Bɛha ye mekɛ tendenle kɛ Bolonyia le tete Kilisiene ɛvoyia mɔɔ bɛfa bɛdi Gyisɛse awolɛkenle. Noko akee, ninyɛne mɔɔ bɛyɛ wɔ ɛvoyia ɛhye anu la, ɛmmaa yɛnnwu kɛ ɔyɛle mɔɔ bɛvale bɛbetanle Gyisɛse awolɛkenle ne anwo la.

Nuhua ko a le Santa Claus anwo nwɔra ne. Bɛyɛle Santa mɔɔ wula tɛladeɛ kɔkɔlɛ, ɔ kɛsa le fufule na ɔ nvoka anwo le kɔkɔlɛ la kɛ Bolonyia nwo gualilɛ nwo nolobɔlɛ sɛkɛlɛneɛ kpalɛ bɛmaanle kɔmpɛlɛ bie mɔɔ yɛ ninyɛne mɔɔ bɛno wɔ America Sɔlɔ la wɔ 1931. Wɔ 1950 ne anu, Brazilma bie bɔle mɔdenle kɛ bɛfa awie mɔɔ ɛlie duma wɔ ɛkɛ la—Nenyia India, bɛazie Santa Claus agyakɛ anu. Boni a vi nu rale a? Abɔlɔba Carlos E. Fantinati ka kɛ, Santa Claus liele duma dɛlale Nenyia India nee “kakula Gyisɛse na ɔrayɛle ɛvoyia mɔɔ bɛdi wɔ December 25 ɛvolɛ biala.” Noko asoo Santa Claus anwo nwɔra ɛhye ala a le ngyegyelɛ wɔ Bolonyia nwo ɔ? Amaa yɛabua la, maa yɛzia yɛhɔ alimoa Kilisienema mekɛ zo.

Encyclopedia Britannica ka kɛ, “Wɔ Kilisienema ɛvoya nwiɔ ne mɔɔ limoa la anu, ɛnee bɛdwazo bɛtia bɛdabɛ mɔɔ bɛwule kɛ mogya dasevolɛ mɔɔ Gyisɛse boka nwo la awolɛkenle ɛlilɛ.” Duzu ati ɔ? Kilisienema bule awolɛkenle ɛlilɛ kɛ ɔle awozonlezonlenlɛ nyɛleɛ, debie mɔɔ bɛkpole ye bɔkɔɔ la. Nɔhalɛ nu, bɛanga kenle mɔɔ bɛwole Gyisɛse la anwo edwɛkɛ wɔ Baebolo ne anu ɛleka biala.

Kateleke Asɔne ne vale Bolonyia ɛvoyia ne ziele ɛkɛ wɔ ɛvoya nna Y.M., ɔnva nwo kɛ ɛnee alimoa Kilisienema ɛdendɛ ɛtia awolɛkenle ɛlilɛ amaamuo ne kɛ ɔnle kpalɛ la. Ɛnee asɔne ne kulo kɛ ɔdie duma na ɔye debie titili mɔɔ ɔsi ye adenle la anu ko ɔfi ɛkɛ—Wulomu awozonlezonlenlɛma mɔɔ bɛ nwo zonle nee bɛ ɛyɛlɛ mekɛ nu ɛvoyia ne mɔ. Penne L. Restad hɛlɛle wɔ Christmas in America anu kɛ, ɛvolɛ biala, ɔvi December 17 kɔdwu January 1, “Wulomuma dɔɔnwo di ɛvoyia, bɛdi nwɔhoa, bɛto ɛkponle, bɛtia na bɛdi ɛvoyia gyɛne bɛfa bɛdi bɛ nyamenle ne mɔ eni.” Wulomuma di Sɛnzɛne ne awolɛkenle wɔ December 25. Asɔne ne luale Bolonyia mɔɔ bɛvale bɛziele ɛkɛ wɔ kenle zɔhane azo la, bɛlɛbɛlale Wulomuma dɔɔnwo bɛmaanle bɛlile Gyisɛse awolɛkenle bɛgyakyile sɛnzɛne ne awolɛkenle ɛlilɛ. Santa Claus, a Biography mɔɔ Gerry Bowler hɛlɛle la ka kɛ, ɛnee Wulomuma “tɛdie bɛ nye wɔ fɔsɛlɛ mekɛ nu ɛvoyia ɛhye mɔ anu.” Noko, “bɛhɔle zo bɛvale ndenle dɛba ne bɛziele kenle fofolɛ ne agyakɛ anu.”

Ɔda ali kɛ, ngyegyelɛ titili mɔɔ wɔ Bolonyia nwo la a le kɛ ɔ bo ɛnvi ɛleka kpalɛ. Stephen Nissenbaum hɛlɛle ye wɔ ye buluku The Battle forChristmas ne anu kɛ Bolonyia “le awozonlezonlenlɛ ɛvoyia mɔɔ bɛdi ye kɛ asɛɛ ɔle Kilisienema ɛvoyia a.” Ɛhye ati, Bolonyia gua Nyamenle nee ɔ Ra, Gyisɛse Kelaese anyunlu aze. Asoo ɛhye le edwɛkɛ mɔɔ nwolɛ ɛngyia ɔ? Baebolo ne ka kɛ: “Kɛ ɔkɛyɛ na kpalɛ nee ɛtane adila agɔnwolɛ ɛ? Kɛ ɔkɛyɛ na wienyi nee awozinli abɔ nu adɛnla ɛ?” (2 Kɔlentema 6:14) Kɛ mɔɔ baka mɔɔ ɛhyea de la, bɛhyea Bolonyia nwo edwɛkɛ ne mɔɔ “bɛtenrɛ ye a ɔndenrɛ” a.—Nolobɔvo ne 1:15.