezitarikukira nka siriimu n’ezindi. Kandi nikigambwa ngu n’abarikuba nibateeraho kucwa amaarwa baayejumba omu kuhwera abandi, nibatuubya aha maganya, kandi kibahwera n’okutagaruka nyima omu kunywa amaarwa.

Eki kiri kityo, ahakuba nikyorekwa ngu emitwarize “nk’okusaasibwa abandi n’okufayo aha bandi neehwera kutagira emiteekateekyere egwire.” Okuhayo nikutuubya okwerarikirira n’endwara ya puresha. Kandi n’abantu abaafeereirwe abakundwa baabo nibarahuka kukira amaganya ahabw’okuhwera abandi.

Hatariho kubanganisa, okuha abandi nikikuhwera munonga.

Yesu akahiga abakuratsi be ati: “Muhe, naimwe muryaheebwa endengo enungi, eigatiirwe, ecugutsiibwe erikusheeshekara, niyo murirengyerwa omu bifuba byanyu, ahabw’okuba endengo ei murengamu, naimwe niyo murirengyerwamu.” (Luka 6:38) Waaha abandi, nabo nibabaasa kusiima, reero bahindukye efura. N’ahabw’ekyo okuha abandi nikuhamya emikago n’okukwatanisa.

Abacondooza abarikwega aha kukwatanisa kw’abantu bareebire ngu “abantu abarikukira kufayo aha bandi nibahiga abandi nabo kukora nikyo kimwe.” Nangwa, “okushoma aha bantu abaayorekire embabazi z’omutaano nikihwera abantu kwongyera kuba efura.” N’ahabw’ekyo kurugiirira aha kucondooza kumwe, “omuntu omwe efura naabaasa kureetera abantu baingi kuba efura, bamwe aharibo abu atarikumanya nari abu atakareebahoga.” Ekirikumanyisa ngu, ekikorwa kimwe ky’obufura nikibaasa kujanjaara aha bantu baingi omu kicweka. Mbwenu shi tiwaakwenzire kutuura omu kicweka nk’ekyo? Buzima, nihabaho ebirungi bingi abantu baingi baaba efura.

Eky’okureeberaho ekirikworeka gye eki n’ekyabaireho omuri Florida, U.S.A. Guruupu y’Abajurizi ba Yehova bakeehayo kukora omurimo gw’okuhwera bwanyima y’eihunga ry’amaani. Ku baabaire bategyereize eby’okukoresa  omu kuhunduuza enju ei baabaire nibakoraho, bakareeba ekikaari ky’omutaahi kisiisikaire, kandi baamushaba kukikora. Bwanyima y’obwire, omutaahi akahandiika ebaruha yaagyohereza aha ofiisi enkuru ey’Abajurizi ba Yehova arikugira ati: “Ninyija kuguma nimbasiima. Ndeebire ngu abantu aba nibo bamwe aha bantu barungi abu ndareebire.” Okusiima kukamureetera kuhayo ekisiimo kihango eki yaagizire ngu n’eky’okukoresibwa omu murimo gw’Abajurizi ba Yehova ogw’omutaano.

Okucondooza kwa sayansi nikworeka ngu “hariho ekintu kikuru ekirikureetera abantu kwenda kuhwera abandi.” Okucondooza okwo nikworeka ngu abaana, “nibooreka ngu nibafayo n’obu barikuba batakeegire kugamba.” Ahabw’enki? Baibuli neeha eky’okugarukamu ku erikugira ngu abantu bakahangwa “omu kushusha kwa Ruhanga,” ekirikumanyisa ngu baine emitwarize erikushushana nk’eya Ruhanga.—Okutandika 1:27.

Gumwe aha mitwarize mirungi y’Omuhangi waitu, Yehova, Ruhanga, n’obufura. Atuhaire amagara na buri kimwe eki turikwenda kubaasa kushemererwa. (Ebyakozirwe 14:17; 17:26-28) Nitubaasa kumanya gye Tataitwe ow’omu iguru n’ebigyendererwa bye ebirikworeka rukundo turikwega Ekigambo kye Baibuli. Ekitabo eki nikyoreka ngu Ruhanga akataho entebeekanisa ngu twije tutungye okushemererwa omu biro by’omumaisho. * (1 Yohaana 4:9, 10) Obu Yehova Ruhanga niwe bukomooko bw’obufura, kandi ohangirwe omu kishushani kye, tikishemereire kukutangaaza kureeba ngu okuha abandi ni kirungi ahariiwe, kandi ngu Ruhanga naasiima obufura bwawe.—Abaheburaayo 13:16.

Noijuka Alexandra, owaagambwaho aha kutandika kw’ekicweka eki? Obufura bwe bukarugamu ki? N’obu ondiijo owaabaire ari omu baasi yaagizire ngu Alexandra esente ezi yaaha omushaija yaazinaga, omushaija ou yaahwereire akagamba na banywani be omu rurembo ei baasi yaayemereire, reero baamuha doora 20 yaazigarurira Alexandra. Kandi omushaija ogwo akaikiriza obuhabuzi bwa Alexandra, reero yaatandika kwega Baibuli. Alexandra akashemererwa munonga bwanyima y’ameezi ashatu ku yaareebire omushaija ogwo aha ruteerane oruhango orw’ebiro bishatu orw’Abajurizi ba Yehova orw’Oruchaina omuri Peru. Omushaija ogwo kubaasa kworeka okusiima kwe, akeeta Alexandra n’abu yaabaire aine aha ruteerane kwija aha mwanya gwe ahu arikuguriza eby’okurya.

Okuha abandi n’okubahwera nikireeta okushemererwa kwingi. Kandi okukira munonga, waaha abandi noobahwera gye kumanya Yehova Ruhanga, obukomooko bw’ebiconco byona ebirungi! (Yakobo 1:17) Nootunga aha birungi ebirikuruga omu kuha nk’okwo?