Menli mɔɔ bɔ Nyamenle Belemgbunlililɛ ne anwo edwɛkpa ne nolo siane biala la a yɛbu bɛ kɛ bɛle Gyihova Alasevolɛ a. (Mateyu 24:14) Menli ɛhye mɔ bie a le Alasevolɛ mɔɔ bɛzɔne bɛ nee bɛdabɛ mɔɔ bɛtɛsɔnenle bɛ noko bɛfɛta kɛ bɛyɛ edwɛkɛhanlɛ gyima ne bie la.

 Kyɛkyɛ. Tɛ ezukoa mɔɔ awie baye la a bahile kɛ ɔle Dasevolɛ anzɛɛ ɔbanyia gyimalilɛ anzɛɛ nwolɛ adenle bie wɔ ahyehyɛdeɛ ne anu a. (Gyima ne 8:​18-​20) Nɔhalɛ nu, menli mɔɔ ye ezukoa la ɛnla bɛ nwo ali. Dasevolɛ biala fi ye ɛhulolɛ nu fa ye mekɛ, ye anwosesebɛ nee ye anwonyia boa ewiade amuala gyima ne.​—2 Kɔlentema 9:7.

 Siane biala, Alasevolɛ ne mɔ bu edwɛkɛhanlɛ gyima ne anwo mgbonda wɔ bɛ asafo ne anu. Bɛfi bɛ ɛhulolɛ nu a bɛyɛ ɛhye a.

 Bɛfa asafo ne mgbondabulɛ ne bɛbɔ nu na bɛfa bɛnwa ɔfese ne mɔɔ wɔ bɛ maanle ne anu la. Ɔfese biala fa ye maanle ne anu ɛdeɛ ne bɔ nu na ɔfa ɔnwa ewiade amuala gyima ne ati.

 Wɔ ɛzonlenlɛ ɛvolɛ b ne awieleɛ, bɛkola bɛnwu Alasevolɛ mɔɔ wɔ maanle biala anu la dodo wɔ zɔhane ɛvolɛ ne anu. Bɛfa nɔma ɛhye mɔ bɛbɔ nu amaa bɛanwu Alasevolɛ dodo mɔɔ wɔ ewiade amuala la. Bɛfa maanle biala edwɛkɛhanlɛ gyima ne anwo amaneɛbɔlɛ nee anwubielɛ a bɛbɔ nu bɛyɛ Yearbook of Jehovah’s Witnesses ne a. Kɛ mɔɔ amaneɛbɔlɛ ɛhye mɔ maanle alimoa Kilisienema anwosesebɛ la, zɔhane ala a amaneɛbɔlɛ zɛhae mɔ maa yɛ anwosesebɛ ɛnɛ a.​—Gyima ne 2:​41; 4:4; 15:3.

 Ɔwɔ nuhua kɛ yɛndia bɛ yɛmboka Alasevolɛ ne anwo ɛdeɛ, noko yɛdie bɛ kɛnlɛma wɔ yɛ asafo ne mɔ anu. Bɛ nuhua dɔɔnwo kɔ ɛvolɛ biala Kelaese ewule Ngakyelɛlilɛ ne bie, ɔti saa yɛte menli dodo mɔɔ ba ayia ɛhye bie la yɛfi Alasevolɛ ne mɔ dodo ne anu a, yɛbahola yɛanwu bɛ dodo. Wɔ ɛvolɛ 2023 ne anu, menli dodo mɔɔ rale Ngakyelɛlilɛ ne la le 20,461,767

 Menli dɔɔnwo mɔɔ ɛngɔ yɛ ayia ne mɔ bie la nyia sua nu Baebolo ɛzukoalɛ mɔɔ bɛndua ɛhwee la azo nvasoɛ. Wɔ 2023, yɛyɛle Baebolo ɛzukoalɛ dodo 7,281,212 wɔ siane biala, bɛyɛ nuhua dɔɔnwo wɔ mekɛ ko ne ala anu.

 Fane dɔɔnwo ne ala, arane biza menli asɔne mɔɔ bɛkɔ la na yeagyinla zo yeabu ye mgbonda ne. Kɛ neazo la, U.S. Census Bureau ne ka kɛ wɔ neɛnleanu mɔɔ bɛyɛ la anu, “bɛbiza menli ne ɛzonlenlɛ mɔɔ bɛ nye die nwo la” na bɛdoale zo kɛ, “bɛ nuhua dɔɔnwo adwenle nzuzulɛ a bɛhɛlɛle a na ɛnee ɔngile kɛ amgba bɛboka bɛ nwo.” Mɔɔ nee ɛhye le ngakyile la, menli mɔɔ bɛka edwɛkɛ ne na bɛbu nwolɛ mgbonda la a yɛbu bɛ kɛ bɛle Gyihova Alasevolɛ a, na tɛ bɛdabɛ mɔɔ bɛfa bɛ nloa mgbane ala bɛka kɛ bɛle Alasevolɛ la ɔ.