Куд фулдӕр игъосун кодтан, уотӕ литературӕ дӕр фулдӕр гъудӕй. Ӕнсувӕртӕ Бруклини Вефили мухур кодтонцӕ журналтӕ, фал гъӕдӕг цъари хӕццӕ киунугутӕ ба ӕндӕр фирмитӕ мухур кодтонцӕ. Цалдӕр мӕйей дӕргъи еци фирмитӕн сӕ бон нӕбал адтӕй, цӕйбӕрцӕ киунугутӕ нӕ гъудӕй, уойбӕрцӕ мухур кӕнун, ӕма е игъосун кӕнуни гъуддагбӕл лӕгъузӕрдӕмӕ рабӕрӕг ӕй. Уомӕ гӕсгӕ ӕнсувӕр Рутерфорд, типографий кустӕн дзуапп ка лӕвардта, еци ӕнсувӕр Роберт Мартини бафарста, ци цӕстӕй кӕсуй, киунугутӕ мухур кӕнун нӕхуӕдтӕ ку райдайӕн, уомӕ.

Ӕнсувӕр Мартин уой фӕсте ниффинста: «Еци гъудийӕй мӕ сор хед ракалдӕй, цӕйбӕрцӕ цидӕртӕ гъудӕй искӕнун, цӕмӕй, киунугутӕ кӕми мухур кодтайанӕ, уӕхӕн типографи райгон кодтайанӕ». Ӕнсувӕртӕ бунат байхуӕрстонцӕ Бруклини, Конкорд-стрит, 18, удта гъӕугӕ косӕндзаумӕуттӕ ӕма станоктӕ дӕр исамал кодтонцӕ.

Фал еци гъуди алке зӕрдӕмӕ нӕ фӕццудӕй. Нӕ нӕуӕг типографи нин бабӕрӕг кодта, раздӕр нин киунугутӕ ка мухур кодта, еци фирми хецау ӕма загъта: «Заманай типографи уин ӕй, фал аци техникӕбӕл косун сумахӕй неке зонуй. Еу ӕхсӕз мӕйей фӕсте уин нецӕмӕнбал бӕздзӕнцӕ».

«Еу ӕрдиги раст адтӕй,– финста ӕнсувӕр Мартин.– Фал еци лӕг еу цидӕр нӕ зудта: Хуцау алкӕддӕр нӕ хӕццӕ адтӕй». Ӕнсувӕр Мартин раст адтӕй. Берӕ нӕ рацудӕй, ӕма нӕ нӕуӕг типографий бонмӕ 2 000 киунуги мухур кодтан.

Йегови лӕггадгӕнгутӕ айдагъ киунугутӕ нӕ райдӕдтонцӕ мухур кӕнун, фал ма хуарз хабар игъосун кӕнуни гъуддаги дӕр пайда кӕнун райдӕдтонцӕ нӕуӕг мадзалӕй – радиойӕй. 1922 анзи 26 феврали хуцаубони ӕнсувӕр Рутерфордӕн радиой фиццаг хатт адтӕй радзубанди.  Ӕ радзубанди хундтӕй «Абони ка цӕруй, уонӕй милиуантӕ некӕд рамӕлдзӕнцӕ». Дзурдта ӕй Лос-Анджелеси (штат Калифорни, АЕШ) еу радиостанцийӕй.

Программӕмӕ байгъустонцӕ 25 000 адӕймагей бӕрцӕ. Еуӕй-еуетӕ еци радзубандий туххӕй арфи дзурдти хӕццӕ финстӕгутӕ финстонцӕ. Еу си адтӕй Уиллард Ашфордӕй. Цардӕй Санта-Ани (штат Калифорни, АЕШ). Ӕнсувӕр Рутерфордӕн райарфӕ кодта, зӕгъгӕ, дан, дин заманай радзубанди адтӕй. Удта ма загъта: «Нӕ хӕдзари ӕртӕ хъансӕйги ес. Ӕма еци радзубанди радиойӕй ку н’ адтайдӕ, уӕд имӕ не ’гасей бон не ’ссайдӕ байгъосун, нӕ рази ’й хӕстӕг ескӕми ку дзурдтайсӕ, уӕд дӕр».

Уой фӕсте ма ӕртӕ къуӕрей дӕргъи адтӕй ӕндӕр радиопередачитӕ. Анзи кӕрон «Гъӕуайгӕнӕн мӕсуг»-и финст адтӕй: «Радиой фӕрци хуарз хабар фегъустонцӕ тӕккӕ минкъийдӕр 300 000 адӕймаги».

Еци передачитӕ адӕни зӕрдӕмӕ ке фӕццудӕнцӕ, уомӕ гӕсгӕ Библиртасгутӕ унаффӕ рахастонцӕ, сӕхе радиостанци ке искӕндзӕнцӕ Статени сакъадахбӕл, Бруклини Вефилмӕ хӕстӕг. Еци радиостанци исхудтонцӕ WBBR. Уой фӕсте берӕ ӕнзти дӕргъи еци радиостанций фӕрци игъосун кодтонцӕ хуарз хабар. Уотемӕй ӕй алли рауӕнти дӕр берӕ адӕн фегъустонцӕ.

1922 анзи 15 июни «Гъӕуайгӕнӕн мӕсуг»-и финст адтӕй игъосуйнаг, 5 сентябрӕй 13 сентябрмӕ Сидар-Пойнти конгресс ке уодзӕй. Конгресмӕ ка ӕрцудӕй, уони цийнӕн кӕрон дӕр н’ адтӕй!

Конгресси райдайӕни ӕнсувӕр Рутерфорд загъта: «Ӕппундӕр нӕ гурусхӕ кӕнун, Хецау нӕ хӕццӕ ке ӕй, удта аци конгрессӕн дӕр ке райарфӕ кӕндзӕй ӕма хуарз хабар игъустгонд ке ӕрцӕудзӕй никкидӕр ма берӕ рауӕнти». Игъосун кӕнуни гъуддаги фулдӕр архайун ке гъӕуй, уой туххӕй иннӕ ӕнсувӕртӕ дӕр сӕ радзубандити дзурдтонцӕ.

Майрӕнбони, 8 сентябри конгресс кӕми адтӕй, еци залмӕ ӕрбацудӕй 8 000 адӕймагей бӕрцӕ. Етӕ еугурӕйдӕр ӕнсувӕр Рутерфорди радзубандимӕ ӕнгъӕлмӕ кастӕнцӕ. Нифс сӕ адтӕй, сӕ хунди гӕгъӕдити ци дамугъатӕ адтӕй – ADV – етӕ ци нисан кӕнунцӕ, уой син ке балӕдӕрун кӕндзӕй. Сӕ бунӕттӕ ку байахӕстонцӕ, уӕд,  ӕвӕдзи, фӕууидтонцӕ сценӕбӕл тугъдӕй ци хъумац адтӕй, уой. Артур Клаус конгресмӕ иссудӕй Талсӕй (штат Оклахомӕ) ӕма имӕ алцидӕр дзӕбӕх кӕми игъусдзӕй, уӕхӕн бунат иссирдта. Е уотӕ ӕнцон н’ адтӕй, уомӕн ӕма уӕди рӕстӕги микрофонтӕй нӕ пайда кодтонцӕ.

Цӕмӕй игъосгути маци хъор кодтайдӕ, уой туххӕй сӕрдареуӕггӕнӕг ӕнсувӕр загъта, ӕнсувӕр Рутерфорд, дан, радзубандий хӕццӕ ку рацӕуа, уӕд залмӕ бацӕуӕн нӕ уодзӕй. 9:30 Рутерфорд ӕ радзубанди райдӕдта Киристей дзурдтӕй ӕма бакастӕй Матфеййи 4:17: «Уӕларвон Паддзахадӕ ӕрхӕстӕг ӕй!» Адӕн еци Паддзахади туххӕй хуарз хабар куд фегъосдзӕнцӕ, уой туххӕй ку дзурдта, уӕд загъта: «Киристе ӕхуӕдӕг загъта, е ’рцуди рӕстӕг ке райдайдзӕй хумтӕ кӕрдунӕй, гъома ӕхемӕ ке ӕрӕмбурд кӕндзӕй ӕ адӕни, еузӕрдон ӕма ӕновуд ка ӕй, уони».

Ӕнсувӕр Артур Клаус сӕйраг зали бадтӕй. Е загъта: «Еунӕг дзурд рауадзун дӕр нӕ нӕ фӕндадтӕй». Фал удта балӕгъуз ӕй ӕма ’й залӕй рацӕун багъудӕй. Бӕргӕ ’й нӕ фӕндадтӕй, уомӕн ӕма ’й зудта, фӕстӕмӕ ’й ке нӕ бауадздзӕнцӕ. Фал ин гӕнӕн н’ адтӕй.

Цалдӕр минуттей фӕсте ӕхемӕ ’рцудӕй. Фӕстӕмӕ залмӕ ку цудӕй, уӕд фегъуста хъӕбӕр ке нирдзӕф кодтонцӕ. Дессаг имӕ фӕккастӕй, цӕмӕн ӕрдзӕф кодтонцӕ, е ӕма ӕхецӕн загъта, фарсмӕ исхезун дӕр мӕ ку гъӕуа, цӕмӕй аци радзубандимӕ кӕронмӕ байгъосон, уӕд дӕр уотӕ бакӕндзӕн. Артурбӕл уӕд 23 анзи цудӕй. Тугур авгӕй ӕмбӕрзт кӕми адтӕй, уоми къӕрӕзгитӕ игон адтӕнцӕ ӕма уордӕмӕ исбурдӕй. Уордигӕй имӕ алцидӕр хуарз игъустӕй.

Фал уоми еунӕг Артур н’ адтӕй. Е ’мбӕлттӕй цалдӕр уоми адтӕнцӕ. Сӕ еу, Фрэнк Джонсон, Артурмӕ балигъдӕй ӕма ’й рафарста:

– Хиринкъа дӕмӕ нӕййес?

– Куд нӕ! – загъта Артур.

– Йеговӕ нин дӕу фӕрци дзуапп равардта,– цийнӕгӕнгӕй загъта Фрэнк.– Сцени сӕрмӕ уӕртӕ еци хъумац уинис? Е плакат ӕй. Тӕрхонгӕнӕгмӕ a  лӕмбунӕг игъосӕ, ӕма уотӕ куддӕр зӕгъа, «игъосун кӕнтӕ, игъосун кӕнтӕ», уотӕ аци цуппар бӕттӕни фӕллух кӕнӕ.

Ӕнсувӕр Рутерфорд еци дзурдтӕ кӕд зӕгъдзӕй, уомӕ Артур хъӕбӕр ӕнгъӕлмӕ кастӕй. Уӕдмӕ дин Рутерфорд ӕ радзубандий сӕйраг хаймӕ рахизтӕй ӕма хъӕбӕр гъӕрӕй загъта: «Нӕ Хецауӕн уотӕ еузӕрдон ӕма ӕцӕг ӕвдесӕнтӕ. Уӕ тох ма ниууагътӕ, цалинмӕ Устур Вавилонӕй дор-дорбӕл мабал байзайа, уӕдмӕ. Хуарз хабари туххӕй алкӕмидӕр игъосун кӕнтӕ! Аци бон ӕхсидзгӕ бон ӕй. Ӕгас дуйне дӕр ӕй гъӕуама зона, Йеговӕ Хуцау ке ӕй, Йесо Киристе ба хецӕутти Хецау ӕма паддзӕхти Паддзах! Сумах ба айтӕ ӕ минӕвӕрттӕ. Мадта игъосун кӕнтӕ, игъосун кӕнтӕ, игъосун кӕнтӕ Паддзах ӕма ӕ Паддзахади туххӕй!»

Артур ӕма иннӕ ӕнсувӕртӕ бӕттӕнтӕ фӕллух кодтонцӕ ӕма плакат рӕсугъд ихӕлд ӕркодта. Уӕд еугурӕйдӕр балӕдӕрдтӕнцӕ, ADV дамугъатӕ ци нисан кӕнунцӕ, уой. Плакатбӕл финст адтӕй: «Игъосун кӕнтӕ Паддзах ӕма ӕ Паддзахади туххӕй!» (аци дзурдтӕ англисагау ӕнцӕ: Advertise the King and Kingdom, ADV дамугъатӕ ба фиццаг дзурдӕн ӕнцӕ ӕ фиццаг ӕртӕ дамугъай).

Еци конгресс хуӕртӕ ӕма ӕнсувӕртӕн банхус кодта, цӕмӕй сӕ хъауритӕ Хуцауи Паддзахади туххӕй хуарз хабар игъосун кӕнунмӕ исаразтайуонцӕ. Ӕма еци кусти зӕрдиагӕй архайдтонцӕ. Штат Оклахомӕй еу киунугӕхӕссӕг (нур пионертӕ хуннунцӕ) ниффинста: «Кӕми игъосун кодтан, е ӕй, ӕвзалуй шахтитӕ кӕми ес, уӕхӕн бунат. Адӕн си уӕхӕн мӕгур цард кӕнунцӕ, ӕма ин зӕгъӕн дӕр нӕййес». Удта ма ниффинста, зӕгъгӕ, дан, адӕн, журнал «Сугъзӕрийнӕ ӕнос»-и ци финст ес, уой ку фегъосунцӕ, уӕд сӕ цӕститӕ дони разелунцӕ. Фӕстагмӕ загъта: «Уӕхӕн адӕнӕн сӕ нифс федар кӕнун нӕ бон ке ӕй, е нин устур цийни хуасӕ ’й».

Киристе загъта: «Кӕрдуйнаг, ӕцӕгӕйдӕр, берӕ ес, косгутӕ ба – минкъий» (Лук. 10:2). Еци Библиртасгутӕ ’й лӕдӕрдтӕнцӕ, игъосун кӕнуни гъуддаг цӕйбӕрцӕбӕл ӕхсидзгӕ ’й, уой. Ӕма 1922 анзи кӕронмӕ цӕттӕ адтӕнцӕ никки зӕрдиагдӕрӕй игъосун кӕнун хуарз хабар Хуцауи Паддзахади туххӕй.