Кӕд рагон израилӕгтӕ тугъдмӕ цудӕнцӕ, уӕд мах абони цӕмӕннӕ тохӕн?
«УӔ ЕУ ДӔР уи Франций кенӕ Англий нихмӕ тугъдмӕ рацӕун ку нӕ бакома, уӕд уи еу дӕр уодӕгасӕй нӕ байзайдзӕй!» – нигъгъӕр кодта нацистон офицер ахӕст Йегови Ӕвдесӕнти къуарбӕл. Кӕд сӕ фарсмӕ гӕрзефтонг ӕфсӕддонтӕ лӕудтӕнцӕ, уӕддӕр ӕнсувӕртӕй еу дӕр нӕ фӕттарстӕй. Дессаги нифсхастдзийнадӕ бавдистонцӕ. Аци цӕветтонӕй бӕрӕг ӕй, Йегови Ӕвдесӕнтӕ тугъдтитӕмӕ цӕхуӕн цӕстӕй кӕсунцӕ, е. Мах аци дуйней тугъдтити нӕ архайӕн. Сауӕнгӕ ма нин мӕлӕтӕй тӕссаг ку фӕууй, уӕддӕр неке фарс рахуӕцӕн.
Ӕхе киристон ка хонуй, уонӕй алке аци гъудий хӕццӕ не ’сарази уодзӕй. Беретӕмӕ уотӕ кӕсуй, ӕма динбӕл хуӕст адӕймаги бон ӕй ӕ фидибӕсти сӕрбӕл тохун, ӕма архайгӕ дӕр гъӕуама уотӕ кӕна. Гӕнӕн ес, ӕма уотӕ фӕссагъӕс кӕнунцӕ: «Рагон дзиуиттӕгтӕ Хуцауи адӕн адтӕнцӕ ӕма тугъдмӕ цудӕнцӕ. Мадта абони ба киристӕнттӕ тугъдмӕ цӕмӕннӕ гъӕуама цӕуонцӕ?» Еске дӕ уотӕ ку бафӕрса, уӕд ин цӕхуӕн дзуапп ратдзӕнӕ? Уӕхӕн адӕймагӕн дӕ бон адтайдӕ зӕгъун, рагон израилӕгтӕ ци уавӕри адтӕнцӕ, е хъӕбӕр ке хецӕн кӕнуй, абони Хуцауи лӕггадгӕнгутӕ ци уавӕри ’нцӕ, уомӕй. Ӕркӕсӕн фондз гъуддагемӕ.
1. РАГИДЗАМАНТИ ХУЦАУИ ЛӔГГАДГӔНГУТӔ ӔГАСӔЙДӔР ЕУ АДӔНИХАТТӔЙ АДТӔНЦӔ
Рагидзаманти Йеговӕ равзурста еу адӕни, израилӕгти, цӕмӕй ин лӕггадӕ кодтайуонцӕ. Йеговӕ син загъта: «Ӕгас адӕнтӕй дӕр сумах исуодзиайтӕ мӕ адӕн, уодзиайтӕ мин, уӕлдай хъазар мин ка ӕй, еци адӕн» (Рац. 19:5). Удта ма син Хуцау зӕнхитӕ дӕр еу рауӕн рахецӕн кодта. Уомӕ гӕсгӕ Йеговӕ израилӕгтӕн ку фӕззӕгъидӕ, цӕмӕй иннӕ адӕни нихмӕ истохонцӕ, уӕд сӕхеуӕнтти нихмӕ нӕ тохиуонцӕ ӕма сӕ нӕ мариуонцӕ a.
Абони Хуцауи лӕггадгӕнгутӕ ӕнцӕ «еугур адӕнтӕй, муггӕгтӕй, [ӕма] адӕнихӕттитӕй» (Рарг. 7:9). Мадта абони Йегови лӕггадгӕнгутӕ тугъдмӕ ку цӕуонцӕ, уӕд, зӕгъӕн уодзӕй, ӕма сӕ хуӕртӕ ӕма ӕнсувӕрти нихмӕ цӕудзӕнцӕ ӕма ма сӕ сауӕнгӕ маргӕ дӕр кӕндзӕнцӕ.
2. ТУГЪДМӔ ЦӔУН ИЗРАИЛӔГТӔН ЙЕГОВӔ ӔХУӔДӔГ ФӔЗЗӔГЪИДӔ
Рагидзаманти Йеговӕ ӕхуӕдӕг ниллух кӕнидӕ, израилӕгтӕ тугъдмӕ кӕд ӕма цӕмӕн цӕудзӕнцӕ, уой. Зӕгъӕн, цӕмӕй Ханаани цӕргутӕн ци тӕрхон рахаста, уой исӕнхӕст кодтайуонцӕ. Етӕ сайтӕнттӕн кувтонцӕ, илгъаг ӕма ихӕлд миутӕ кодтонцӕ ӕма сӕ сувӕллӕнтти мӕнгӕ хуцӕуттӕн нивонди хастонцӕ. Йеговӕ израилӕгтӕн баихӕс кодта, цӕмӕй син ци зӕнхитӕй зӕрдӕ байвардта, уонӕй еци адӕни фесафтайуонцӕ (Лев. 18:24, 25). Хуцауи лӕггадгӕнгутӕ Зӕрдӕвӕрд зӕнхӕбӕл ку ӕрцардӕнцӕ, уӕд син багъӕуаги Хуцау фӕззӕгъидӕ, цӕмӕй, сӕ нихмӕ ка адтӕй, еци адӕни хӕццӕ истухтайуонцӕ (2 Сам. 5:17–25). Фал Йеговӕ еунӕг хатт дӕр нӕ бауагъта, цӕмӕй израилӕгтӕ сӕхуӕдтӕ ниллух кодтайуонцӕ, ке хӕццӕ син тохгӕ ’й, уой. Сӕхуӕдтӕ еске хӕццӕ ку истохиуонцӕ, уӕд сӕ е кӕуйнаг фӕстеугутӕмӕ ӕркӕнидӕ (Ним. 14:41–45; 2 Анз. 35:20–24).
Абони Йеговӕ адӕни тугъдмӕ не ’рветуй. Адӕн тугъд ку райдайунцӕ, уӕд ӕрмӕстдӕр сӕхе мӕтӕ фӕккӕнунцӕ, Хуцау сӕмӕ нимади дӕр нӕ фӕууй. Фӕттохунцӕ зӕнхити туххӕй кенӕ, цӕмӕй фӕгъгъӕздугдӕр уонцӕ, уой туххӕй. Тугъдтитӕ ма баст фӕуунцӕ политики хӕццӕ дӕр. Ес ма уӕхӕнттӕ дӕр, уотӕ ка фӕдздзоруй, зӕгъгӕ, Хуцауи номӕй тохӕн, цӕмӕй ин е знӕгти марӕн. Кенӕ ма уотӕ дӕр фӕззӕгъунцӕ, тохӕн, дан, цӕмӕй нӕ дин багъӕуай кӕнӕн. Фал Йеговӕ е знӕгти ӕхуӕдӕг фесафдзӕй ӕма ӕ лӕггадгӕнгути сӕрбӕл рахуӕцдзӕй. Е ӕрцӕудзӕй, федӕни ци тугъд уодзӕй, уоми – Армагеддони (Рарг. 16:14, 16). Еци тугъди тохдзӕй ӕ уӕларвон ӕфсад, ӕ зӕнхон лӕггадгӕнгутӕй си неке архайдзӕй (Рарг. 19:11–15).
3. ИЗРАИЛӔГТӔ УОДӔГАСӔЙ НИУУАДЗИУОНЦӔ, ЙЕГОВӔБӔЛ КА БАУУӔНДИДӔ, УОНИ
Раав ӕма ӕ бийнонтӕ куд фӕййервазтӕнцӕ, уотӕ, абони ци тугъдтитӕ цӕуй, уоми, Хуцаубӕл еузӕрдон ка ӕй, етӕ еугурӕйдӕр фӕййервӕзунцӕ?
Рагидзаманти израилӕгтӕ рамариуонцӕ, Йеговӕ мӕлӕти тӕрхон кӕмӕн рахӕссидӕ, ӕрмӕстдӕр уони. Фал ӕ гъуддӕгтӕй ка бавдесидӕ, Йеговӕбӕл ке ӕууӕндуй, уонӕмӕ ба нӕ бавналиуонцӕ. Ӕркӕсӕн дууӕ цӕветтонемӕ. Кӕд Йеговӕ Йерихони цӕргутӕн мӕлӕти тӕрхон рахаста, уӕддӕр израилӕгтӕ нӕ бавналдтонцӕ Раав ӕма ӕ бийнонтӕмӕ, уомӕн ӕма Раав Йеговӕбӕл баууӕндтӕй (Йес. Н. 2:9–16; 6:16, 17). Фӕстӕдӕр израилӕгтӕ Гаваони цӕргути нӕ ниццагътонцӕ, уомӕн ӕма ’й гаваойнӕгтӕ бавдистонцӕ, Йегови ӕцӕг Хуцаубӕл ке нимайунцӕ (Йес. Н. 9:3–9, 17–19).
Абони тугъд кӕми фӕццӕуй, уоми некӕмӕн фӕттӕрегъӕд кӕнунцӕ: уӕлдай син нӕ фӕууй, адӕймаг динбӕл хуӕст ӕй ӕви нӕ. Арӕх тугъдтити рамӕлунцӕ ӕнӕуой адӕн дӕр, гъома тугъди ка нӕ фӕййархайуй, етӕ.
4. ИЗРАИЛӔГТИ ГЪУДӔЙ ХУЦАУИ УАГӔВӔРДТӔМӔ ГӔСГӔ ТОХУН
Рагидзаманти израилӕгтӕ гъӕуама Йегови уагӕвӕрдтӕмӕ гӕсгӕ тухтайуонцӕ. Зӕгъӕн, горӕт байахӕссуни размӕ израилӕгтӕ гъӕуама еци горӕти цӕргутӕн загътайуонцӕ, «сӕ бон ке ӕй сӕ хӕццӕ федуди бадзурд искӕнун» (Дук. з. 20:10). Йеговӕ ма израилаг ӕфсӕддонтӕн бафӕдзахста, цӕмӕй хуӕрзӕгъдау цард кодтайуонцӕ ӕма кӕми ӕрлӕудтӕнцӕ, еци бунат кӕдзосӕй дардтайуонцӕ ӕма ’й мацӕмӕй фӕцъцъумур кодтайуонцӕ (Дук. з. 23:9–14). Иннӕ адӕнтӕмӕ уӕхӕн ӕгъдау адтӕй, ӕма ци горӕт байахӕссиуонцӕ, уоми силгоймӕгтӕн тухмиуӕ бакӕниуонцӕ. Фал Йеговӕ ӕ лӕггадгӕнгутӕн уотӕ кӕнун нӕ уагъта. Уомӕй уӕлдай ма израилаг ӕфсӕддон цагъайради ци силгоймаги райсидӕ, уой ӕ бон адтӕй ӕрхонун. Ӕрмӕст, горӕт кӕдӕй байахӕстонцӕ, уӕдӕй еу мӕйӕ гъӕуама рацудайдӕ (Дук. з. 21:10–13).
Абони бадзурдтӕ искӕнунцӕ, тугъди рӕстӕг барӕ цӕмӕн ес ӕма цӕмӕн нӕййес, уой фӕдбӕл. Сӕ нисан фӕууй, цӕмӕй тугъди рӕстӕг ӕнӕуой адӕнӕн маци уа. Бӕститӕн сӕ фулдӕр еци бадзурдтӕбӕл сӕ къохтӕ ӕрӕвӕрунцӕ. Фал, гъигагӕн, ци уагӕвӕрдтӕ си ес, уони ба арӕх нецӕмӕ ӕрдарунцӕ.
5. ХУЦАУ Ӕ АДӔНИ СӔРБӔЛ ӔХУӔДӔГ ФӔТТОХИДӔ
Цума абони Хуцау ескӕци адӕни сӕрбӕл тох кӕнуй, Йерихони рази израилӕгти сӕрбӕл куд тох кодта, уотӕ?
Рагидзаманти Йеговӕ ӕхуӕдӕг фӕттохидӕ израилӕгти сӕрбӕл. Арӕх дессаг дӕр искӕнидӕ, цӕмӕй фӕууӕлахез адтайуонцӕ. Зӕгъӕн, Хуцау ӕ адӕнӕн банхус кодта, цӕмӕй Йерихон байахӕстайуонцӕ. Йеговӕ куд загъта, уотемӕй ӕфсӕддонтӕ гъӕлӕсидзагӕй тохи гъӕр никкодтонцӕ ӕма горӕти фӕрстӕ сӕ бундори уӕнгӕ никкалдӕнцӕ. Уой фӕрци израилӕгтӕ горӕт ӕнцонтӕй байахӕстонцӕ (Йес. Н. 6:20). Кенӕ ба иннӕ хатт аморейти хӕццӕ ку истухтонцӕ, уӕд дӕр син Йеговӕ банхус кодта. Етӕ израилӕгтӕй ку лигъдӕнцӕ, уӕд сӕбӕл Йеговӕ арвӕй калдта устур ехтӕ «ӕма еци ехӕй ка фӕццагъди ӕй, етӕ адтӕнцӕ, Израили фурттӕ карди комӕй ке ниццагътонцӕ, уонӕй фулдӕр» (Йес. Н. 10:6–11).
Абони Йеговӕ нецӕхуӕн адӕни сӕрбӕл тохуй. Ӕ Паддзахадӕ ӕй Йесо Киристей къохти ӕма «аци дуйнейӕй нӕй» (Иоан. 18:36). Аци дуйней паддзахӕдтӕ ба Сайтани къохи ’нцӕ. Ӕма ци тогкалӕн тугъдтитӕ цудӕй ӕма цӕуй, уонӕй бӕрӕг ӕй, Сайтан куд ӕнӕхатир ӕй, е (Лук. 4:5, 6; 1 Иоан. 5:19).
ӔЦӔГ КИРИСТӔНТТӔ ӔГАСЕЙ ХӔЦЦӔ ДӔР ФӔРНӔЙ ЦӔРУНЦӔ
Куд ӕй фӕууидтан, уотемӕй, абони мах ци уавӕри ан, е хъӕбӕр хецӕн кӕнуй, рагон израилӕгтӕ ци уавӕри адтӕнцӕ, уомӕй. Фал ма тугъдтити нӕ фӕййархайӕн ӕндӕр цӕйдӕрти туххӕй дӕр. Зӕгъӕн, Хуцау загъта, фӕстаг бӕнтти рӕстӕг, ке ахур кӕндзӕй, етӕ айдагъ тугъдмӕ ке нӕ цӕудзӕнцӕ, фал ма тохунбӕл дӕр ке нӕ ахур кӕндзӕнцӕ (Ис. 2:2–4). Уомӕй уӕлдай ма Киристе ӕ ахуркӕнуйнӕгтӕн загъта: «Сумах ба аци дуйнейӕй нӕ айтӕ» (Иоан. 15:19). Уомӕ гӕсгӕ Йегови Ӕвдесӕнтӕ тугъдтити рӕстӕг неке фарс фӕуунцӕ.
Уомӕй уӕлдай ма Киристе ӕ фӕдбӕлдзӕугути еу ма цӕмӕдӕр разӕнгард кодта. Ахур сӕ кодта, цӕмӕй сӕ зӕрди маст макӕмӕ дардтайуонцӕ (Матф. 5:21, 22). Удта ма гъӕуама ӕ ахуркӕнуйнӕгтӕ ӕгасей хӕццӕ дӕр фӕрнӕй цардайуонцӕ ӕма се знӕгти уарзтайуонцӕ (Матф. 5:9, 44).
Махӕй ба ци ес зӕгъӕн? Ӕвӕдзи ни неке бафӕнддзӕй тугъдмӕ цӕун. Фал цума ӕмбурдӕй нӕ зӕрди маст некӕмӕ дарӕн ӕма имӕ знаги цӕстӕй нӕ кӕсӕн? Кӕд гъо, уӕд ӕгас хъауритӕй архайдзиан, цӕмӕй нӕ зӕрди маст мабал дарӕн (Иак. 4:1, 11).
Мах аци дуйней тугъдтити нӕ архайӕн, фал архайӕн, цӕмӕй хуӕртӕ ӕма ӕнсувӕрти астӕу ци фарнӕ ес, уой гъӕуай кӕнӕн (Иоан. 13:34, 35). Гъӕйдӕ мадта аци дуйней маке фарс уӕн, цалинмӕ Йеговӕ ӕгас тугъдтитӕн дӕр кӕрон не ’скӕна, уӕдмӕ! (Пс. 46:9).
a Хатгай Израили муггӕгтӕ кӕрӕдзей хӕццӕ истохиуонцӕ, фал еци тугъдтитӕ Йегови зӕрдӕмӕ нӕ цудӕнцӕ (1 Пад. 12:24). Фал еуӕй-еухатт ба кӕцидӕр тугъдтитӕ растбӕл нимадта, уомӕн ӕма еуӕй-еу муггӕгтӕ ӕ нихмӕ рацӕуиуонцӕ кенӕ ба ӕндӕр уӕззау тӕрегъӕдтӕ искӕниуонцӕ (Тӕрх. 20:3–35; 2 Анз. 13:3–18; 25:14–22; 28:1–8).
Ка ’й зонуй ма дӕ зӕрдӕмӕ фӕццӕуа
АРӔХДӔР КЕ ФӔДДӔТТУНЦӔ, ЕЦИ ФАРСТАТӔ
Йегови Ӕвдесӕнтӕ тугъдмӕ цӕмӕннӕ цӕунцӕ?
Ӕгас зӕнхӕбӕл дӕр ӕй зонунцӕ, Йегови Ӕвдесӕнтӕ тугъдмӕ ке нӕ цӕунцӕ. Базон, уотӕ цӕмӕн ӕй.
